തിരുവനന്തപുരം: ഇത് അദ്വൈത്. കുന്നുകുഴി സർക്കാർ യുപി സ്‌കൂളിലെ ഒന്നാം ക്ലാസ് വിദ്യാർഥിയാണ്. പുതുവസ്‌ത്രങ്ങളും തൊപ്പിയും ധരിച്ച് പ്രവേശനോത്സവ ലഹരിയിലാണ് താരം. പക്ഷേ ഒരു സങ്കടം മാത്രം. ഒന്നിച്ച് പഠിക്കാനും കളിക്കാനും രണ്ടേ രണ്ട് കൂട്ടുകാർ മാത്രമേ ഇത്തവണ അദ്വൈതിനൊപ്പം സ്‌കൂളിൽ പ്രവേശനം നേടിയിട്ടുള്ളു.
അദ്വൈതിന് മാത്രമല്ല കുന്നുകുഴി സർക്കാർ യുപി സ്‌കൂളിലെ അധ്യാപകരുടെ ഉള്ളിലുമുണ്ട് ഈ സങ്കടം. ചെണ്ടമേളത്തിന്‍റെ ആരവങ്ങൾക്കൊപ്പം പാട്ടും ഡാൻസുമൊക്കെയായി തലസ്ഥാനത്തെ സ്‌കൂളുകൾ പ്രവേശനോത്സവം ആഘോഷമാക്കുകയാണ്. അതുപോലെ തങ്ങളുടെ സ്‌കൂൾ അങ്കണവും നിരവധി കുട്ടികളുടെ കളിചിരികളാൽ നിറയുന്ന ഒരു അധ്യയന വർഷത്തിനായുള്ള കാത്തിരിപ്പിലാണിവർ.
എന്നാൽ, സ്‌കൂളിലെ പ്രവേശനോത്സവത്തിന്‍റെ ഒരുക്കങ്ങളെ ഇതൊന്നും ബാധിച്ചിരുന്നില്ല. ബലൂണുകളും തോരണങ്ങളും ഒരുക്കി പുതിയ കുട്ടികളെ അധ്യാപകർ സ്‌കൂളിലേക്ക് വരവേറ്റു. പ്രവേശോത്സവത്തിന് എത്തിയ വിദ്യാർഥികൾക്ക് തിരുവനന്തപുരം ലയൺസ് ക്ലബ്ബിന്‍റെ നേതൃത്വത്തിൽ പുസ്‌തകങ്ങളും ബാഗുകളും വിതരണം ചെയ്‌തു.
കുന്നുകുഴി സർക്കാർ യുപിഎസിലെ ഈ അധ്യയന വർഷം പ്രീ പ്രൈമറി, എൽപി, യുപി തലത്തിൽ ആകെ 26 കുട്ടികളാണുള്ളത്. പ്രീ പ്രൈമറിയിൽ ഒന്‍പതും ഒന്നാം ക്ലാസിൽ മൂന്ന്, രണ്ടാം ക്ലാസിൽ മൂന്ന്, മൂന്നാം ക്ലാസിൽ ഒന്ന്, നാലാം ക്ലാസിൽ നാല്, അഞ്ചാം ക്ലാസിൽ രണ്ട്, ആറാം ക്ലാസിൽ രണ്ട്, ഏഴാം ക്ലാസിൽ രണ്ട് വിദ്യാർഥികളുമാണുള്ളത്.
ഏകദേശം 100 വർഷങ്ങൾക്കു മുൻപ് കുടിപ്പള്ളിക്കൂടമായി ആരംഭിച്ച വിദ്യാലയമാണ് സ്വാതന്ത്ര്യാനന്തരം ഇന്നത്തെ യുപി സ്‌കൂളായി ഉയർത്തിയത്. അടിസ്ഥാന സൗകര്യങ്ങൾ വേണ്ടുവോളം ഉണ്ടെങ്കിലും സ്‌കൂളിൽ കുട്ടികളുടെ എണ്ണത്തിൽ വർഷങ്ങളായി ഈ നില തുടരുകയാണ്. ഇതിനൊരു മാറ്റം വരണം. അതിനായുള്ള കാത്തിരിപ്പിലാണ് അധ്യാപകർ.
മുഖച്ഛായ മാറ്റി പൊതുവിദ്യാലയങ്ങൾ: വർണാഭമായ പ്രവേശനോത്സവമാണ് സംസ്ഥാനത്തുടനീളം സംഘടിപ്പിച്ചത്. മലയിൻകീഴ് വൊക്കേഷണൽ ഹയർ സെക്കൻഡറി സ്‌കൂളിൽ മുഖ്യമന്ത്രി പിണറായി വിജയനാണ് പ്രവേശനോത്സവത്തിന്‍റെ സംസ്ഥാന തല ഉദ്‌ഘാടനം നിർവഹിച്ചത്. സംസ്ഥാനത്തെ പൊതുവിദ്യാലയങ്ങളുടെ മുഖച്ഛായ മാറ്റാൻ കഴിഞ്ഞത് വലിയ നേട്ടമാണെന്ന് ചടങ്ങിൽ മുഖ്യമന്ത്രി പിണറായി വിജയൻ പറഞ്ഞു.
അറ്റകുറ്റപ്പണികൾ നടക്കാതെ പൊട്ടിപ്പൊളിഞ്ഞതും അപകടാവസ്ഥയിലുള്ളതുമായ കെട്ടിടങ്ങളും ഇരിപ്പിടങ്ങളുമടക്കം സൗകര്യമില്ലാത്ത സ്ഥിതിയായിരുന്നു മുൻപ് സ്‌കൂളുകൾക്കെന്നും എന്നാൽ ഇന്ന് ആ സ്ഥിതിയൊക്കെ മാറി സ്‌കൂളുകൾ മികച്ച നിലവാരത്തിലേക്ക് ഉയർന്നുവെന്നും മുഖ്യമന്ത്രി പറഞ്ഞു.
ആയിരക്കണക്കിന് കോടി രൂപയാണ് പൊതുവിദ്യാഭ്യാസ മേഖലയെ ശക്തിപ്പെടുത്താൻ ചെലവഴിച്ചതെന്നും മുഖ്യമന്ത്രി വ്യക്തമാക്കി. ഇതിന്‍റെ ഉണർവ് കുട്ടികളിൽ പ്രകടമാണെന്നും ഇതിലൂടെ പൊതുവിദ്യാലയങ്ങളിൽ നിന്ന് വിദ്യാർഥികൾ കൊഴിഞ്ഞുപോകുന്നത് ഒഴിവാക്കാൻ കഴിഞ്ഞുവെന്നും അദ്ദേഹം വ്യക്തമാക്കി.
2016ല്‍ അഞ്ച് ലക്ഷത്തോളം വിദ്യാർഥികളാണ് പൊതുവിദ്യാലയങ്ങളിൽ നിന്ന് കൊഴിഞ്ഞുപോയത്. എന്നാൽ ഏഴ് വർഷം കൊണ്ട് 10 ലക്ഷത്തിലധികം വിദ്യാർഥികൾ പൊതുവിദ്യാലയത്തിൽ തിരികെ എത്തിച്ചേർന്നുവെന്നും പൊതുവിദ്യാഭ്യാസ മേഖലയിൽ വന്ന മാറ്റമാണ് ഇതിലൂടെ പ്രകടമാക്കുന്നതെന്നും മുഖ്യമന്ത്രി കൂട്ടിച്ചേർത്തു.
ALSO READ: 'സംസ്ഥാനത്തെ പൊതുവിദ്യാലയങ്ങളുടെ മുഖച്ഛായ മാറ്റാനായത് വലിയ നേട്ടം': മുഖ്യമന്ത്രി
