मुंबई - मुंबई पोलिसांच्या गुन्हे शाखेने मुंबईतील माजी पोलीस आयुक्त परमबीर सिंह यांना नोटीस बजावली आहे. खंडणी प्रकरणी परमबीर सिंह यांना 12 ऑक्टोबरला चौकशीसाठी उपस्थित राहण्याचे नोटीसमध्ये उल्लेख आहे. हरियाणाच्या निवासस्थान सोबतच मुंबईतील नीलिमा येथील परमबीर सिंह यांच्या निवासस्थानी नोटीस देण्यात आली आहे. गोरेगाव पोलीस ठाण्यात परमबीर सिंह, सचिन वाझे आणि इतरांविरोधात खंडणीचा गुन्हा दाखल करण्यात आला आहे.
- परमबीर सिंह यांचा कसून शोध सुरू -
सेवा नियमांचे उल्लंघन आणि भ्रष्टाचाराच्या आरोपाअंतर्गत राज्य सरकारने परमबीर सिंह यांची चौकशी सुरू केली आहे. मात्र, अद्यापही या नोटीस संदर्भात त्यांनी कोणतेही उत्तर दिले नाही. तसेच ते नेमके कुठे आहेत? याबाबत राज्य सरकारला कोणतीही माहिती नाही. मुंबईचे माजी पोलीस आयुक्त नेमके गेलेत कुठे याचा आता कसून शोध राज्य सरकारकडून घेण्यात येत आहे.
- केंद्रीय गृहमंत्रालयासोबत चर्चा सुरू
परमबीर सिंह देशाबाहेर गेले आहेत, अशा बातम्या बाहेर येत आहेत. या प्रकरणावर महाराष्ट्राचे गृहमंत्री दिलीप वळसे पाटील काही दिवसांपूर्वी म्हणाले होते की, या प्रकरणावर केंद्रीय गृह मंत्रालयाशी बोलणे सुरू असून, परमबीर सिंह यांचा शोध घेतला जात आहे. सिंह हे सरकारी अधिकारी असल्याने, जर त्यांना कुठेही जायचे असेल तर ते सरकारच्या परवानगीशिवाय जाऊ शकत नाही, असे असूनही, जर ते देशाबाहेर गेले असतील तर ही चांगली गोष्ट नाही. महाराष्ट्र सरकार त्यांना शोधत आहे. त्यानंतर काय करायचे ते ठरवले जाईल. त्यांच्याविरोधात विविध विभागीय कारवाई केली जाईल, परंतु सर्वात महत्त्वाची गोष्ट म्हणजे त्यांनी प्रथम आपल्या कर्तव्यावर परत यावे आणि उपस्थित केलेल्या प्रश्नांची उत्तरे द्यावीत, असेही गृहमंत्री वळसे पाटील म्हणाले होते.
12 ऑक्टोबरला चौकशीसाठी हजर राहणार-
मुंबई पोलिस गुन्हे शाखेने मुंबईचे माजी पोलिस आयुक्त परमबीर सिंह यांना नोटीस बजावली आहेत. खंडणी प्रकरणाच्या संदर्भात परमबीर सिंह यांना 12 ऑक्टोबर रोजी चौकशीसाठी उपस्थित राहण्याचे सांगण्यात आले आहे. हरियाणा येथील निवासस्थाना सोबतच मुंबईतील नीलिमा येथील परमबीर सिंग यांच्या निवासस्थानी नोटीस देण्यात आली आहे. गोरेगाव पोलीस स्टेशनमध्ये परमबीर सिंग, सचिन वाझे आणि इतरांविरोधात खंडणीचा गुन्हा दाखल करण्यात आला आहे. त्याचा तपास मुंबई गुन्हे शाखेकडे सोपवण्यात आला आहे. मात्र परमवीर सिंग मुंबई पोलिस गुन्हे शाखेला चौकशीसाठी सहकार्य करत नसल्याने त्यांना 12 ऑक्टोबरला चौकशीसाठी उपस्थित राहण्यासाठी नोटीस बजावलेली आहे. खंडणी प्रकरणात परमवीर सिंग यांच्याविरुद्ध कलम 384, 385, 388, 389, 420, 364 ए, 34 ,120 बी अंतर्गत गुन्हा दाखल आहे. परमबीर सिंग व्यतिरिक्त संजय पुनमिया, सुनील जैन, मनोज घोटकर आणि पराग मणेरे यांचीही नावे आहेत.
खंडणी प्रकारण काय आहे?
तत्कालीन ठाणे पोलीस आयुक्त परमबीर सिंह यांच्या कार्यकाळात यूएलसी घोटाळ्याप्रकरणी एका बांधकाम व्यावसायिकाला ठाणे पोलिसांनी अटक केली होती. त्या बांधकाम व्यावसायिकाच्या विरोधात मोक्का कायद्यांतर्गत कारवाई होणार होती. मात्र, मोक्का अंतर्गत कारवाई टाळण्यासाठी परमबीर सिंह, ठाणे गुन्हे अन्वेषण शाखेचे तत्कालीन उपायुक्त पराग मणेरे, सुनील जैन, संजय पुनामिया, मनोज घोटेकर यांनी ४ कोटी ६८ लाख रुपयांची खंडणी उकळल्याचा आरोप या बांधकाम व्यावसायिकाच्या नातेवाईकाने केल्यानंतर याप्रकरणी कोपरी पोलीस ठाण्यात गुन्हा दाखल करण्यात आला होता. आता हे प्रकरण मुंबई पोलीस गुन्हे शाखेकडे वर्ग करण्यात आलेला आहे.
हेही वाचा - phone tapping case : सीबीआय संचालक सुबोध जयस्वाल यांना मुंबई पोलिसांचे समन्स
