Sakshi Murder Case : दोन वर्षापूर्वी कुटूंबासह पळवून लावला होता साहिल, नागरिकांनी केले होते हद्दपार

दिल्लीतील साक्षी खून प्रकरणातील आरोपी साहिलला शाहबाद डेअरी परिसरातून दोन वर्षापूर्वी कुटूंबासह हाकलून लावल्याची माहिती उघड झाली आहे. मात्र तरीही साहिल कोणते ना कोणते कारण काढून या परिसरात येत होता, अशी माहिती स्थानिक नागरिकांनी दिली.

नवी दिल्ली : शाहबाद डेअरी परिसरात तरुणीचा खून केल्यानंतर देशभरात संतापाची लाट उसळली आहे. या प्रकरणातील आरोपी साहिल याच्या पोलिसांनी मुसक्या आवळल्या आहेत. मात्र दोन वर्षापूर्वी देखील शाहबाद डेअरी परिसरातील नागरिकांनी साहिलला कुटूंबासह पळवून लावले होते. कॉलनीतील नागरिकांशी सतत भांडण करत असल्याने नागरिकांनी साहिलला हद्दपार केले होते. मात्र नागरिकांनी पाकलून लावल्यानंतर साहिल जैन कॉलनीत राहू लागल्याची माहिती येथील नागरिकांनी दिली. नागरिकांनी हाकलून लावल्यानंतरही साहिल मुलीसह आसपासच्या गार्डनमध्ये दिसत असल्याचेही नागरिकांनी यावेळी स्पष्ट केले.

साहिलने सांगितलेल्या तथ्यांची चौकशी केली जात आहे. पोलिसांचे पथक वैज्ञानिक पुरावे गोळा करण्यात गुंतले आहेत. खुनाच्या वेळी व्हायरल झालेल्या व्हिडीओमध्ये दिसणार्‍या सर्व 12 जणांचे जबाबही नोंदवण्यात येणार आहेत - रवी कुमार सिंह, पोलीस उपायुक्त

कामाच्या बहाण्याने येत होता कॉलनीत : शाहबाद डेअरी येथून जैन कॉलनीत स्थलांतरित होऊनही आरोपी साहिलने परिसरात येणे सोडले नाही. तरुणीला भेटण्यासाठी साहिल एक ना एक बहाणा करून शाहबाद डेअरीत जात असे. कधी कामाच्या बहाण्याने तर कधी कुणाला भेटण्याच्या बहाण्याने साहिल या परिसरात फिरकत असल्याची माहिती स्थानिक नागरिकांनी दिली. तो अनेकदा मुलीसोबत जवळच्या पार्कमध्ये दिसत असल्याचेही नागरिकांनी स्पष्ट केले. नागरिकांकडून अडवणूक होऊनही तो आपल्या कृत्यांपासून परावृत्त झाला नसल्याचेही त्यांनी यावेळी स्पष्ट केले.

मानसोपचार तज्ज्ञांची घेतली जाईल मदत : हत्येचा आरोपी साहिल वारंवार आपले म्हणणे बदलून पोलिसांची दिशाभूल करण्याचा प्रयत्न करत आहे. त्यादृष्टीने पोलिसांकडूनही तयारी सुरू आहे. त्याने तपासात सहकार्य केले नाही तर त्याचाही बंदोबस्त केला जाईल, असे पोलिसांचे म्हणणे आहे. आरोपी साहिलच्या कोठडीत वाढ करण्याची मागणी पोलीस न्यायालयाकडे करणार आहेत. तो तपासात सहकार्य करत नसल्याचे पोलीस अधिकारी स्पष्ट करत आहेत. त्याच्या वारंवार बदलणाऱ्या विधानांची सत्यता जाणून घेण्यासाठी पोलीस मानसशास्त्रज्ञांचीही मदत घेऊ शकतात.

व्हिडिओत दिसणाऱ्या नागरिकांचे घेणार पुरावे : साहिलने सांगितलेल्या तथ्यांची चौकशी केली जात आहे. पोलिसांचे पथक वैज्ञानिक पुरावे गोळा करण्यात गुंतले आहेत. खुनाच्या वेळी व्हायरल झालेल्या व्हिडीओमध्ये दिसणार्‍या सर्व 12 जणांचे जबाबही नोंदवण्यात येणार असल्याचे पोलीस उपायुक्त रवी कुमार सिंह यांनी सांगितले. अशा वेळी पीडितेला मदत करता येईल, याची जाणीवही लोकांना करून दिली जाईल, असेही ते म्हणाले.

हेही वाचा -