കഴക്കൂട്ടത്ത് 15 കിലോ കഞ്ചാവുമായി യുവാവ് പിടിയിൽ

മലയിൻകീഴ് തച്ചോട്ടുകാവ് സ്വദേശി ജിനോയാണ് കഴക്കൂട്ടം ടെക്നോപാർക്കിന് സമീപത്ത് വച്ച് അറസ്റ്റിലായത്. ഇയാളില്‍ നിന്ന് 15 കിലോ കഞ്ചാവ് പിടിച്ചെടുത്തു.

തിരുവനന്തപുരം: കഴക്കൂട്ടം ടെക്നോപാർക്കിന് സമീപം 15 കിലോ കഞ്ചാവുമായി യുവാവ് പിടിയിൽ. മലയിൻകീഴ് തച്ചോട്ടുകാവ് സ്വദേശി ജിനോ (22) ആണ് ചെറുകിട കച്ചവടക്കാർക്ക് വിൽക്കാനായി എത്തിച്ച കഞ്ചാവുമായി കഴക്കൂട്ടം എക്സൈസിന്‍റെ പിടിയിലായത്.

നേരത്തെ മൂന്ന് കഞ്ചാവ് കേസുകളിൽ പ്രതിയാണ് ജിനോ. ജാമ്യത്തിൽ ഇറങ്ങിയ പ്രതിയെ എക്സൈസ് സംഘം നിരീക്ഷിച്ച് വരുന്നതിനിടെയിലാണ് വീണ്ടും പിടിയിലാവുന്നത്. വിപണിയിൽ അഞ്ച് ലക്ഷം രൂപ വിലയുള്ള കഞ്ചാവാണ് പിടികൂടിയതെന്ന് എക്സൈസ് പറഞ്ഞു. കഴക്കൂട്ടം എക്സൈസ് ഇൻസ്പെക്‌ടർ പ്രദീപ് റാവുവിന്‍റെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.