मुजफ्फरनगर- उत्तर प्रदेशातील खातौली तहसील अंतर्गत कौटुंबिक कोर्टाने एका महिलेला आपल्या पतीला भत्ता देण्यास सांगितले आहे. संबंधित पती चहा विक्रेता म्हणून काम करतो. सात वर्षांपूर्वी मुजफ्फरनगरच्या कौटुंबिक न्यायालयात त्याने पोटगीचा दावा दाखल केला होता.
30 वर्षांपूर्वी किशोरीलाल सोहुनकरचे कानपूरच्या मुन्नी देवीशी लग्न झाले होते. लग्नानंतर काही काळानंतर दोघांमध्ये वाद झाले. हे पती-पत्नी गेल्या 10 वर्षांपासून एकमेकांपासून वेगळे राहत आहेत. मुन्नी देवी कानपूर येथे भारतीय सैन्यात चतुर्थश्रेणी कर्मचारी होत्या. तर किशोरीलाल आपला उदरनिर्वाह करण्यासाठी चहाचं छोटं दुकान चालवत होते.
दरमहा दोन हजार रुपये देण्याचे आदेश
मुन्नी देवी निवृत्त झाल्या असून त्यांना 12 हजार रुपये पेन्शन मिळत आहे. किशोरीलाल चहा विक्रीसाठी खतौली येथेही काम करतात. परंतु गरीबीने त्रस्त झाल्याने त्यांनी सात वर्षांपूर्वी मुजफ्फरनगरच्या कौटुंबिक न्यायालयात भत्ता संदर्भात याचिका दाखल केली होती. या प्रकरणात कौटुंबिक न्यायालयाने किशोरीलालच्या बाजूने निकाल दिला आहे. कोर्टाने मुन्नी देवी यांनी पतीला दरमहा दोन हजार रुपये देण्याचे आदेश दिलेत. मात्र न्यायालयाच्या या निर्णयावर किशोरीलाल सोहुनकर पूर्णपणे समाधानी नाहीत.
हेही वाचा- रिझर्व बँकेचे गव्हर्नर शक्तिकांत दास कोरोना पॉझिटिव्ह
कोर्टाच्या निर्णयावर मी समाधानी नाही..
किशोरीलाल म्हणाले, "कोर्टाच्या निर्णयावर मी समाधानी नाही. जवळपास 7 वर्षानंतर कोर्टाचा निर्णय आला. मी कर्ज घेऊन खटला लढला. लॉकडाउनमध्येही लोकांकडून पैसे उधार घेऊन मला उदरनिर्वाह करावा लागला. 2013 र्षांपासून हा वाद सुरू आहे. पत्नीला 12 हजार रुपये पेन्शन मिळतात. त्यातील एक तृतीयांश रक्कम तरी मला मिळायला हवी होती. कोर्टाच्या निर्णयानुसार, देण्यात येणाऱ्या दोन हजार रुपयांत माझं कसं भागणार?, असा प्रश्न त्यांनी उपस्थित केला.
वकील बालेशकुमार तायल यांनी दिलेल्या माहितीनुसार, हे प्रकरण कौटुंबिक न्यायालयात प्रलंबित होते. पती-पत्नी मध्ये वाद झाले आणि ते वेगळे राहू लागले. किशोरीलाल यांनी त्याविरोधात सात याचिका दाखल केल्या होत्या. कोर्टाने एकत्र राहण्याच्या आदेशानंतरही मुन्नी देवी त्यांच्याकडे आल्या नाहीत. मुन्नी देवी यांचे एकूण मासिक उत्पन्न 12,000 रुपये आहे. या दोघांचा अजून घटस्फोट झाला नाही.
हेही वाचा- 45 हजार नव्या रुग्णांसह देशातील कोरोनाग्रस्तांची संख्या 79 लाखांवर
