मुंबई - मागील दोन दिवसांपासून शिवसेना नेते संजय राऊत यांनी भाजपाविरोधात आक्रमक भूमिका घेतली आहे. आज पुन्हा त्यांनी किरीट सोमैया ( Sanjay Raut on kirit somaiya ) यांच्यावर 400 कोटींच्या वसूलीचा आरोप केला आहे. तसेच देवेंद्र फडणवीसांवर ( Sanjay Raut on Devendra Fadnavis ) विश्वास असल्याचं आज पत्रकारांशी संवाद साधताना संजय राऊत यांनी बोलून दाखवलं. किरीट सोमैया यांनी मुंबईत पुर्नवसनाच्या नावाखाली 300 ते 400 कोटींची वसूली केली असल्याचा आरोप संजय राऊत यांनी केला आहे. या प्रकरणी मुख्यमंत्री आणि आर्थिक गुन्हे अन्वेषण विभागाकडे तक्रार करणार असल्याचे राऊत यांनी सांगितले.
पवईतील आयआयटीच्या जमिनीवर अतिक्रमण झाले असून सोमय्या यांनी यातून कोट्यवधीचा मलिदा लटला असा आरोप राऊत यांनी केला आहे. गुन्हे शाखेकडून चौकशी करण्याची मागणी करणार असल्याचे संजय राऊत यांनी सांगितले.
पुनर्वसनाच्या नावाखाली खंडणी वसुली
पवईतील पेरूबाग येथील पुनर्वसनाच्या नावाखाली तीनशे ते चारशे कोटींचा घोटाळा झाला आहे. या घोटाळ्यात खंडणी वसुली करत सोमैयांनी कोट्यवधीचा मलिदा जमा केला आहे. सोमैयांविरोधात सुमारे 211 प्रकरणं आहेत. देवेंद्र फडणवीस मुख्यमंत्री असताना त्यांच्या नावावर खोट्या स्वाक्षऱ्या करून कोट्यवधी रुपये वसूल केले आहेत. एवढा मोठा घोटाळा आहे की आम्हाला मोजायला अवघड जाते, असे राऊत म्हणाले.
तुम्हालाही उघडे पाडू
सोमैया आणि भाजपाच्या लोकांनी वसुलीसाठी दोन एजंट लावले होते. कुणा कुणाकडून पन्नास लाख घेतले? कुठे गेले पैसे ? असा सवाल राऊत यांनी उपस्थित केला. सोमैया फडणवीसांना पन्नास कोटी देणार, असे लोकांना सांगत होते. फडणवीसांच्या नावे खंडणी वसुली केली. त्यावर मंत्र्यांच्या खोट्या स्वाक्षऱ्या केल्याचा आरोप राऊत यांनी करताना घोटाळ्याची कागदपत्रे आयटी ऑफिसला देणार असल्याचे सांगितले.
तसेच, हा सगळा गैरव्यवहार मुख्यमंत्र्यांकडे कागदपत्रांसहित पाठवून याची चौकशी करावी, अशी मागणी करणार आहे. केंद्रीय गृहमंत्री अमित शाहांच्या नावे खंडणी वसुली केली. दोघांनाही या प्रकरणाची माहिती नसेल. परंतु, सोमैयांची एक एक भ्रष्टाचाराचे प्रकरण बाहेर काढणार असल्याचा इशारा देत, भाजपाच्या नेत्यांनी किरीट सोमैयांच्या प्रकरणात बोलून नये, अन्यथा तुम्हालाही उघडे पाडू. भाजपाच्या सत्ताकाळात महाआयटी घोटाळा झाला होता. सुमारे 25 हजार कोटींचा घोटाळा असून, या घोटाळ्यातील प्रमुख आरोपी अमोल काळे देशाबाहेर पळून गेल्याचा संशय संजय राऊत यांनी व्यक्त केला.
हेही वाचा - Manmohan Singh : 'कमी बोललो, काम जास्त केले'; माजी पंतप्रधान मनमोहन सिंग यांचा मोदींवर हल्लाबोल
