मुंबई- मुख्यमंत्री उद्धव ठाकरे यांच्या पत्नी रश्मी ठाकरेंचे भाऊ श्रीधर पाटणकर ( Uddhav Thackeray Brother In Law Shridhar Patankar ) यांच्या ठाण्यातील 11 फ्लॅट साधारणता 6 कोटी रुपयांची मालमत्ता ईडीने जप्त केल्यानंतर आता श्रीधर पाटणकर यांची ईडीकडून चौकशी होण्याची शक्यता ( Shridhar Patankar ED Enquiry ) आहे. श्रीधर पाटणकर यांना विनातारण कर्ज देणारा कथित हवाला ऑपरेटर नंदकिशोर चतुर्वेदी फरार असून, त्याच्या शोधात ईडी लागली आहे. मात्र, आता ईडी श्रीधर पाटणकर यांना चौकशीला कार्यालयात बोलवण्यासाठी समन्स देखील जारी करणार असल्याची माहिती सूत्रांकडून मिळाली ( ED Summons Shridhar Patankar ) आहे. त्यामुळे श्रीधर पाटणकर यांच्या अडचणी वाढण्याची शक्यता आहे.
शिवसेना विरुद्ध ईडी : मुख्यमंत्री उद्धव ठाकरे यांचे मेव्हणे श्रीधर पाटणकर यांची ईडीने संपत्ती जप्त केल्यानंतर महाराष्ट्रातील राजकारण पुन्हा तापले आहे. पुन्हा एकदा महाराष्ट्र सरकार विरुद्ध केंद्रीय यंत्रणा हा सामना रंगला आहे. यावेळी केंद्रीय यंत्रणेने हे मातोश्रीचे संबंधित व्यक्तीवर कारवाई केल्याने हा उद्धव ठाकरे यांना मोठा धक्का मानला जात आहे. आता श्रीधर पाटणकर यांना चौकशी करिता समन्स देखील जारी करण्यात येणार असून, त्यांची चौकशी करण्याकरता कार्यालयात बोलावण्यात येणार आहे. अशी माहिती सूत्रांकडून मिळाली आहे. त्यामुळे पुन्हा एकदा शिवसेना विरुद्ध ईडी सामना रंगणार आहे.
११ सदनिका केल्या आहेत जप्त : पुष्पक ग्रुप ऑफ कंपनीतील पुष्पक बुलियन विरोधात दाखल असलेल्या गुन्ह्याच्या तपासासाठी ईडीकडून चतुर्वेदीचा शोध सुरू आहे. चतुर्वेदीने हमसफर डिलर प्रा. लि. कंपनी या बनावट कंपनीच्या माध्यमातून 30 कोटी रुपयांचे विनातारण कर्ज पाटणकरांच्या श्री साईबाबा गृहनिर्मिती प्रा. लि. कंपनीत वळते केले. चतुर्वेदीशी संगनमत करून हा पैसा महेश पटेल याने लाटला आणि तो श्री साईबाबा गृहनिर्मिती प्रा. लि. कंपनीच्या बांधकाम प्रकल्पात गुंतविण्यात आला. ईडीने पाटणकर यांच्या निलांबरी प्रकल्पातील 11 सदनिका जप्त केल्या आहेत.
चर्तुर्ववेदीच्या अनेक बनावट कंपन्या : ईडीच्या सूत्रांकडून मिळालेल्या माहितीनुसार चतुर्वेदी व्यवसायाने सीए आहे. मात्र, कोणतीही सीए फर्म चालवत नाहीत. तो बनावट कंपन्या चालवितो. चतुर्वेदी याच्या एकाच पत्त्यावर दहापेक्षा अधिक बनावट कंपन्यांची नोंदणी तपास यंत्रणेला आढळली आहे. मुंबईसह कोलकाता आणि दिल्ली अशा विविध ठिकाणी बनावट कंपन्यांची स्थापना करून त्यांच्या माध्यमातून 15 ते 20 वर्षांपासून काळा पैसा पांढरा करण्याचे काम करत असल्याचे बोलले जाते.
चतुर्वेदी विदेशात फरार? चतुर्वेदी यांच्या वांद्रे-कुर्ला संकुलातील एका भूखंडाच्या व्यवहाराचीही मार्च 2021 पासून ईडी आणि प्राप्तीकर खात्याकडून चौकशी सुरू आहे. मे 2021 पासून ते आफ्रिकेतील एका देशात वास्तव्यास असल्याची सूत्रांची माहिती असून ते श्रीधर पाटणकर यांना 2009 पासून ओळखत आहेत. त्यामुळेच ईडीला चतुर्वेदी यांच्याकडे चौकशी करायची आहे. नंदकिशोर चतुर्वेदी हे 24 हून अधिक कंपन्यांमध्ये संचालक म्हणून काम करत आहेत. यातील बहुतेक कंपन्या या बनावट असल्याचा संशय आहे. चतुर्वेदी विदेशात पसार झाल्याची शक्यता वर्तविण्यात येत आहे. तो गेल्या काही महिन्यांपासून आफ्रिकेत असल्याची माहिती समोर येत आहे. याबाबतही ईडीकडून तपास सुरू आहे.
काय आहे प्रकरण? श्रीधर पाटणकर हे मुख्यमंत्री उद्धव ठाकरेंची पत्नी रश्मी ठाकरे यांचे बंधू आहेत. ते साईबाबा गृहनिर्मिती प्रायव्हेट लिमिटेडचे मालक असून या कंपनीच्या मालकीच्या 11 सदनिका जप्त करण्यात आल्यात. हमसफर डिलरनं पाटणकरांच्या कंपनीला 30 कोटी कर्ज दिले होते. मात्र हमसफर ही कंपनी बनावट असल्याचं ईडीचा आरोप आहे. नंदकिशोर चर्तुवेदी यांची हमसफर कंपनी आहे. त्यांच्याकडून पाटणकरांच्या कंपनीनं विनातारण कर्ज घेतले. नंदकिशोर चतुर्वेदी आणि महेश पटेल यांनी पाटणकरांच्या कंपनीत पैसे दिले. या पैशातूनच ठाण्यात निलांबरी प्रोजेक्टचं बांधकाम करण्यात आले. नंदकिशोर चतुर्वेदी आणि महेश पटेल यांच्यावर मनी लॉन्ड्रिंगचा आरोप आहे. 2017 त्यांच्यावर गुन्हा दाखल झाला आहे.
