औरंगाबाद - सर्वत्र लोकसभा निवडणुकीची रणधुमाळी पाहायला मिळत आहे. प्रचारात मोठी मोठी आश्वासने ही प्रत्येक उमेदवारांकडून दिली जातात. कोणत्या राजकीय पक्षाला किती मते मिळणार याची चर्चा रंगत आहे. मात्र, दुसरीकडे दुष्काळग्रस्त भागात पाणी कधी मिळणार याचे उत्तर मात्र कोणाकडे नाही. ऐन दुष्काळात लोकांना पाण्याचा टँकर कधी येणार हा प्रश्न पडलाय?
जिल्ह्यातील पैठणच्या बाळापुर गावात उन्हात महिला आणि मुलांना पाण्यासाठी वणवण फिरण्याची वेळ आली आहे. या गावात २ टँकर मंजूर आहेत. १ किंवा २ दिवसांनंतर गावकऱ्यांना पाणी मिळणे अपेक्षित आहे. मात्र तसे होत नाही. त्यामुळे गावकऱ्यांना पाण्यासाठी वणवण फिरण्याची वेळ आली आहे. मिळेल तिथून पाणी आणण्यासाठी गावातील महिलांना ऐन उन्हात पायपीट करावी लागत आहे. पाणी कमी असल्याने टँकर मालकाकडे २ दिवस आधी नंबर लावावा लागतो. त्यामुळे टँकरने पाणी विकत घेण्याची वेळ नागरिकांवर आली आहे, असे गावकऱ्यांनी सांगितले आहे.
प्रशासनाने या गावांमध्ये टँकरची सोय केली आहे. मात्र, प्रत्यक्षात हे टँकर कधीच वेळेवर गावात पोहोचत नाही. नेमून दिलेले टँकर ८ ते १० दिवसांनी गावात येतात. त्यामुळे तहान भागवावी कशी? असा प्रश्न येथील लोकांना पडला आहे. उन्हात पाण्यासाठी वणवण फिरताना गावकऱ्यांच्या प्रकृतीवर देखील परिणाम होतोय. पिण्याच्या पाण्यासाठी वणवण फिरावे लागते. मात्र, थोडेफार पाणी मिळालं तरी जनावरांसाठी पाणी कोठून आणावे, असा प्रश्न या गावातील लोकांना पडला आहे.
याबाबत जिल्हाधिकारी उदय चौधरी यांनी दुष्काळ निवारणासाठी योग्य त्या उपाययोजना केल्याची माहिती दिली. औरंगाबाद जिल्ह्यात ८९४ टँकरद्वारे पाणीपुरवठा करण्यात येत आहे. टँकरने पाणीपुरवठा करण्यासाठी एमआयडीसीची मदत घेतली जाते. तर, वैजापूर तालुक्यातील गावांना नाशिक धरणातून सध्या पाणी देण्यात येते. काही प्रकल्प तात्पुरता योजना सुरू केल्या आहेत. त्यांना तत्वतः मान्यता मिळाल्याने गावांमध्ये पाणी पोहोचेल, अशी व्यवस्था करण्यात आली आहे. औरंगाबाद जिल्ह्यात ६ चारा छावण्यांना मान्यता देण्यात आली आहे. त्यातील काही चारा छावण्या या प्रत्यक्षात सुरू झाल्या आहेत. इतर उपयोजना देखील करण्यात येणार असून सध्या तरी कुठल्याही प्रकारची पाणीकपात केली जाणार नाही. जून महिन्यात पाण्याचा आढावा घेऊन पुढील निर्णय घेतला जाईल.
जिल्हा प्रशासनाने दुष्काळाच्या काळात अनेक उपाययोजना केल्याचा दावा केला आहे. मात्र, या उपाययोजना गावांमध्ये पोहोचतात का हा खरा प्रश्न आहे. निवडणुकीच्या काळात उमेदवारांचा प्रचार जोर धरत असला तरी, प्रचाराच्या रणधुमाळीत मराठवाडा अजून दुष्काळाशी सामना करतोय.
