पणजी - गोव्यातील एक दिग्गज राजकारणी म्हणून प्रतापसिंह राणे यांची ओळख आहे. काँग्रेसचे जुने नेते आणि कार्यकर्ते असलेल्या माजी मुख्यमंत्री प्रतापसिंह राणे यांना आजीवन कॅबिनेट पदाचा दर्जा देण्याचा निर्णय गोवा सरकारने घेतला. सर्वच पक्षांनी त्यांना हा बहुमान दिला. या निवडणुकीत राणे यांनी पोरीम मतदारसंघातून उमेदवारी अर्ज भरला होता. मात्र त्यांनी नंतर माघार घेतली. त्या जागी काँग्रेस पक्षाने रणजित राणे यांना उमेदवारी जाहीर केली. दुसरीकडे राणेंच्या सून दिव्या राणे यांनी भाजपच्या तिकिटावर ही निवडणूक लढवली. त्या या निवडणुकीत जिंकून आल्या आहेत. प्रतापसिंह राणे यांचे चिरंजीव राज्याचे रोग्यमंत्री विश्वजित राणे हे देखील भाजपच्या तिकिटावर निवडून आले आहेत. पिता पुत्र दोन वेगवेगळ्या विरोधी पक्षामध्ये असल्याने याला कौटुंबिक कलहाची किनार होती. मात्र राणे यांना आजीवन कॅबिनेट मंत्रीपदाचा दर्जा देण्यात आल्याने त्यांनी या निवडणुकीतून माघार घेतल्याची चर्चा होती.
आलेमाओ यांचा पराभव
गोव्यातील आणखी एक मोठे राजकीय व्यक्तिमत्व म्हणजे चर्चिल आलेमावो. राष्ट्रवादी काँग्रेसचे नेते असलेल्या चर्चिल आलेमाओ यांनी ऐन निवडणुकीच्या तोंडावर राष्ट्रवादी काँग्रेसला रामराम ठोकला. त्यांनी तृणमूल काँग्रेस मध्ये प्रवेश केला. गोवा राज्यात ते राष्ट्रवादी काँग्रेस पक्षाचे एकमेव आमदार होते. त्यांनी गोव्यातील राष्ट्रवादी काँग्रेस पक्ष तृणमुल काँग्रेसमध्ये विलीन केला. गोव्यात राष्ट्रवादी काँग्रेस नेहमीच काँग्रेस पक्षासोबत सत्तेत सहभागी व्हायची. मात्र मागच्या दोन टर्ममध्ये काँग्रेस सत्तेपासून दूर राहिल्याने राष्ट्रवादी काँग्रेस पक्षही सत्तेपासून दूर होता. यामुळेच चर्चिल आलेमाव यांनी मधल्या काळात भाजपशी जुळवून घेतल्यामुळे नाराज काँग्रेस पक्षाने राष्ट्रवादी काँग्रेस आणि पर्यायाने चर्चिल आलेमाव यांना दूर ठेवण्याचा प्रयत्न केला. आलेमाव यांनी बाणवली मतदारसंघातून निवडणूक लढवली. मात्र त्यांचा पराभव झाला.
फक्त १४५ मते
गोव्याच्या राजकारणातील आणखी एक मोठे नेते म्हणजे लुईझीन फालेरो. मूळचे काँग्रेसचे नेते असलेल्या लुईझीन फालेरो सध्या तृणमूल काँग्रेसमध्ये आहेत. गोव्याच्या या निवडणुकीत तृणमूल काँग्रेसने प्रचारात आघाडी घेतली होती. पक्षाच्या प्रमुख नेत्या ममता बॅनर्जी यांनीही सभा घेतल्या होत्या. काँग्रेसचे संघटक म्हणून आधी त्यांची ओळख होती. मात्र त्यांनी सप्टेंबर २०२१ मध्ये काँग्रेसमधून बाहेर पडून तृणमूल काँग्रेसमध्ये प्रवेश केला. नावेलीम मतदार संघाचे ते नेतृत्व करतात. फातोर्ड्यातून उमेदवारी भरावी यासाठी तृणमूलकडून त्यांच्यावर दबाव येत होता. तृणमुल काँग्रेसचे राष्ट्रीय उपाध्यक्ष लुईझीन फालेरो यांनी पक्षाचा राजीनामा दिल्याची अफवा समाज माध्यमातून फिरू लागल्याने राजकिय वर्तुळात गोंधळ उडाला. मात्र नंतर तृणमुलने या वृत्ताचा इन्कार करणारे फालेरो यांचे ट्विट प्रसारित करून या वादावर पडदा टाकला. फातोर्डातून त्यानंतर तृणमूल काँग्रेसने साओला वास यांना उमेदवारी दिली. मात्र त्यांचा पराभव झाला. त्यांना फक्त १४५ मते पडली.
एकूणच याचा विचार करता गोव्यातील दिग्गज नेत्यांना यावेळी घरीच बसावे लागले. त्यांना या निवडणुकीत कोणत्याच प्रकारे यश मिळाले नाही असेच म्हणावे लागेल.
(अभ्युदय रेळेकर)
