'ईटीव्ही भारत' विशेष - आतापर्यंत केवळ ७ लाख ३८ हजार ७१३ मुंबईकरांनाच कोरोना लसीचा दुसरा डोस

मुंबईमध्ये गेले वर्षभर कोरोनाचा प्रसार आहे. हा प्रसार कमी करण्यासाठी लसीकरण केले जात आहे. या लसीकरणादरम्यान गेल्या चार महिन्यांत मुंबईमध्ये ३० लाख लसीचे डोस देण्यात आले आहेत. मात्र त्यापैकी ७ लाख ३८ हजार ७१३ नागरिकांनाच लसीचा दुसरा डोस देण्यात आले आहे. यामुळे सुमारे १ कोटी ३० लाख मुंबईकर नागरिकांपैकी फक्त ७ लाख ३८ हजार जणांनाच कोरोनापासून सुरक्षीत करण्यात मुंबई महापालिकेला यश आले आहे.

मुंबई - मुंबईमध्ये गेले वर्षभर कोरोनाचा प्रसार आहे. हा प्रसार कमी करण्यासाठी लसीकरण केले जात आहे. या लसीकरणादरम्यान गेल्या चार महिन्यांत मुंबईमध्ये ३० लाख लसीचे डोस देण्यात आले आहेत. मात्र त्यापैकी ७ लाख ३८ हजार ७१३ नागरिकांनाच लसीचा दुसरा डोस देण्यात आले आहे. यामुळे सुमारे १ कोटी ३० लाख मुंबईकर नागरिकांपैकी फक्त ७ लाख ३८ हजार जणांनाच कोरोनापासून सुरक्षीत करण्यात मुंबई महापालिकेला यश आले आहे.

७ लाख ३८ हजार नागरिकच सुरक्षीत

मुंबईत १६ जानेवारीपासून कोरोना लसीकरण मोहीम सुरु आहे. या मोहिमेदरम्यान केंद्र सरकारने मान्यता दिलेल्या कोव्हिशिल्ड आणि कोव्हॅक्सिन या दोन लसी नागरिकांना दिल्या जात आहेत. प्रत्येक नागरिकांना लसीचे दोन डोस दिले जात आहेत. लसीचे दोन डोस दिल्यावर नागरिकांना कोरोनाची लागण होण्याचा धोका कमी असल्याचे सांगण्यात आले आहे. यानुसार मुंबईमध्ये आतापर्यंत एकूण ३० लाख १४ हजार ७४३ लाभार्थ्यांना लस देण्यात आली आहे. त्यापैकी २२ लाख ७६ हजार ३० लाभार्थ्यांना पहिला, तर ७ लाख ३८ हजार ७१३ लाभार्थ्यांना दुसरा डोस देण्यात आला आहे. याचाच अर्थ मुंबईमधील १ कोटी ३० लाख नागरिकांपैकी फक्त ७ लाख ३८ हजार ७१३ जणांनाच कोरोनापासून सुरक्षीत करण्यात महापालिकेला यश आले आहे.

लसीचा तुटवडा, ग्लोबल टेंडर

मुंबईत १६ जानेवारीपासून लसीकरण सुरु आहे. या लसीकरणादरम्यान पालिकेने लसीचा पुरवठा किती होणार याकडे लक्ष न देता, हवी तशी खासगी लसीकरण केंद्रांना मंजुरी दिली. तसेच महापालिकेने देखील लसीकरण केंद्रे सुरू केली. याचा परिणाम म्हणून नागरिकांनी लसीकरणाला प्रचंड प्रतिसाद दिला. दिवसाला ४० ते ५० हजार लाभार्थ्यांना लस दिली जात होती. मात्र मागणी एवढे लसीचे उत्पादन होत नसल्याने, लसीचा तुटवडा जाणवू लागला. लसीचा तुटवडा असल्यामुळे अनेक लसीकरण केंद्रे बंद ठेवण्याची वेळ महापालिकेवर आली. लसीचा तुटवडा जाणवत असल्याने पालिकेने १ कोटी लसीसाठी ग्लोबल टेंडर मागवले आहे. त्याला दोन वेळा मुदतवाढ दिली असून, ८ पुरवठादारांनी प्रतिसाद दिला आहे.

30 लाख 14 हजार 743 लाभार्थ्यांना लस

मुंबईत आतापर्यंत एकूण 30 लाख 14 हजार 743 लाभार्थ्यांना लस देण्यात आली, त्यात 22 लाख 76 हजार 30 लाभार्थ्यांना पहिला, तर 7 लाख 38 हजार 713 लाभार्थ्यांना दुसरा डोस देण्यात आला आहे. आतापर्यंत आरोग्य कर्मचाऱ्यांना 3 लाख 1 हजार 347, फ्रंटलाईन वर्कर 3 लाख 59 हजार 150, जेष्ठ नागरिक 11 लाख 89 हजार 999, 45 ते 59 वर्षांमधील नागरिकांना 10 लाख 65 हजार 41 तर 18 ते 44 वर्षांमधील नागरिकांना 99 हजार 206 लसीचे डोस देण्यात आले आहेत.

'मोबाईलवर संदेश आला असेल, तरच लसीकरणाला या'

मुंबईत कोरोनाचा प्रसार रोखण्यासाठी 16 जानेवारीपासून कोरोना लसीकरणाला सुरुवात झाली. सुरुवातीला आरोग्य कर्मचारी व फ्रंटलाईन वर्कर यांना लस दिली जात होती. 1 मार्चपासून 60 वर्षांवरील वयोवृद्ध तसेच 45 ते 59 वर्षांमधील विविध गंभीर आजार असलेल्या नागरिकांना लस दिली जात आहे. 1 मे पासून 18 ते 45 वर्षांमधील लाभार्थ्यांचे लसीकरण सुरू झाले आहे. सोमवार ते बुधवार जेष्ठ नागरिक तसेच दिव्यांग यांचे लसीकरण केले जाणार आहे. तर गुरुवार ते शनिवारपर्यंत कोविन ऍपवर नोंदणी करून मोबाईलवर संदेश आला असेल, तरच लसीकरणाला या असे आवाहन पालिकेने केले आहे. स्तनदा माता आणि गरोदर महिलांचेही लसीकरण केले जाणार आहे.

लसीचा पुरवठा झाल्यावर लसीकरण शक्य

मुंबईमध्ये लसीकरणाला चांगला प्रतिसाद मिळत आहे. पालिका आणि सरकारी रुग्णालयात लसीकरण सुरु आहे. दिवसाला ३० हजारांच्या आसपास लसीकरण केले जात आहे. लसीचा तुटवडा असल्याने लसीकरणात अडचणी येत आहेत. लसीचा पुरवठा झाल्यास लसीकरण करणे शक्य आहे. सध्या दुसरा डोस घेणाऱ्यांना प्राधान्य दिले जात आहे. पालिकेने ग्लोबल टेंडर मागवले असून, त्याला प्रतिसादही मिळाला आहे. लवकरच लस उपलब्ध होऊन नागरिकांचे लसीकरण केले जाईल, अशी माहिती पालिकेच्या आरोग्य विभागाने दिली.

एकूण लसीकरण -

आरोग्य कर्मचारी - 3,01,347
फ्रंटलाईन वर्कर - 3,59,150
जेष्ठ नागरिक - 11,89,999
45 ते 59 वय - 10,65,041
18 तर 44 वय - 99,206
एकूण - 30,14,743