തിരുവനന്തപുരം: പൗരത്വ നിയമം വിജ്ഞാപനം ചെയ്യരുതെന്ന് കേന്ദ്രത്തോട് ആവശ്യപ്പെടണമെന്ന് പ്രതിപക്ഷം. ഇക്കാര്യം നാളെ ചേരുന്ന പ്രത്യക നിയമസഭാ സമ്മേളനത്തിൽ ചര്‍ച്ച ചെയ്യണമെന്ന് ആവശ്യപ്പെട്ട് പ്രതിപക്ഷ നേതാക്കൾ സ്പീക്കര്ക്ക് കത്ത് നല്‍കി.
പൗരത്വ ഭേദഗതി നിയമത്തിനെതിരായുള്ള പ്രമേയം പാസാക്കാനാണ് പ്രത്യേക നിയമസഭാ സമ്മേളനം ചേരുന്നത്. മുഖ്യമന്ത്രി പിണറായി വിജയന്‍ വിളിച്ചു ചേര്‍ത്ത സര്‍വകക്ഷി യോഗത്തിന്റെ തീരുമാന പ്രകാരമാണ് സമ്മേളനം. മുഖ്യമന്ത്രി അവതരിപ്പിക്കുന്ന പ്രമേയം ഏകകണ്ഠമായി പാസാക്കാനായിരുന്നു യോഗത്തിന്റെ തീരുമാനം. പൗരത്വ ഭേദഗതി നിയമത്തില്‍ കേന്ദ്രം കൊണ്ടുവന്ന പുതിയ ഭേദഗതി പിന്‍വലിക്കണമെന്ന പ്രമേയമാകും സര്‍ക്കാര്‍ അവതരിപ്പിക്കുക. ഇതിനിടയിലാണ് പുതിയ ആവശ്യവുമായി പ്രതിപക്ഷം രംഗത്ത് വന്നിരിക്കുന്നത്.
പുതിയ ഭേദഗതി സംബന്ധിച്ച് കേന്ദ്രസര്‍ക്കാര്‍ വിഞ്ജാപനമിറക്കാത്തതിനാല്‍ നടപടികള്‍ പിന്‍വലിക്കണമെന്നാണ് പ്രതിപക്ഷത്തിന്‍റെ ആവശ്യം. ഇക്കാര്യ കാണിച്ച് പ്രതിപക്ഷ നേതാവ് രമേശ് ചെന്നിത്തലയും വി.ഡി.സതീശന്‍ എംഎല്‍എയും ചേർന്നാണ് സ്പീക്കര് ശ്രീരാമകൃഷ്ണന് കത്ത് നല്‍കിയത്. പൗരത്വ നിയമ ഭേദഗതി ഭരണഘടനാ വിരുദ്ധവും രാജ്യത്തിന്റെ വിശാല താത്പര്യങ്ങള്‍ക്ക് എതിരുമാണെന്നും കത്തില്‍ പ്രതിപാദിക്കുന്നു.
എന്നാല്‍ ഈ കത്ത് നാളത്തെ സമ്മേളനത്തില്‍ അംഗീകരിക്കാന്‍ സാധ്യതയില്ല. സര്‍ക്കാര്‍ തീരുമാനം അനുസരിച്ച് മുന്നോട്ട് പോകാനാകും സ്പീക്കര് ശ്രമിക്കുക. പട്ടികജാതി പട്ടികവര്‍ഗ സംവരണം പത്ത് വര്‍ഷം കൂടി നീട്ടാനുള്ള സമ്മേളനത്തിലാണ് പൗരത്വ ഭേദഗതി നിയമത്തിനെതിരായ പ്രതിഷേധം സുപ്രധാന വിഷയമായി ഉള്‍പ്പെടുത്തിയിരിക്കുന്നത്.
