नवी दिल्ली : राहुल गांधी यांची भारत जोडो यात्रा दिल्लीत दाखल झाली आहे. (Bharat Jodo Yatra in Delhi). शनिवारी ते माजी पंतप्रधान अटलबिहारी वाजपेयी यांच्या स्मारकाला भेट देणार आहेत. (Rahul gandhi to visit vajpayee memorial). महात्मा गांधी आणि माजी पंतप्रधानांच्या स्मारकांना भेट देणे हा राहुल गांधींच्या भारत जोडो दौऱ्याचा एक भाग आहे. भारत जोडो यात्रा दिल्लीत 25 डिसेंबर ते 2 जानेवारीपर्यंत नऊ दिवसांचा ब्रेक घेणार आहे. यानंतर ही यात्रा नवी दिल्लीतून पुन्हा सुरू होऊन 3 जानेवारीला पश्चिम उत्तर प्रदेशात जाईल.
ही राजकीय यात्रा नाही : ऑल इंडिया कॉंग्रेस कमिटीचे प्रभारी सचिव वामशी चंद रेड्डी म्हणाले, "राहुल गांधी यांची ही भेट लोकांना सकारात्मक संदेश देण्याबरोबरच, कोरोना महामारीवर राजकारण करण्याच्या भाजपच्या प्रयत्नांना प्रतिउत्तर म्हणून काम करेल. भाजपने प्रथम विज्ञानावर आधारित मार्गदर्शक तत्त्वे आणली पाहिजेत आणि नंतर आम्हाला त्यांचे पालन करण्यास सांगितले पाहिजे. किंबहुना राहुल यांच्या सामाजिक आंदोलनाच्या यशाची चिंता असल्याने भाजप यात्रा रखडवण्याचा प्रयत्न करत आहे". ते पुढे म्हणाले की, "राहुल गांधी यांनी ही यात्रा राजकीय असल्याचे कधीही म्हटले नाही. ही एक सामाजिक चळवळ आहे आणि देशाला जोडण्याचा प्रयत्न आहे. या यात्रेचा संदेश दूरदूरपर्यंत पोहोचला असून, त्यामुळे यात्रा रोखण्याचा प्रयत्न करणाऱ्या भाजपची चिंता वाढली आहे".
भाजपने महामारीवर राजकारण करू नये : केंद्रीय आरोग्य मंत्री मनसुख मांडविया यांनी राहुल गांधी आणि राजस्थानचे मुख्यमंत्री अशोक गेहलोत यांना पत्र लिहून यात्रेदरम्यान कोविड प्रोटोकॉलचे पालन करण्याचे आवाहन केले आहे. तसेच शक्य असल्यास प्रवास पुढे ढकला, असेही सांगण्यात आले आहे. त्याच वेळी, सार्वजनिक आरोग्य हा अत्यंत गंभीर प्रश्न असल्याने केंद्र आणि भाजपने साथीच्या आजारावर राजकारण करणे थांबवावे, असे म्हणत काँग्रेसने याला प्रत्युत्तर दिले आहे. यावर काँग्रेसचे मीडिया प्रमुख पवन खेडा म्हणाले, "नियमांचे पालन करणारे आम्ही पहिले असू. आम्ही सरकारला शास्त्रज्ञ आणि तज्ञांशी सल्लामसलत करून असे नियम बनवण्याची विनंती करू. संपूर्ण देश पूर्वीप्रमाणेच नियमांचे पालन करेल".
काँग्रेसच टार्गेट का? : दुसरीकडे, भाजपच्या राजस्थान युनिटद्वारे अशीच यात्रा काढली जात असताना आणि देशाच्या विविध भागांमध्ये सार्वजनिक कार्यक्रम आयोजित केले जात असताना सरकार केवळ विरोधी पक्षाला का लक्ष्य करत आहे, असा प्रश्न काँग्रेस नेत्यांनी केला आहे. राजस्थान भाजपच्या प्रमुखांनी आरोग्यमंत्र्यांच्या सूचनांकडे दुर्लक्ष केल्याचे सांगून ते म्हणाले की, राज्यात जनआक्रोश यात्रा सुरूच ठेवणार आहोत. स्वामी नारायण संप्रदायाशी संबंधित एक कार्यक्रम अहमदाबादमध्ये आयोजित केला जात आहे, ज्यामध्ये जगभरातून लाखो भक्त जमा होण्याची अपेक्षा आहे. चीन किंवा इतर देशांतून येणाऱ्या फ्लाइटवर कोणतेही बंधन नाही. मग फक्त काँग्रेसलाच का टार्गेट केले जात आहे, असेही ते म्हणाले.
