राकेश टिकैत यांची देशातील चार राज्यांत 80 कोटींची संपत्ती?

भारतीय किसान युनीयनचे नेते राकेश टिकैत यांची 80 कोटींची संपत्ती असल्याचा दावा करण्यात येत आहे. यावर राकेश टिकैत यांनी प्रतिक्रिया दिली. माझी-तुझी नाही. तर सर्व शेतकऱ्यांची संपत्ती एकच आहे, असे ते म्हणाले.

नवी दिल्ली - गेल्या दोन महिन्यापासून केंद्राच्या कृषी कायद्यांविरोधात शेतकऱ्यांचे आंदोलन सुरू आहे. या दिल्लीतील शेतकरी आंदोलनातून शेतकरी नेते राकेश टिकैत यांच नाव समोर आले आहे. सध्या हे नाव देशपातळीवर चर्चेत आहे. गेल्या काही दिवसांपासून सर्वत्र परिचयाचे झालेले राकेश टिकैत यांच्या संपत्तीविषयी अनेक दावे करण्यात येत आहेत. यावर राकेश टिकैत यांनी प्रतिक्रिया दिली. माझी-तुझी नाही. तर सर्व शेतकऱ्यांची संपत्ती एक आहे. देशात जो कोणी शेतकरी आंदोलनाला मदत करण्यासाठी शेतकऱ्यांच्या ट्रॅक्टरमध्ये इंधन मोफत टाकत आहे. तो पेट्रोल पंप आपला आहे, असेही ते म्हणाले.

शेतकरी आंदोलनामध्ये सहभाग घेतलेल्या इतक्या सर्व शेतकऱ्यांची संपत्ती मी कशी मोजू. जे सर्व आहे. ते शेतकऱ्यांचे आहे, असे ते म्हणाले. तसेच 18 फेब्रुवरीला रेल्वे रोको आंदोलन करण्यात येणार आहे, असे ते म्हणाले.

टिकैत यांच्या संपत्तीविषयी अनेक दावे -

राकेश टिकैत यांच्या संपत्तीविषयी अनेक दावे करण्यात येत आहे. राकेश टिकैत यांची उत्तर प्रदेश, उत्तराखंड, दिल्ली आणि महाराष्ट्र या राज्यात मालमत्ता आहे. मुजफ्फरनगर, ललितपूर, झांशी, लखीमपुर खेरी, बिजनौर, बदायूं, दिल्ली, नोएडा, गाझियाबाद, देहरादून, रुड़की, हरिद्वार आणि मुंबईसह इतर देशातील शहरांमध्ये राकेश टिकैत यांची संपत्ती आहे. राकेश टिकैत यांच्याकडे जवळपास 80 कोटींची मालमत्ता असल्याचा दावा करण्यात येत आहे.