मुंबई - अंडरवर्ल्ड डॉन अरुण गवळीच्या मुलीने आमदार बनण्याचा निर्णय घेतला असून, आज त्या भायखळा मतदारसंघातून उमेदवारी अर्ज भरणार आहेत. गीता गवळी यांच्यासमोर एमआयएमचे वारिस पठाण, समाजवादी पक्षाचे रईस शेख तसेच शिवसेनेच्या यामिनी जाधव यांचे आवाहन असणार आहे. याआधी अरुण गवळी देखील याच मतदारसंघातून विजयी झाले होते.
गीता गवळी या अखिल भारतीय सेनेच्या नगरसेविका आहेत. त्यांनी 2017 च्या महापालिका निवडणुकीत भाजपला पाठिंबा दिला होता. त्यांना भाजपकडून भायखळा विधानसभा मतदारसंघातून उमेदवारी दिली जाणार होती. मात्र, शिवसेना आणि भाजपच्या युतीमुळे ही जागा सेनेचे स्थायी समिती अध्यक्ष यशवंत जाधव यांच्या पत्नी यामिनी जाधव यांना देण्यात आली आहे.
या मतदारसंघातून एमआयएमचे वारिस पठाण हे 2014 मध्ये विधानसभेला निवडून आले होते. पठाण यंदाही निवडणुकीच्या रिंगणात आहेत. पालिकेतील समाजवादी पक्षाचे गटनेते रईस शेख हे देखील याच मतदारसंघातून निवडणूक लढवत आहेत.
