चंद्रकांत पाटील हे नागालॅंडचे राज्यपाल होणार असल्याचे मी ऐकले आहे; संजय राऊतांचा टोला

चंद्रकांत पाटील हे राजकीय विरोधक जरी असले, तरी ते आमच्या सर्वांचे चांगले मित्र आहेत. आमच्या त्यांना कायम सदिच्छा आहेत, अशी प्रतिक्रिया संजय राऊत यांनी दिली आहे.

मुंबई - भाजपा नेते चंद्रकांत पाटील यांनी काल 'मला माजी मंत्री म्हणू नका', असे वक्तव्य केले होते. त्यांच्या या वक्तव्यावर शिवसेना नेते संजय राऊत यांनी प्रतिक्रिया दिली आहे. 'चंद्रकांत पाटील हे राजकीय विरोधक जरी असले, तरी ते आमच्या सर्वांचे चांगले मित्र आहेत. आमच्या त्यांना कायम सदिच्छा आहेत, काल ते म्हणाले 'मला माजी मंत्री म्हणू नका', ही माजी म्हणून घ्यायची वेदना मी समजू शकतो, पण मी त्यांना निरोप पाठवला आहे, की पुढील पंचवीस वर्ष तुम्हाला माजी म्हणूनच राहावे लागेल, उद्धवजींच्या नेतृत्वाखाली आम्ही हे सरकार किमान पंचवीस वर्षे चालवू, त्यामुळे पंचवीस वर्ष मनाची तयारी ठेवा, ते जर स्वप्न पाहत असतील तर त्यांना बघू द्या, अजून तरी स्वप्नावर कोणताही टॅक्स लावलेला नाही, असे म्हटले. तसेच चंद्रकांत पाटील हे नागालॅंडचे राज्यपाल होणार असल्याची मला मिळाली, असा खोचक टोलाही त्यांनी यावेळी लगावला.

इंधन दरवाढीवरून मोंदींना टोला -

आज पंतप्रधान नरेंद्र मोदींच्या वाढदिवसानिमित्त शिवसेना नेते संजय राऊत यांनी त्यांना शुभेच्छा दिला आहेत. नरेंद्र मोदींच्या कार्यपद्धतीबद्दल मतभेद असले तरी त्यांच्या तोडीचा दुसरा नेता देशात नाही, असे संजय राऊत यांनी म्हटले. तसेच देशातल्या महागाईविरोधात जनतेच्या तीव्र भावना आहेत. त्यामुळे मोदीजी पेट्रोल-डिझेलचे भाव कमी करुन जनतेला बर्थडे गिफ्ट देतील, अशा खोचक टोलाही संजय राऊत यांनी नरेंद्र मोदी यांना लगावला आहे.

सोनू सूदवरील कारवाईमागे ही पार्श्वभूमी -

सोनू सूद विषयी पक्षाची भूमिका असण्याचे कारण नाही. मात्र, गेल्या वेळी याच सोनू सुदने अनेक प्रवासी मजुरांसाठी गाड्या, विमान बुक केली होती. त्यावेळी भाजपाने आम्हाला सांगितलेले, की एकटा माणूस काय करू शकतो, मात्र सरकार म्हणून आम्ही काही करत नाही. मात्र, काल मला समजले, केजरीवाल सरकारच्या एका शैक्षणिक धोरणाविषयीचे काम सोनूने घेतल्यावर या सरकारचा सोनू सूद दुश्मन झाला. ज्याने कर चुकला आहे, त्यावर कारवाई व्हायला पाहिजे. मात्र, त्यामागे ही पार्श्वभूमी असल्याचे मला आता लक्षात आले, असेही ते म्हणाले.

मोदींना वाढदिवसानिमित्त दिल्या शुभेच्छा -

नरेंद्र मोदी हे देशाचे मोठे नेते आहेत. अनेक वर्षापासून ते देशाचे नेतृत्त्व करत आहेत. त्यांच्या संघर्षाचा काळ आम्ही पाहिला आहे. मोदींच्या काळात देशाला राजकीय स्थैर्य लाभले आहे. भाजपा नेहमीच आघाड्या बनवून सत्तेत होते. मात्र, मोदींच्या काळात एक हाती सत्ता बनवू शकले, ही मोदींच्या नेतृत्त्वाची आणि लोकप्रियतेची कमाल आहे. हे मान्य करायला हवे, त्यांना उदंड आयुष्य लाभो अशा शुभेच्छा देतो, असेही संजय राऊत म्हणाले.

हेही वाचा - मोदीजी त्यांच्या वाढदिवसाला पेट्रोल-डीझेल स्वस्त करून 'बर्थडे गिफ्ट' देतील - संजय राऊत