नाशिक - दोन वर्षाच्या माझ्या मुलीला पतीने हिसकावून नेले. गेल्या सहा महिन्यांपासून मी तिला पाहिले नाही. मुलीला ताब्यात देण्याचे न्यायालयाचे आदेश आहेत. परंतु, अजूनही मला मुलीचा ताबा मिळालेला नाही. मला माझी मुलगी द्या यासाठी एका आईने जिल्हाधिकारी कार्यालयाबाहेर आमरण उपोषण केलं आहे. सुवर्णा जगदाळे-बागुल, असे उपोषकर्त्या महिलेचे नाव ( Mother Hunger Strike Get Custody Daughter In Nashik ) आहे.
जिल्हाधिकाऱ्यांना दिलेल्या निवेदनात सुवर्णा जगदाळे-बागुल यांनी म्हटलं की, सहा महिन्यापासून पती निलेश जगदाळे याने आपली 2 वर्षाची मुलगी राही हिला हिसकावून नेलं आहे. कौटुंबिक वादातून त्यांनी मला घरातून हाकलून दिले. मुलीचा ताबा मिळावा यासाठी शहादा येथे घरगुती हिंसाचार प्रतिबंधक कायद्यांतर्गत अर्ज केला होता. 10 मार्च 2022 रोजी न्यायालयाने अर्ज स्वीकारून स्थानिक पोलीस आणि संरक्षण अधिकाऱ्यांना आवश्यक कारवाई करण्याचे आदेश दिले. परंतु, अजूनही मुलगी मिळू शकलेली नाही. पती मुलीला घेऊन फरार झाला आहे. मुलगी मिळत नाही तोपर्यंत उपोषण सुरूच राहणार, अशी ठाम भूमिका सुवर्णा यांनी घेतली आहे.
सुवर्णा या रस्त्यालागत उपोषण करत असल्याने हा प्रकार येथे येणाऱ्या जाणाऱ्यांना सर्वांनाच दिसून येत आहे. एका मुलीसाठी आईने केलेला हा संघर्ष पाहून सर्वांचेच काळीज पिळवटून टाकत आहे. आता त्यांनी जिल्हाधिकार्‍यांना निवेदन दिले असून, पोलिसांनी देखील आईची भेट घेऊन सांत्वन केलं आहे. आता पोलीस मुलीचा शोध घेण्यात यशस्वी ठरतात का?, याकडे सर्वांचे लक्ष लागले आहे.
'माझ्या मुलीला आणून द्या' - माझी दोन वर्षाची मुलगी राहिला गेल्या सहा महिन्यापासून मी पाहिलेली सुद्धा नाही. ती जिवंत आहे की नाही हे सुद्धा मला माहित नाही. त्यामुळे हतबल होऊन शेवटचा पर्याय म्हणून आमरण उपोषणाला बसली आहे. राही मिळेपर्यंत मी हे उपोषण सुरूच ठेवणार आहे. या उपोषणात माझे कुटुंब मला साथ देत आहे. माझी पोलिसांना विनंती आहे की त्यांनी राहिला माझ्याकडे सुपूर्त करावे, अशी आर्त हाक सुवर्णा जगदाळे-बागुल यांनी दिली आहे.
हेही वाचा - RajyaSabha Election 2022 : अनिल देशमुख, नवाब मलिक राज्यसभेसाठी मतदान करणार?, गुरुवारी न्यायालयात सुनावणी
