मुंबई - पंजाब आणि महाराष्ट्र को-ऑपरेटिव्ह बँकेच्या घोटाळ्यातील आरोपी राकेश आणि सारंग वाधवान यांनी मालमत्ता विकून बँकेचे पैसे फेडण्याची तयारी दर्शविली आहे. त्यासाठी रोल्स राईस, विमान व यांत्रिकी बोट अशी आपली मालमत्ता विकावी, असे आरोपींनी भारतीय रिझर्व्ह बँकेसह तपास संस्थांना पत्र लिहिले आहे.
एचडीआयएलचे प्रवर्तक असलेले वाधवान पिता-पुत्र हे न्यायालयीन कोठडीत आहे. आरोपींनी ईडी, केंद्रीय वित्तीय मंत्रालय आणि आरबीआयला पत्र लिहून जप्त केलेल्या १८ मालमत्तांची विक्री करण्याची परवानगी मागितली आहे. हे पत्र वाधवानच्या प्रवक्त्याने जारी केले आहे.
मुंबई पोलिसाच्या आर्थिक गुन्हे शाखेच्या माहितीनुसार, पीएमसीमध्ये ४ हजार ३५५ कोटींचा घोटाळा केल्याच्या आरोपावरून वाधवान यांना अटक करण्यात आली आहे. ईडीने राकेश वाधवान याच्या मालकीच्या रोल्स राईस फँटम, बेंटली काँटिनेन्टल, बीएमब्ल्यू ७३० एलडी अशा आलिशान चारचाकी जप्त केल्या आहेत. तर सारंगच्या मालकीचे फाल्कन २००० विमान, ऑडी एजी, फेर्टी ८८१ ही यांत्रिकी बोट, दोन इलेक्ट्रिक कार, तीन क्वाड बाईक्स आणि ७ आसनी स्पीड बोट अशी मालमत्ता ईडीने जप्त केली आहे.
हेही वाचा-पीएमसीच्या खातेदारांसंदर्भात तातडीने सुनावणी घेण्यास सर्वोच्च न्यायालयाची संमती
मोठ्या प्रमाणात लोकहितासाठी मालमत्ता विकण्यात यावी, असे वाधवान पिता-पुत्राने पत्रात म्हटले आहे. यातून सध्याच्या परिस्थितीचे निराकरण करणे शक्य होईल, असे त्यांनी म्हटले आहे. एचडीआयएल ग्रुपच्या बुडित कर्जाची माहिती पीएमसी बँकेचे व्यवस्थापन व वाधवान यांनी लपविली. ही माहिती आरबीआयने केलेल्या तपासणीतून समोर आल्याचे आर्थिक गुन्हे शाखेने म्हटले आहे.
हेही वाचा- पीएमसी बँक घोटाळा : तणावात असलेल्या आणखी एका बँक खातेदाराचा मृत्यू
पीएमसी बँकेवर भारतीय रिझर्व्ह बँकेने (आरबीआय) निर्बंध लागू केले आहेत. त्यामुळे खातेदारांनी सहा महिन्यापर्यंत जास्तीत जास्त ४० हजार रुपये काढता येतात. बँकेच्या दोन खातेदारांचा तणावाच्या स्थितीत ह्रदय बंद पडून मृत्यू झाला आहे. तर बँकेत १ कोटी रुपयाची ठेव असलेल्या एका डॉक्टरने आत्महत्या केली आहे.
