ആന്തൂർ അയ്യങ്കോലിൽ സിപിഎം-ലീഗ് സംഘർഷം

കണ്ണൂർ: തളിപ്പറമ്പ് ആന്തൂർ അയ്യങ്കോലിൽ സിപിഎം-ലീഗ് പ്രവർത്തകർ തമ്മിൽ നേരിയ സംഘർഷം. ഇരു വിഭാഗം പ്രവർത്തകരും തമ്മിൽ വാക്കേറ്റവും കൈയ്യാങ്കളിയും ഉണ്ടായി. അയ്യങ്കോൽ കടമ്പേരി ഗവ യു പി സ്കൂളിലെ പോളിങ് ബൂത്തിന് മുന്നിലാണ് സംഘർഷം ഉണ്ടായത്. പുറത്ത് തടിച്ച് കൂടിയ സിപിഎം-ലീഗ് പ്രവർത്തകർ തമ്മിൽ വാക്കേറ്റം ഉണ്ടാവുകയായിരുന്നു. തുടർന്ന് പ്രവർത്തകർ തമ്മിൽ കയ്യാങ്കളിയും നടന്നു. മറ്റു വാർഡിൽ നിന്നുള്ള ആളുകൾ ബൂത്തിലേക്ക് എത്തുന്നുവെന്ന് പറഞ്ഞതിനെ തുടർന്നാണ് വാക്കേറ്റം നടന്നത്. ഈ സമയം ബൂത്തിൽ സുരക്ഷ ചുമതലയിലുണ്ടായിരുന്ന പൊലീസുകാർ ഇടപെട്ട് സ്ഥിതി ശാന്തമാക്കി. പിന്നീട് വൈകുന്നേരത്തോടു കൂടി ഇരു വിഭാഗം പ്രവർത്തകരും ബൂത്തിനു മുന്നിൽ തടിച്ചുകൂടി. എന്നാൽ തളിപ്പറമ്പ സി.ഐ എൻ കെ സത്യനാഥിൻ്റെ നേതൃത്വത്തിൽ ഇരു വിഭാഗം പ്രവർത്തകരെയും സ്ഥലത്ത് നിന്ന് പറഞ്ഞയച്ചു.