नाशिकमध्ये 40 ऑक्सिजन निर्मिती प्रकल्प उभारणार, जिल्हा रुग्णालयातील प्रकल्पाचे भुजबळांकडून उद्घाटन

(Coronavirus)कोरोनाच्या पार्श्वभूमीवर निर्माण झालेल्या ऑक्सिजन टंचाईच्या प्रश्नावर मार्ग काढून जिल्ह्यात 40 ऑक्सिजन निर्मिती प्रकल्प उभारले जात आहेत. या प्रकल्पाच्या माध्यमातून दिवसाला 37 मेट्रीक टन ऑक्सिजन मिळणार आहेत. या प्रकल्पाच्या माध्यमातून जिल्ह्याने ऑक्सिजन स्वयंपूर्णतेकडे पाऊल टाकल्याचे प्रतिपादन जिल्ह्याचे पालकमंत्री छगन भुजबळ यांनी केले आहे.

नाशिक : कोरोनाची संभाव्य तिसरी लाट लक्षात घेता नाशिक जिल्हा प्रशासनाने पूर्व तयारीला सुरुवात केली आहे. यानुसार ऑक्सिजनची कमतरता भासू नये म्हणून जिल्ह्यात जवळपास 40 ऑक्सिजन प्रकल्प उभारण्यात येणार आहेत. यातील नाशिक जिल्हा शासकीय रुग्णालयातील ऑक्सिजन प्रकल्पाचे काम पूर्ण झाले असून शनिवारी पालकमंत्री छगन भुजबळ यांच्या हस्ते याचे उद्घाटन करण्यात आले.
कोरोनाच्या पार्श्वभूमीवर निर्माण झालेल्या ऑक्सिजन टंचाईच्या प्रश्नावर मार्ग काढून जिल्ह्यात 40 ऑक्सिजन निर्मिती प्रकल्प उभारले जात आहेत. या प्रकल्पाच्या माध्यमातून दिवसाला 37 मेट्रीक टन ऑक्सिजन मिळणार आहेत. या प्रकल्पाच्या माध्यमातून जिल्ह्याने ऑक्सिजन स्वयंपूर्णतेकडे पाऊल टाकल्याचे प्रतिपादन जिल्ह्याचे पालकमंत्री छगन भुजबळ यांनी केले आहे.

रुग्णालयांची ऑक्सिजन क्षमता 10 केएलने वाढणारजिल्हा सामान्य रुग्णालयात उभारण्यात आलेल्या ऑक्सिजन निर्मिती प्रकल्पामुळे रुग्णालयाची क्षमता 10 केएलने वाढणार आहे. तसेच जिल्हा सामान्य रुग्णालयाची अंतर्गत ऑक्सिजनची क्षमता 20 केएलची होती. पंरतु आता उभारलेल्या या नव्या प्रकल्पामुळे जिल्हा रुग्णालयाची क्षमता 30 केएल झाली आहे. या प्रकल्पामुळे नव्याने वाढविण्यात आलेल्या 150 बेडला पूरक व्यवस्था म्हणून याचा उपयोग होणार आहे, असे यावेळी भुजबळ यांनी सांगितले. या प्रकल्पामुळे कोरोनाच्या तिसऱ्या लाटेचा सामना करण्यासाठी जिल्हा प्रशासनाला मदत होणार असून रुग्णांना ऑक्सिजनअभावी जीव गमवावा लागणार नाही. यामुळे हा प्रकल्प संभाव्य तिसरा लाटेचा सामना करताना वैद्यकीय यंत्रणांसाठी सहाय्यभूत ठरेल असे भुजबळ म्हणाले.

दिवसाला 225 जम्बो सिलिंडर भरण्याची प्रकल्पाची क्षमता
जिल्हा सामान्य रुग्णालयातील ऑक्सिजन प्रकल्प जिल्हा नियोजन समितीच्या माध्यमातून तयार करण्यात आला आहे. या प्रकल्पाची दिवसाला 225 जम्बो सिलिंडर भरण्याची क्षमता असणार आहे. तसेच प्रत्येक उपजिल्हा रुग्णालयात निर्माण करण्यात येणाऱ्या ऑक्सिजन प्रकल्पाची क्षमता दिवसाला 125 सिलिंडरची असणार आहे. ग्रामीण रुग्णालयात 60 ते 70 जम्बो सिलिंडर ऑक्सिजनची निर्मिती दिवसाला होणार आहे. त्याचप्रमाणे नाशिकमध्ये उद्योग विभागाकडून 70 मेट्रिक टन ऑक्सिजन निर्मिती करणारा एक मोठा प्रकल्प प्रस्तावित आहे असेही भुजबळ यांनी सांगितले. जिल्ह्यातील सर्व शासकीय रुग्णालयांत कायमस्वरूपी ऑक्सिजनची व्यवस्था होण्यासाठी शासकीय व महापलिका रुग्णालयांत 40 ऑक्सिजन निर्मिती प्रकल्पांची उभारणी केली जाणार आहे. यामध्ये जिल्हा नियोजन समितीच्या माध्यमातून 24, केंद्र सरकारच्या वतीने 04, एचएएल व इंडिया सिक्युरिटी प्रेस सीएसआर फंडातून 4, नाशिक महानगरपालिकेच्या माध्यमातून 6 तर मालेगांव महानगरपालिकेच्या मध्ये एसडीआरएफ निधीतून 2 असे एकूण 40 ऑक्सिजन निर्मिती प्रकल्प उभारले जाणार आहेत. हे सर्व ऑक्सिजन निर्मिती प्रकल्प जून अखेरपर्यंत कार्यन्वित होणार आहे.

जिल्हा रुग्णालयातील ऑक्सिजन प्रकल्पाचे काम पूर्ण

या ठिकाणी होणार ऑक्सिजन निर्मिती प्रकल्पजिल्हा सामान्य रुग्णालय, उपजिल्हा रुग्णालय येवला, मनमाड, कळवण, चांदवड ,ग्रामीण रुग्णालय पिंपळगांव बसवंत, इगतपुरी, सिन्नर, अभोणा, वणी, दिंडोरी, बाऱ्हे, घोटी, गिरणारे, हरसूल, निफाड, नगरसूल, लासलगांव, देवळा, उमराणे, सटाणा, नामपूर, मालेगांव सामान्य रुग्णालय आणि महिला रुग्णालय या 24 ठिकाणी जिल्हा वार्षिक योजनेच्या माध्यमातून ऑक्सिजन निर्मिती प्रकल्प उभारले जातील. तसेच केंद्र सरकारच्या निधीतून नांदगाव, दाभाडी, पेठ सुरगाणा या 4 ठिकाणी तर प्रेसच्या सीएसआर फंडातून दोडी व त्र्यंबकेश्वर, गिरणारे, डांगसौंदाण येथे ऑक्सिजन निर्मिती प्रकल्प उभारले जाणार असल्याचे पालकमंत्री छगन भुजबळ यांनी सांगितले आहे. राज्यासह नाशिक जिल्ह्यामध्ये कोरोनाच्या संभाव्य तिसऱ्या लाटेचा धोका वर्तविण्यात येत आहे. कोरोनाच्या दुसऱ्या लाटेतही नाशिक जिल्ह्यातील अनेक रुग्णांना वेळेत ऑक्सिजन उपलब्ध न झाल्याने जीव गमवावा लागला होता. याचाच अनुभव पाठीशी ठेवत प्रशासनाने आत्तापासूनच उपाययोजना करायला सुरुवात केली आहे.

हेही वाचा - अंगावरील कपडे काढताच रुग्णालयाने परत केले पैसे; नाशिकातील घटना