തിരുവനന്തപുരം : ചാല മാര്‍ക്കറ്റില്‍ തിങ്ങി പാര്‍ക്കുന്ന അതിഥി തൊഴിലാളികളെ സുരക്ഷിതയിടത്തേക്ക് മാറ്റുമെന്ന മന്ത്രി വി.ശിവന്‍കുട്ടിയുടെ വാഗ്‌ദാനം വാക്കിലൊതുങ്ങി. ഇക്കഴിഞ്ഞ ജനുവരിയിലാണ് അതിഥി തൊഴിലാളികള്‍ക്ക് മന്ത്രി മെച്ചപ്പെട്ട പാര്‍പ്പിട സൗകര്യം വാഗ്‌ദാനം ചെയ്‌തത്. ചാല മാര്‍ക്കറ്റിലെ റെയിന്‍ബോ പ്ലാസയില്‍ തിങ്ങി പാര്‍ക്കുന്ന അതിഥി തൊഴിലാളികള്‍ക്കാണ് മന്ത്രി സുരക്ഷിതയിടം വാഗ്‌ദാനം ചെയ്‌തത്. അതിന് കാരണമായാതാകട്ടെ മാര്‍ക്കറ്റിലുണ്ടായ തീപിടിത്തം.
മന്ത്രിയെത്തി പാര്‍പ്പിടം വാഗ്‌ദാനം ചെയ്യാനുണ്ടായ സാഹചര്യം : നൂറ് കണക്കിന് തൊഴിലാളികള്‍ താമസിക്കുന്ന റെയിന്‍ബോ പ്ലാസയിലെ ടെറസില്‍ ഇക്കഴിഞ്ഞ ജനുവരിയിലാണ് ഗ്യാസ് സിലിണ്ടറിന് തീപിടിച്ചത്. ഇതേ തുടര്‍ന്ന് അഗ്‌നി ശമന സേന സ്ഥലത്തെത്തിയെങ്കിലും അപ്പോഴേക്കും തൊഴിലാളികള്‍ തീ നിയന്ത്രണ വിധേയമാക്കിരുന്നു.
ടെറസില്‍ തിങ്ങിപ്പാര്‍ക്കുന്ന തൊഴിലാളികളുടെ അവസ്ഥകളെ കുറിച്ചും ടെറസിലെ ദുരിത ജീവിതത്തെ കുറിച്ചുമുള്ള വിവരം അഗ്‌നിശമന സേനയാണ് പുറത്തെത്തിച്ചത്. നൂറുകണക്കിന് ആളുകള്‍ തിങ്ങിപ്പാര്‍ക്കുന്ന ടെറസില്‍ ഓരോരുത്തര്‍ക്കും ഓരോ ഗ്യാസ് സിലിണ്ടറുകള്‍ വീതമുണ്ട്. അതില്‍ ഒരെണ്ണത്തിലാണ് തീപിടിത്തമുണ്ടായത്. തീ നിയന്ത്രണ വിധേയമാക്കാനായത് വലിയ അപകടമാണ് ഒഴിവാക്കിയത്.
ടെറസിന് തുച്ഛമായ വാടക മാത്രം: റെയിന്‍ബോ പ്ലാസയിലെ ടെറസില്‍ നിരവധി അതിഥി തൊഴിലാളികളാണ് തിങ്ങി പാര്‍ക്കുന്നത്. ആളൊന്നിന് വളരെ തുച്ഛമായ വാടകയാണ് വാങ്ങുന്നത് എന്നതാണ് കൂടുതല്‍ തൊഴിലാളികളെ ഇത്തരം സാഹചര്യങ്ങളിലേക്ക് എത്തിക്കുന്നത്. അടിസ്ഥാന സൗകര്യങ്ങളോ അടുക്കളയോ ഇല്ല.
ശുചിമുറിയില്‍ വച്ചാണ് പാചകം ചെയ്യാനുള്ള പച്ചക്കറികളും മറ്റും കഴുകി വൃത്തിയാക്കുന്നത്. ഷീറ്റിട്ട ടെറസിന് സമീപത്ത് കൂടി കടന്നുപോകുന്ന ഇലക്‌ട്രിക് കമ്പികളും ഏറെ അപകട സാധ്യതയുള്ളതാണ്.
സംഭവം വാര്‍ത്തയായതോടെ മന്ത്രിയും സംഘവും പറന്നെത്തി : തൊഴിലാളികളുടെ ടെറസിലെ ദുരിത ജീവിതത്തെ കുറിച്ചുള്ള വാര്‍ത്ത പുറത്ത് വന്നതോടെയാണ് മന്ത്രി വി. ശിവന്‍കുട്ടിയും മേയര്‍ ആര്യ രാജേന്ദ്രനും അടങ്ങുന്ന സംഘം സ്ഥലം സന്ദര്‍ശിച്ചത്. ഇതേ തുടര്‍ന്നാണ് തൊഴിലാളികളെ സുരക്ഷിതയിടത്തേക്ക് മാറ്റുമെന്ന് മന്ത്രി പറഞ്ഞത്. സുരക്ഷിതമല്ലാത്ത വൃത്തിഹീനമായ സാഹചര്യത്തില്‍ കഴിയുന്നത് അപകടമാണെന്ന് കലക്‌ടര്‍ അനുകുമാരി ഐഎഎസ്‌ തൊഴിലാളികളോട് പറഞ്ഞിരുന്നു.
കെട്ടിട ഉടമയോട് അതിഥി തൊഴിലാളികളെ മാറ്റണമെന്നാവശ്യപ്പെട്ട് നഗരസഭ നോട്ടിസ് അയച്ചെങ്കിലും തുടര്‍ നടപടികളൊന്നും തന്നെ ഉണ്ടായില്ല. എന്നാല്‍ ഇതിനെല്ലാം കഴിഞ്ഞ് നാല് മാസം പിന്നിട്ടിട്ടും വാഗ്‌ദാനങ്ങളൊന്നും പാലിക്കപ്പെട്ടില്ലെന്ന് മാത്രമല്ല തൊഴിലാളികള്‍ തങ്ങളുടെ ദുരിത ജീവിതം തുടരുകയുമാണ്.
മറ്റിടങ്ങളിലെ അവസ്ഥയും സമാനം : റെയിന്‍ബോ പ്ലാസയിലെ മാത്രം അവസ്ഥയല്ലിത്. സബാപതി സ്ട്രീറ്റ്, കൊത്തുവാള്‍ സ്ട്രീറ്റ്, റൂബി നഗര്‍ എന്നിവിടങ്ങളിലും സ്ഥിതി സമാനമാണ്. നിര്‍മാണ മേഖലയിലെ തൊഴിലാളികളാണ് യാതൊരു സുരക്ഷാസംവിധാനങ്ങളുമില്ലാതെ ജീവിതം നയിക്കുന്നത്.
തിങ്ങി നിറഞ്ഞ കെട്ടിടങ്ങളുടെ ടെറസുകളിലെ ഈവിധമുള്ള താമസം ഏറെ അപകട സാധ്യതയുള്ളതാണ്.
