कोल्हापूर : राष्ट्रवादी काँग्रेसचे सर्वेसर्वा शरद पवार यांच्या घरावर काल काही एसटी कर्मचाऱ्यांनी हल्ला केला. मात्र, हा हल्ला म्हणजे एसटी कर्मचाऱ्यांचा रोष होता, असे आमदार सदाभाऊ खोत यांनी म्हटले आहे. गेली पाच महिन्यापासून हे आंदोलन सुरू आहे. मात्र या पाच महिन्यात महाविकास आघाडी सरकारने नुसता वेळकाढूपणा केल्याचे त्यांनी म्हटले आहे. जर लागलीच त्यावर काहीतरी निर्णय किंवा तोडगा निघाला असता तर, आज एसटी कर्मचाऱ्यांवर ही वेळ आली नसती शरद पवार यांच्या घरावर हल्ला करणे हे निषेधार्य आहेच. आम्ही या गोष्टीचे समर्थन करत नाही. मात्र एसटी कर्मचाऱ्यांनी देखील न्यायालयावर विश्वास ठेवून त्यांनी दिलेला निर्णय हा मान्य करायला हवा होता, असे ते म्हणाले आहेत. तसेच हे आंदोलन आता भरकटलेलं असून, आंदोलनास कोणतीही दिशा राहिलेली नाही. याचं नेतृत्व करणारे देखील त्यांना भडकवत असल्याची टीका सदाभाऊ खोत यांनी गुणरत्न सदावर्ते यांच्यावर केली आहे. ते आज कोल्हापुरात बोलत होते.
एस टी कर्मचाऱ्यांचे आंदोलन दिशाहीन : २६ ऑक्टोंबर २०२१ पासून एसटी कर्मचारी आंदोलनावर गेले आहेत. राज्यशासनात विलीनीकरण ही त्यांची प्रमुख मागणी धरून गेली 5 ते 6 महिने कर्मचारी मुंबईत आझाद मैदानावर आंदोलन करत आहेत. मात्र काल अचानकपणे एसटी कर्मचाऱ्यांनी शरद पवारांच्या सिल्वर ओक या निवासस्थानावर हल्ला केला. हे योग्य नाही. याचं आम्ही समर्थन करत नाही, असे सदाभाऊ खोत यांनी म्हटले आहे. तसेच राज्य सरकारवर टीका देखील केली आहे. ते म्हणाले, गेल्या 5 महिन्यापासून एसटी कर्मचाऱ्यांचे आंदोलन सुरू आहे. मात्र याकडे सरकारने दुर्लक्ष केले. यामुळे एसटी कर्मचाऱ्यांनी काल आपला रोष व्यक्त केला आहे. जर सरकारने अगोदरच योग्य मार्ग काढून पुढील दिशा कर्मचाऱ्यांना सांगितले असती तर, ही वेळ आली नसती. तसेच सध्या सुरू असलेले आंदोलन दिशाहीन असल्याचे त्याने म्हटले आहे. त्याचे नेतृत्व करणार्‍या कर्मचार्‍यांना भडकवत असल्याचे त्यांनी म्हटले आहे. एसटी कर्मचाऱ्यांनी ऐकायला हवे, असे आवाहन त्यांनी कर्मचाऱ्यांना केले आहे.
सरकार गेली पाच महिने झोपली होती का : पहिल्या टप्प्यात भाजप एसटी कर्मचाऱ्यां सोबत असताना देवेंद्र फडणवीस यांनी वेळोवेळी मार्गदर्शन हे गोपीचंद पडळकर आणि सदाभाऊ खोत यांना केलं. मात्र यावेळी महाविकास आघाडी सरकारने मात्र आमच्यावर एसटी कर्मचाऱ्यांची डोकी भडकवत असल्याचा आरोप केला. मात्र यानंतर आम्ही या आंदोलनातून बाजूला झालो. मग गेली पाच महिने सरकार झोपा काढत होती का? यांनी निर्णय का घेतला नाही? एसटी कर्मचाऱ्यांवर तोडगा तुम्हाला का काढता आला नाही? तुमच्या अपयशाचं खापर सर्व आता भारतीय जनता पक्षावर फोडत आहात का? असा सवाल सदाभाऊ खोत यांनी विचारला आहे.
