मुंबई - शिवसेनेने सेक्युलर पक्षांचा हात पकडल्यानंतर हिंदुत्वाची पोकळी भरून काढण्यासाठी राज ठाकरे यांच्या महाराष्ट्र नवनिर्माण सेनेने आपल्या पक्षाचे रूपडे बदलले होते. आता राज ठाकरे 1 ते 9 मार्चदरम्यान अयोध्येला जाणार असल्याची माहिती मनसे नेते बाळा नांदगावकर यांनी दिली आहे. आगामी निवडणुकांच्या तयारीबाबत मनसे सक्रिय झाली आहे. आज मुंबईत राज्यव्यापी बैठकीचे आयोजन करण्यात आले होते. या बैठकीला राज ठाकरे, अमित ठाकरे, अनिल शिदोरे आणि इतर प्रमुख नेत्यांची उपस्थिती होती. यावेळी नांदगावकर यांनी पत्रकार परिषदेत घेत ही माहिती दिली.
आजच्या बैठकीला पक्षातील सर्व प्रमुख नेत्यांची उपस्थिती होती. लोकसभानिहाय मतदारसंघाचा आढावा घेऊन वरिष्ठ नेते राज ठाकरे यांना अहवाल देणार आहेत. महाराष्ट्र नवनिर्माण सेनेने पक्षाच्या वर्धापन दिनाच्या निमित्ताने मेगा प्लॅन तयार केला आहे. या पार्श्वभूमीवर विविध कार्यक्रमांचे आयोजन करण्याचे आदेश देखील कार्यकर्त्यांना देण्यात येणार आहेत. अशी माहिती यावेळी बाळा नांदगावकर यांनी दिली.
२७ फेब्रुवारीला स्वाक्षरी मोहीम
२७ फेब्रुवारीला मराठी भाषा दिवस आहे, हा दिवशी उत्सव म्हणून साजरा करण्यात येणार आहे. या दिवशी विविध ठिकाणी मराठी स्वाक्षरीची मोहीम घेण्यात येणार आहे. मुंबई आणि ठाणे जिल्ह्यात काही ठिकाणी मनसे प्रमुख राज ठाकरे स्वत: या मोहीमेला उपस्थीत राहणार आहेत. यावेळी मराठी शिक्षकांचा सन्मान करण्यात येणार आहे. तसेच मराठी खेळाडू, साहित्यत, लेखक, कलावंत यांचा देखील यावेळी सन्मान करण्यात येणार असल्याचे नांदगावकर म्हणाले.
गटाध्यक्षाची नवी ओळख
9 मार्चला मनसेला वर्धापन दिन आहे, मात्र त्यानंतर अवघ्या काही दिवसांतच निवडणुका होणार असल्याने या पार्श्वभूमीवर ९ फेब्रुवारी ते १२ एप्रिलपर्यंत महाराष्ट्र सैनिकांची सदस्य नोंदणी करून ओळखपत्र देणार आहोत. यापूर्वी असलेल्या गटाध्यक्षना नवीन ओळख देण्यात येणार आहे. त्यांना आता राजदूत म्हणून संबोधण्यात येणार आहे. बाहेर राज्यातील लोक जे या राज्यासाठी योगदान देत आहेत, त्यांना मुंबईरक्षक, पुणेरक्षक म्हणून राज ठाकरे यांच्या स्वाक्षरीचे ओळखपत्र देणार आहोत असेही नांदगावकर यांनी सांगितले.
मनसेची राज्यस्तरीय कोअर कमिटी
आगामी महापालिकेच्या निवडणुकीसाठी मनसे पुन्हा एकदा जोरात तयारीला लागली आहे. या निवडणुकीच्या पार्श्वभूमीवर राज्यस्तरीय कोअर कमिटीची स्थापना देखील करण्यात येणार आहे. मनसेची राज्यस्तरीय कोअर कमिटी तयार करुन, निवडणुकांची रणनीती आखली जाणार आहे. दरम्यान कर्नाटक महाराष्ट्र सीमा वादावर मनसे नेते बाळा नांदगावकर यांची प्रतिक्रिया विचारले असता हे प्रकरण सध्या न्यायप्रविष्ट आहे, यामुळे याबाबत जास्त काही बोलता येणार नाही असे त्यांनी सांगितले.
