MV Govindan About Anathalavattom Anandan : 'നഷ്‌ടമായത് പാര്‍ട്ടിയുടെ ആവേശകരമായ നേതൃത്വം' ; ആനത്തലവട്ടം ആനന്ദന്‍റെ വിയോഗത്തില്‍ എംവി ഗോവിന്ദന്‍

തിരുവനന്തപുരം : കമ്മ്യൂണിസ്‌റ്റ് പ്രസ്ഥാനത്തെ ശക്തിപ്പെടുത്തുന്നതിലും ട്രേഡ് യൂണിയന്‍ സംഘടനകള്‍ കെട്ടിപ്പടുക്കുന്നതിലും ആവേശകരമായ നേതൃത്വമായി പ്രവര്‍ത്തിച്ച വ്യക്തിത്വമായിരുന്നു ആനത്തലവട്ടം ആനന്ദനെന്ന് സിപിഎം സംസ്ഥാന സെക്രട്ടറി എം.വി ഗോവിന്ദൻ(MV Govindan About Anathalavattom Anandan). കയർ തൊഴിലാളിയായി ജീവിതം ആരംഭിച്ച് പിന്നീട് അദ്ദേഹം കയർ തൊഴിലാളി സഹകരണ സംഘം രൂപീകരിച്ചു. പാർട്ടിയുടെ ലോക്കൽ കമ്മിറ്റി സെക്രട്ടറിയായും ഏരിയ കമ്മിറ്റി സെക്രട്ടറിയായും ജില്ല കമ്മിറ്റിയുടെ ഏറ്റവും പ്രമുഖ നേതാവായും മാറി. പിന്നീട് സംസ്ഥാന കമ്മിറ്റി അംഗം, സംസ്ഥാന സെക്രട്ടേറിയറ്റ് അംഗം എന്നീ നിലകളിലും പ്രവര്‍ത്തിച്ചു. മൂന്ന് സന്ദർഭങ്ങളിലായി കേരള നിയമസഭയിലേക്ക് തെരഞ്ഞെടുക്കപ്പെട്ടു. പാർട്ടിയുടെ സമുന്നത നേതാവായി പ്രവർത്തിക്കുമ്പോഴും കയര്‍ തൊഴിലാളി മേഖലയുമായി ബന്ധപ്പെട്ട സംഘടന പ്രവർത്തനങ്ങളിൽ നിന്ന് ഒരിക്കലും പിന്നോട്ടുപോയില്ല. പാർട്ടിക്ക് നേരെ നടന്ന എല്ലാ കടന്നാക്രമണങ്ങളെയും ചെറുക്കാന്‍ കരുത്തുള്ള നേതാവായിരുന്നു അദ്ദേഹം. തന്‍റെ ജീവിതം മുഴുവൻ ഇടതുപക്ഷ പ്രസ്ഥാനത്തിന് വേണ്ടി സമർപ്പിച്ച നേതാവായിരുന്നു അദ്ദേഹമെന്നും എം.വി ഗോവിന്ദൻ കൂട്ടിച്ചേര്‍ത്തു. ഇന്ന് (ഒക്‌ടോബര്‍ 5) വെകിട്ടാണ് മുന്‍ എംഎല്‍എയും മുതിര്‍ന്ന സിപിഎം നേതാവുമായ ആനത്തലവട്ടം ആനന്ദന്‍ അന്തരിച്ചത്. ചികിത്സയിലിരിക്കെയായിരുന്നു മരണം.