नवी दिल्ली : पंतप्रधान नरेंद्र मोदी आणि मालदीवचे अध्यक्ष इब्राहिम सोलिह यांच्यात मंगळवारी झालेल्या शिखर परिषदेनंतर भारत आणि मालदीवमध्ये सहा करारांवर स्वाक्षऱ्या झाल्या. पीएम मोदी आणि मालदीवचे अध्यक्ष सोलिह यांनी 'ग्रेटर मेल कनेक्टिव्हिटी प्रकल्प' लाँच केले. ( India Maldives Relations ) ( India Maldives launch Greater Male connectivity projects )
क्षमता निर्माण, सायबर सुरक्षा, गृहनिर्माण, आपत्ती व्यवस्थापन आणि पायाभूत सुविधांमध्ये सहकार्य वाढवण्यासाठी दोन्ही देशांमध्ये करार करण्यात आले आहेत. शिखर परिषदेनंतर पंतप्रधान मोदी म्हणाले की, सर्व प्रकल्प वेळेत पूर्ण करता यावेत यासाठी मालदीवला USD 100 दशलक्ष अतिरिक्त क्रेडिट प्रदान करण्याचा निर्णय घेण्यात आला आहे.
ते म्हणाले की, दोन्ही देशांमधील मैत्रीपूर्ण संबंधांमध्ये नवीन जोम दिसला असून जवळीक वाढली आहे. ते म्हणाले, 'कोविड महामारीमुळे निर्माण झालेली आव्हाने असूनही, आमचे सहकार्य व्यापक भागीदारीचे रूप घेत आहे.' हिंदी महासागरात आंतरराष्ट्रीय गुन्हेगारी, दहशतवाद आणि अंमली पदार्थांच्या तस्करीचा धोका गंभीर असल्याचे पंतप्रधान म्हणाले. ते म्हणाले की, भारत आणि मालदीवमधील घनिष्ठ संबंध शांततेसाठी महत्त्वाचे आहेत.
मोदी म्हणाले की, भारत-मालदीव भागीदारी केवळ दोन्ही देशांच्या नागरिकांच्या हितासाठी काम करत नाही, तर ती स्थिरतेचा स्रोतही बनत आहे. मालदीवच्या कोणत्याही गरजेला किंवा संकटाला प्रतिसाद देणारा भारत पहिला आहे आणि पुढेही देत राहील, असे पंतप्रधान म्हणाले. त्याचवेळी मालदीवचे अध्यक्ष सोलिह म्हणाले की, दहशतवादाचा सामना करण्यासाठी आम्ही आमच्या दृढ वचनबद्धतेचा पुनरुच्चार करतो.
मालदीव हा भारताचा खरा मित्र राहील, असे ते म्हणाले. सोलिह एका उच्चस्तरीय शिष्टमंडळासह चार दिवसांच्या भारत दौऱ्यावर सोमवारी दिल्लीत दाखल झाले. मालदीव हा हिंदी महासागर क्षेत्रातील भारताच्या प्रमुख सागरी शेजारी देशांपैकी एक आहे आणि संरक्षण आणि सुरक्षा या क्षेत्रांसह एकूण द्विपक्षीय संबंध गेल्या काही वर्षांमध्ये वाढले आहेत.
हेही वाचा : ‘वॉटर बेबी’ अनन्या पांडे डुंबतेय ‘मालदीव’ च्या समुद्रात!
