नवी दिल्ली- बिहार विधानसभा निवडणुकीच्या पार्श्वभूमीवर काँग्रेसच्या अंतरिम अध्यक्षा सोनिया गांधी यांनी विविध समित्यांच्या निर्मितीची घोषणा केली आहे. या समित्या बिहार निवडणुकीत काँग्रेसच्या प्रचार अभियानाचे व्यवस्थापन करतील.
निवडणुकीच्या पार्श्वभूमीवर, निवडणूक व्यवस्थापन व समन्वय समिती, प्रसिद्धी समिती, मीडिया समन्वय समिती, सार्वजनिक बैठक आणि लॉजिस्टिक समिती, कायदा समिती आणि कार्यालय व्यवस्थापन समितीची निर्मिती करण्यात आली आहे. निवडणूक प्रचाराच्या व्यवस्थापनाची सर्व जबाबदारी काँग्रेसचे सरचिटणीस रणदीप सुरजेवाला यांना देण्यात आली असून, ते १४ सदस्यीय मतदान व्यवस्थापन व समन्वय समितीचे नेतृत्व करणार आहेत. प्रकाश मोहन हे या समितीचे संयोजक आणि शकीलुझमान अन्सारी हे या समितीचे सदस्य आहेत.
सुबोध कुमार हे प्रसिद्धी समितीचे प्रमुख असतील, पवन कुमार हे मीडिया समितीचे प्रमुख असतील, ब्रिजेश कुमार मुनन हे लॉजिस्टिक समितीचे प्रमुख असतील, अशोक राम हे कार्यालय व्यवस्थापन समितीचे प्रमुख असतील, तर वरून चोप्रा हे कायदा पथकाचे नेतृत्व करतील.
दरम्यान, बिहार निवडणुकीच्या पहिल्या टप्प्यासाठी काँग्रेसने बुधवारी (७ ऑक्टोबर) आपल्या स्टार प्रचारकांची यादी जाहीर केली होती. पहिला टप्पा हा २८ ऑक्टोबरला सुरू होणार असून, यात काँग्रेस प्रमुख सोनिया गांधी, माजी पंतप्रधान मनमोहन सिंह, राहुल गांधी, प्रियांका गांधी वाड्रा आणि शत्रुघ्न सिन्हा सहभाग घेतील.
तसेच, काँग्रेसचे वरिष्ठ नेते गुलाम नबी आझाद, शक्तीसिंह गोहिल, शकील अहमद आणि सुरजेवाला या सर्वांचा प्रचार यादीत समावेश आहे. त्याचबरोबर, मुख्यमंत्र्यांपैकी भूपेश बघेल, अशोक गहलोत, अमरिंदरसिंह आणि लोकसभेच्या माजी सभापती मीरा कुमार यांचाही निवडणूक प्रचार यादीत समावेश आहे.
काँग्रेस राष्ट्रीय जनता दल आणि डाव्या पक्षाच्या महाआघाडीसह बिहार विधानसभा निवडणुकीत सहभाग घेणार आहे. हे सर्व पक्ष २४३ पैकी ७० जागांवर आपले नशीब आजमावनार आहे.
हेही वाचा- 'सुसंस्कृत' चोर ! 65 हजार रुपयांची चोरी केल्यानंतर चिठ्ठी लिहून मागितली माफी
