लखनौ - मोटार वाहन कायद्यातील बदलानुसार, हेल्मेट न घालण्यासाठी हजारो रुपये दंड आकारला जातो आहे. त्यामुळे अनेक दुचाकीस्वार त्रस्त झाले आहेत. मात्र, तुम्ही जर कार चालवत असाल, तर तुम्हालाही सावध राहण्याची गरज आहे. कारण हेल्मेटसक्तीमधून तुमचीही सुटका नाही.
होय! बरेलीतील एका व्यक्तीला हेल्मेट न घातल्याबद्दल ५०० रूपये दंड ठोठावण्यात आला आहे. विशेष म्हणजे हा व्यक्ती कार चालवत होता. तरीही त्याला हा दंड ठोठावण्यात आला आहे. अनीश नरूला असे या व्यक्तीचे नाव आहे. आता हा व्यक्ती न्याय मागण्यासाठी अधिकाऱ्यांकडे खेटे घालत आहे.
याबाबत वाहतूक पोलिस संतोष गंगवार यांनी ही तांत्रिक चूक असल्याचे सांगत, यावर कार्यवाही सुरु असल्याची माहिती दिली.
हेही वाचा : मोटार वाहन कायद्याचा झटका, रिक्षाचालकाला तब्बल ४७,५०० रुपयांचा दंड
मोटार वाहन नियमांमध्ये सोमवारी सुधारणा करण्यात आली. त्यानुसार, विविध अपराधांसाठीच्या दंडाची रक्कम वाढवण्यात आली आहे. यावर विविध ठिकाणांहून वेगवेगळ्या प्रतिक्रिया येत आहेत. तर, सोशल मीडियावर याबाबत अनेक उपहासात्मक मीम्स शेअर केले जात आहेत.
