लखनऊ - उत्तर प्रदेश सरकारने घेतलेत्या नव्या निर्णयानुसार, राज्यातील तिहेरी तलाकला बळी पडलेल्या महिलांना वार्षिक सहा हजार रूपये पेन्शन देण्यात येणार आहे. सरकारी सूत्रांनी शनिवारी याबाबतची माहिती दिली.
चालू आर्थिक वर्षाच्या शेवटच्या तिमाहीमध्ये, सरकारने तिहेरी तलाक प्रथेला बळी पडलेल्या महिलांना मदत देण्याचे ठरवले आहे. यानुसार, एका महिलेला महिन्याला ५०० रूपये पेन्शन देण्यात येईल. यावर प्रतिक्रिया देताना शिया समाजाचे नेते मौलाना सैफ अब्बास म्हणाले, की सरकारने तिहेरी तलाक पीडितांना आर्थिक मदत देण्याऐवजी, त्यांच्या मुलांचे शिक्षण आणि राहण्यासाठी जागा यावर लक्ष द्यावे.
तर, सुन्नी समाजाचे नेते मौलाना सुफैना म्हणाले, की या मुद्द्यावरून सरकार हे केवळ राजकारण करत आहे. अवघे ५०० रूपये मदत देऊन सरकार काय मदत करू इच्छित आहे, ते पाहणे औत्सुक्याचे ठरेल. सामाजिक कार्यकर्ते शाहिस्ता अंबर म्हणाले, की तिहेरी तलाकच्या पीडितांना मदत करण्याचा सरकारचा निर्णय नक्कीच कौतुकास्पद आहे. मात्र, मदत म्हणून मिळणारी रक्कम ही खूपच कमी आहे. सहा हजार रूपयांमध्ये वर्षभरासाठीच्या मूलभूत गरजाही भागवणे अशक्य आहे.
हेही वाचा : हेमंत सोरेन यांचा आज शपथविधी सोहळा; देशभरातील दिग्गज नेते राहणार उपस्थित
