नवी दिल्ली - क्रिप्टोचलनाने अर्थव्यवस्थेमधील वित्तीय स्थिरतेवर परिणाम होऊ शकतो, याची भारतीय रिझर्व्ह बँकेला चिंता आहे. त्याबाबतची माहिती सरकारला कळविण्यात आल्याचे आरबीआयचे गव्हर्नर शक्तिकांत दास यांनी सांगितले. ते एका माध्यमाला दिलेल्या मुलाखतीत बोलत होते.
आरबीआयचे माजी गव्हर्नर शक्तिकांत दास म्हणाले की, आम्हाला निश्चितच क्रिप्टोचलनाबाबत मोठी चिंता वाटत आहे. त्याबाबत आम्ही सरकारशी संवाद साधला आहे. त्याबाबत सरकार विचार करत आहे. केंद्र सरकार लवकरच निर्णय घेईल, अशी अपेक्षा आहे. जर आवश्यकता भासली तर संसदही त्यावर विचार करून निर्णय घेईल, असे दास यांनी स्पष्ट केले.
हेही वाचा-ट्विटरचे सीईओ जॅक डोर्सी यांची बिटकॉईनमध्ये १७० दशलक्ष डॉलरची गुंतवणूक
पुढे शक्तिकांत दास म्हणाले की, ब्लॉकचेन तंत्रज्ञान हे पूर्णपणे वेगळे आहे, हे मी स्पष्ट करू इच्छितो. ब्लॉकचेन तंत्रज्ञानाच्या फायद्यांचा गैरवापर घेतला जात आहे, ही एक दुसरी गोष्ट आहे. मात्र, आमच्या दृष्टीने वित्तीय स्थिरतेबाबत चिंता आहे.
आरबीआयचे असणार स्वतंत्र डिजीटल चलन-
केंद्रीय मध्यवर्ती बँकेचे डिजीटल चलन तयार करण्यासाठी प्रक्रिया सुरू आहे. त्यावर आरबीआय टीम काम करत आहे. लवकरच त्याचे लाँचिंग होणार आहे. दरम्यान, चीनच्या मध्यवर्ती बँकेनेही युआन हे इलेक्ट्रॉनिकच्या माध्यमात लाँच केले आहे. मात्र, कधी लाँच होईल, निश्चित करण्यात आले नाही. त्याकडे पूर्ण लक्ष देण्यात येत असल्याची दास यांनी माहिती दिली.
हेही वाचा-तांत्रिक अडचणीमुळे 'निफ्टी' शेअर बाजार ठप्प
दरम्यान, केंद्र सरकार अर्थसंकल्पीय अधिवेशनात क्रिप्टोचलनाबाबत विधेयक सादर करण्याचे नियोजन करत आहे. त्यामध्ये क्रिप्टोचलनासाठी नियम निश्चित करण्याचा समावेश असण्याची शक्यता आहे. यापूर्वीही आरबीआयने डिजीटल चलनाबाबत चिंता व्यक्त केली होती. कारण, क्रिप्टोचलनाचा वापर मनी लाँड्रिग आणि दहशतवाद्यांना आर्थिक मदत करण्यासाठी केला जात असल्याचे आढळले होते.
