नवी दिल्ली- एशियन डेव्हलपमेंट बँकेच्या (एडीबी) उपाध्यक्षपदी भारतीय निवडणूक आयोगाचे आयुक्त अशोक लवासा यांची निवड झाली आहे. लवासा यांच्याकडे खाजगी क्षेत्रातील कामे आणि सार्वजनिक खाजगी भागीदारी यांची जबाबदारी एडीबीने दिली आहे.
अशोक लवासा हे निवडणूक आयोगाचे आयुक्त म्हणून काम करत आहेत. यापूर्वी त्यांनी केंद्रीय वित्त आयोगाचे सचिव, केंद्रीय पर्यावरण मंत्रालयाचे सचिव, पर्यावरण आणि हवामान बदलाचे सचिव आणि केंद्रीय नागरी विमान वाहतूक मंत्रालयाच्या सचिव म्हणून काम केले आहे.
लवासा हे दिवाकर गुप्ता यांच्या जागी पदभार स्वीकारणार आहेत. दिवाकर गुप्ता यांचा कार्यकाळ 31 ऑगस्ट 2020 ला संपणार आहे.
अशोक लवासा यांनी ऑस्ट्रेलियाच्या दक्षिण क्रॉस विद्यापीठांमधून एमबीएची पदवी मिळवली आहे. तर मद्रास विद्यापीठांमधून संरक्षण शास्त्र एम फिल केले आहे.
लवासा यांनी दिल्ली विद्यापीठांमधून एम. ए. इंग्रजीचे शिक्षण घेतले आहे.
