തൃശൂര്‍: സ്വത്ത് തട്ടിയെടുക്കാൻ വയോധികയെ തൊഴുത്തിൽ ചങ്ങലക്കിട്ട് മർദിച്ച് സഹോദരൻ്റെ ഭാര്യയും മകളും. ചാഴൂർ സ്വദേശിനിയും അവിവാഹിതയുമായ മാങ്ങാടിവീട്ടിൽ അമ്മിണിയാണ് (75) ക്രൂരമായ മർദനത്തിന് ഇരയായത്. ഭവാനി, മകൾ കിന എന്നിവരെ ഇന്ന് (ജനുവരി 13) രാവിലെയാണ് അന്തിക്കാട് പൊലീസ് അറസ്റ്റുചെയ്‌തത്.
ഭക്ഷണവും വെള്ളവും ചോദിച്ചപ്പോൾ വരെ അടിക്കുകയായിരുന്നു എന്നാണ് പൊലീസ് പറയുന്നത്. അവശനിലയിലായ വൃദ്ധയെ അന്തിക്കാട് പൊലീസ് എത്തിയാണ് മോചിപ്പിച്ചത്. അമ്മിണിയുടെ പേരിലുള്ള 10 സെൻ്റ് പുരയിടം സ്വന്തം പേരിലേക്ക് മാറ്റിത്തരണമെന്ന് ആവശ്യപ്പെട്ടാണ് മർദനം.
വീടിനുപിന്നില്‍ മേൽക്കൂര തകര്‍ന്ന തൊഴുത്തിൽ ചങ്ങലക്കിട്ടാണ് ഇവരെ ക്രൂരമായി മര്‍ദിച്ചതെന്ന് പൊലീസ് പറയുന്നു. ഒരു മാസത്തോളമായി തുടരുന്ന മർദനത്തിൽ, ചങ്ങലയിൽ കൊരുത്ത് വൃദ്ധയുടെ കാലില്‍ മുറിവുണ്ടായിട്ടുണ്ട്. വെള്ളവും ഭക്ഷണവും ചോദിച്ചപ്പോള്‍ വടികൊണ്ട് ശരീരം മുഴുവൻ അടിക്കുകയും വായയിൽ വടി തിരുകുകയും ചെയ്‌തു.
പൊലീസിന് ലഭിച്ച രഹസ്യവിവരത്തെ തുടർന്ന് അന്തിക്കാട് എസ്‌എച്ച്ഒ പികെ ദാസിന്‍റെ നേതൃത്വത്തിലുള്ള പൊലീസ് സംഘമാണ് വയോധികയെ മോചിപ്പിച്ചതും പ്രതികളെ അറസ്റ്റു ചെയ്‌തതും.
