श्रीनगर - जम्मू-काश्मीरच्या राजौरी जिल्ह्यात भारतीय जनता पक्षाचे (भाजपा) नेते जसबीर सिंग यांच्या निवासस्थानी दहशतवाद्यांनी ग्रेनेड हल्ला केला. या हल्ल्यात तीन वर्षीय बालकाचा मृत्यू झाला आहे. अधिकाऱ्यांनी शुक्रवारी ही माहिती दिली. गुरुवारी रात्री ही घटना घडली. तर जसबीर सिंग यांच्या घरातील इतर चार सदस्यही गंभीर जखमी झाल्याची माहिती आहे.
वीरचा राजौरी येथील शासकीय रुग्णालयात उपचार सुरू असताना मध्यरात्रीच्या सुमारास मृत्यू झाला. त्यांनी सांगितले की मुलाचा मृतदेह अंतिम संस्कारांसाठी कुटुंबीयांच्या ताब्यात देण्यात आला आहे.
भाजपाने या हल्ल्याचा तीव्र निषेध केला आणि त्याला जबाबदार असणाऱ्यांना त्वरित अटक करण्याचे पोलिसांना आवाहन केले. या घटनेनंतर स्थानिक लोकांनी आणि भाजपा नेत्याच्या कुटुंबीयांनी आंदोलन केले. सिंग यांना पुरेशी सुरक्षा देण्यात आली नसल्याचा त्यांचा आरोप आहे. जसबीर सिंग या घटनेत जखमी झाले आहेत.
हल्ल्यानंतर ताबडतोब पोलीस आणि सुरक्षा दलांनी शहरात आणि परिसरात शोध घेतला. पाकिस्तान भाजप नेत्यांवर दहशतवादी हल्ल्याचा कट रचत आहे. आम्ही या हल्ल्याचा तीव्र निषेध करतो. यासाठी जबाबदार असलेल्या दहशतवाद्यांना पोलिसांनी तत्काळ अटक करावी, असे भाजपाचे जम्मू -काश्मीर युनिटचे प्रमुख रवींद्र रैना म्हणाले.
दरम्यान आज सकाळीच दहशतवादी आणि सुरक्षा दलादरम्यान चकमक झाली. यावेळी एका दहशतवाद्याला ठार मारण्यात सुरक्षा दलाला यश आले आहे. गेल्या काही दिवसांपासून जम्मू काश्मीरमध्ये भाजपा नेत्यांवर हल्ले होत आहेत. यापूर्वीही दहशतवाद्यांनीएका भाजपा कार्यकर्त्याची गोळी मारून हत्या करण्याचा प्रयत्न केला होता. या आधीही काश्मीर खोऱ्यातल्या विविध भागांमध्ये भाजपच्या अनेक कार्यकर्त्यांची आणि नेत्यांची हत्या झाली आहे.
हेही वाचा - Kulgam Encounter : कुलगाममध्ये लष्कराची मोहीम फत्ते! एका दहशतवाद्याचा खात्मा
