ठाणे - कोरोनामुळे देशातील रुग्णांची संख्या वाढत असताना दिलासादायक वृत्त आहे. कोरोना झालेल्या एका कुटुंबातील तीन वर्षांच्या चिमुकलीने रोगावर मात केली आहे. कल्याण-डोबिंवली महापालिका क्षेत्रात कोरोना विषाणूच्या प्रादुर्भाव झालेले एकूण ५ रुग्ण आढळून आले आहेत. त्या सर्वांना कस्तुरबा रुग्णालय दाखल करून त्यांच्यावर उपचार करण्यात आले आहेत. त्या कुटुंबामधील चिमुकली ही ठणठणीत बरी झाली आहे.
चिमुकलीसह एका रुग्णाचा तपासणी अहवाल निगेटिव्ह आल्याने त्यांना घरी सोडण्यात आल्याची माहिती कल्याण डोंबिवली महापालिका वैद्यकिय आरोग्य अधिकाऱ्यांनी दिली आहे. तर कोरोना विषाणूचे संसर्ग झालेले रुग्ण असलेल्या परिसरात नियोजनाप्रमाणे कारवाई करण्यात येत आहे. त्यासाठी वैद्यकीय अधिकारी यांच्या नियंत्रणाखाली आरोग्य पथके स्थापन करण्यात आली आहेत.
विदेशामधून घरी आलेल्या नागरिकांना घरातच विलगीकरणाचा सल्ला-
सध्या जगभरात पसरलेल्या कोरोना विषाणूच्या प्रादुर्भाव रोखण्यासाठी सरकारने राज्यात अनेक प्रतिबंधात्मक उपाययोजना केल्या आहेत. कल्याण डोंबिवली महानगरपालिका क्षेत्रातही कोरोना आजाराच्या प्रादुर्भाव रोखण्यासाठी महापालिका नागरी आरोग्य केंद्रामार्फत विविध उपाययोजना राबविण्यात येत आहेत. पालिका हद्दीतील प्रत्येक नागरी आरोग्य केंद्रात आरोग्य पथके स्थापन केली आहेत. त्यात पोलीस कर्मचारी नियुक्त केलेले आहेत. हे पथक विदेशामधून आलेल्या नागरिकांना भेटी देऊन त्यांच्या स्वतः च्या घरी विलगीकरणात राहण्याचा सल्ला देत आहेत. तर यामध्ये सहकार्य न करणाऱ्या नागरिकांवर साथरोग प्रतिबंधक कायदा १८९७ अन्वये गुन्हा दाखल करण्यात येणार असल्याचे त्यांना सांगण्यात आले.
महापालिकेच्यावतीने क्वारंटाईन वॉर्डमध्ये २२ मार्चपासून विदेशामधून आलेल्या ९ नागरिकांना वेगळे ठेवण्यात आले आहे. त्यांची सर्व व्यवस्था महापालिकेमार्फत करण्यात येत आहे. तर बुधवारी पालिका हद्दीतील मांडा-टिटवाळा शहरातदेखील विदेशातून आलेले सुमारे २१ संशयित नागरिकांना घरातच विलगीकरणात ठेवण्यात आले आहे. त्यांच्यावर पालिकेच्या विशेष पथकाचे लक्ष आहे.
खासगी रुग्णालयांनी विलगीकरण कक्ष स्थापन करण्याचे आदेश-
दरम्यान, महापालिका आयुक्त डॉ. विजय सूर्यवंशी यांनी महापालिका क्षेत्रातील खाजगी रुग्णालयांना विलगीकरण कक्ष तयार करून व्हेंटिलेटरसहित सुसज्ज ठेवण्याचे आदेश दिले आहेत. ५० खाटांच्या रुग्णालयात १० खाटाचा विलगिकरण कक्ष स्थापन करण्याचे आदेश दिले आहेत. तर कल्याण डोंबिवली महानगरपालिका क्षेत्रात मध्य रेल्वेच्या रुग्णालयात १२ खाटांचे व महापालिकेच्या बाई रुक्मिणी बाई रुग्णालय आणि शास्त्रीनगर रुग्णालय येथे प्रत्येकी ५ खाटांचे विलगीकरण कक्ष तयार आहेत. महापालिकेच्या रुग्णालय व दवाखाने येथे आयएमए, एनआयएमए आणि कल्याण पूर्व मेडिकल आसोशिएशन या सर्वानी ७५ खाजगी वैद्यकीय व्यावसायिक सेवा देण्यास तयारी दाखवली आहे. त्यापैकी काहीं आदीपासूनच ओपडीची सेवा रुग्णांना देत आहेत.
हेही वाचा-चिंताजनक..! महाराष्ट्रात कोरोनाग्रस्तांचा आकडा 124, तर मृतांचा आकडा 4 वर
महापालिकेतर्फे कोरोना आजाराचा मुकाबला करण्यासाठी वॉर रूम स्थापन करण्यात आली आहे. या वॉररुम मार्फत (संपर्क क्र. ०२५१ २२११३७३) सर्व विभागाच्या समन्वयातून आपत्ती व्यवस्थापनाची कार्यवाही करण्यात येणार आहे.
हेही वाचा-डॉक्टर, पोलिसांवर हल्ले कराल तर खबरदार, अन्यथा लष्कराला पाचारण करावे लागेल
ठाणे जिल्ह्यात कोरोनाबाधीत रुग्णांच्या संख्येत दिवसेंदिवस वाढ-
ठाणे जिल्ह्यात कोरोनाबाधित रुग्णांच्या संख्येत वाढ होताना दिसत आहे. त्यातच बुधवारी ठाणे, कल्याण ग्रामीण आणि नवी मुंबईत प्रत्येकी एक असे तीन नवीन रुग्ण आढळून आले आहेत. त्यामुळे कोरोनाग्रस्तांची संख्या १४वर पोहोचली आहे. जिल्ह्यात आतापर्यंत पर्यटनासाठी अथवा काही कामानिमित्त विदेशात गेलेले व तेथून परतलेल्या ३ हजार १२३ नागरिकांना १४ दिवस डॉक्टरांच्या निगराणी खाली ठेवण्यात आले आहे. तर ७९ पर्यटकांमध्ये कोरोनाची लक्षणे आढळून आल्याने त्यांना मुंबईतील कस्तुरबा रुग्णालयात पाठविण्यात आले आहे. तर, १९० पर्यटकांनी निगराणीखालील १४ दिवसांचा कार्यकाळ पूर्ण केला असल्याची माहिती आरोग्य विभागाच्यावतीने देण्यात आली.
