हैदराबाद - तेलंगाणा राज्यात अंगावर काटा आणणारी एक घटना समोर आली आहे. बायको पळून गेल्यानंतर एका व्यक्तीच्या मनात महिलांबद्दल राग उत्पन्न झाला होता. या रागातून त्याने तब्बल १८ महिलांची हत्या केली. माईना रामूलू असे या सिरियल किलरचे नाव असून त्याच्यावर २१ गुन्हे दाखल आहेत. हैदराबाद पोलिसांनी या मोस्ट वॉन्टेंड किलरच्या मुसक्या आवळल्या आहेत.
आरोपीवर २१ गुन्हे दाखल
हैदराबादमधील मुलूगू पोलीस स्टेशन आणि घटकेसर पोलीस स्टेशनच्या हद्दीत झालेल्या दोन खुनांचा तपास करत असताना पोलीस आरोपीपर्यंत पोहचले. राचाकोंडा पोलीस आणि हैदराबाद पोलीस आयुक्तांच्या विशेष पथकाने ही कारवाई करत आरोपीला ताब्यात घेतले. या आधी आरोपी मुलूगूवर २१ गुन्हे दाखल असल्याची माहिती पोलिसांनी दिली. मालमत्तेसंदर्भातील गुन्हे तसेच पोलीस कोठडीतून पळून गेल्यामुळे त्याच्यावर गुन्हे दाखल आहेत.
