കോട്ടയം : എൽ ഡി എഫ് കൺവീനർ ഇ പി ജയരാജന്‍റെ വെല്ലുവിളി താൻ സ്വീകരിക്കുന്നുവെന്ന് പ്രതിപക്ഷനേതാവ് വി ഡി സതീശൻ. മുഖ്യമന്ത്രിക്കെതിരായ പ്രതിഷേധം തുടരുമെന്നും തന്നെ തടയാമെന്നും പ്രതിപക്ഷ നേതാവ് കോട്ടയത്ത് മാധ്യമങ്ങളോട് പറഞ്ഞു. മുഖ്യമന്ത്രിക്കെതിരെ യൂത്ത് കോണ്‍ഗ്രസുകാര്‍ കരിങ്കൊടി പ്രതിഷേധം തുടര്‍ന്നാല്‍ പ്രതിപക്ഷ നേതാവിന് പുറത്തിറങ്ങാന്‍ കഴിയില്ലെന്ന് കഴിഞ്ഞ ദിവസം ഇ പി ജയരാജൻ മാധ്യമങ്ങളോട് പറഞ്ഞിരുന്നു. ഇതിന് മറുപടിയായാണ് പ്രതിപക്ഷ നേതാവിന്‍റെ പ്രസ്‌താവന.
'ഞാൻ മുഖ്യമന്ത്രിയെ പോലെ പോലീസ് സംരക്ഷണയിൽ ഓടി ഒളിക്കുന്ന ആളല്ല. ഒരു പൊലീസുകാരന്‍റെ അകമ്പടി പോലുമില്ലാതെ കേരളത്തിൽ കാസർകോട് മുതൽ തിരുവനന്തപുരം വരെ ഞാൻ യാത്ര ചെയ്യും. എന്തായാലും എൽ ഡി എഫ് കൺവീനർ പിണറായി സർക്കാരിനെ രക്ഷപ്പെടുത്താനല്ല കൂടുതൽ ബുദ്ധിമുട്ടിക്കാനാണ് വന്നിരിക്കുന്നത്. അജ്ഞാത വാസത്തിനുശേഷമുള്ള ഇപി ജയരാജന്‍റെ ഇപ്പോഴത്തെ വരവ് എൽ ഡി എഫ് സർക്കാരിനെ കൂടുതൽ പ്രതിസന്ധിയിലാക്കും' - പ്രതിപക്ഷ നേതാവ് പറഞ്ഞു.
കേരള രാഷ്ട്രീയത്തിൽ പ്രവർത്തിക്കുന്ന ഒരാൾ ഒരിക്കലും പറയാൻ പാടില്ലാത്ത വാക്കുകളാണ് എം വി ജയരാജൻ ഏഷ്യാനെറ്റ് ന്യൂസിലെ മാധ്യമപ്രവർത്തകനെ കുറിച്ച് പറഞ്ഞത്. മാധ്യമപ്രവർത്തകന്‍റെ പിതൃത്വത്തെ വരെ അദ്ദേഹം ചോദ്യം ചെയ്‌തുവെന്നും പ്രതിപക്ഷ നേതാവ് കൂട്ടിച്ചേർത്തു. എൽ ഡി എഫ് ജാഥയോടനുബന്ധിച്ച് പാലാ ബസ്‌ സ്‌റ്റാൻഡ് അടച്ചുപൂട്ടിയത് അധികാര ദുർവിനിയോഗം ഒന്നുകൊണ്ട് മാത്രമാണ്.
നിലവിലെ കേരള സാഹചര്യത്തിൽ ഭരണം കയ്യാളുന്ന എൽ ഡി എഫിന് എന്തും ചെയ്യാം എന്ന നിലയിലാണ് കാര്യങ്ങള്‍. പാർട്ടിക്കും അതിന് കീഴിലുള്ള പ്രസ്ഥാനങ്ങൾക്കും എന്ത് ധിക്കാരവും തോന്നിവാസവും ചെയ്യാനുള്ള ലൈസൻസ് ആണ് സർക്കാർ കൊടുത്തിരിക്കുന്നതെന്നും വി ഡി സതീശൻ ആരോപിച്ചു.
പ്രതിഷേധത്തിനെതിരെ ഇ പിയുടെ താക്കീത് : മുഖ്യമന്ത്രിക്കെതിരായ കരിങ്കൊടി സമരം തുടരുകയാണെങ്കില്‍ സ്ഥിതി മോശമാകുമെന്ന് സിപിഎം കേന്ദ്ര കമ്മറ്റി അംഗവും എൽഡിഎഫ് കൺവീനറുമായ ഇ പി ജയരാജൻ കഴിഞ്ഞ ദിവസം പ്രതിപക്ഷത്തിന് താക്കീത് നൽകിയിരുന്നു. സ്ഥിതിഗതികൾ തുടർന്നാൽ പ്രതിപക്ഷ നേതാവിന് പുറത്തിറങ്ങാനാകില്ലെന്നും ജയരാജന്‍ ശനിയാഴ്‌ച മുന്നറിയിപ്പ് നല്‍കി.
നിലവിലെ പ്രതിപക്ഷത്തിന്‍റെ സമരം അനാവശ്യമാണെന്നും കേരള സര്‍ക്കാര്‍ പിരിക്കുന്ന രണ്ട് രൂപ സെസ് 62 ലക്ഷം ജനങ്ങളിലേക്ക് വിന്യസിക്കുകയാണ് എന്നുള്ള കാര്യം മറക്കരുതെന്നും ഇ പി പറഞ്ഞു. കേരളത്തിന്‍റെ സകല ഉത്പാദനമേഖലയേയും വാണിജ്യത്തെയും ശക്തിപ്പെടുത്തുന്ന ഇത്തരം സമീപനത്തെക്കുറിച്ച് ആദ്യം കോണ്‍ഗ്രസ് പഠിക്കണമെന്നും ഇപി ജയരാജൻ ആവശ്യപ്പെട്ടു.
മുഖ്യമന്ത്രിക്കെതിരായ കരിങ്കൊടി പ്രതിഷേധങ്ങളോട് പ്രതികരിച്ച ഇ പി പെണ്‍കുട്ടികൾ ഷർട്ടും പാന്‍റും ധരിച്ച് ആൺകുട്ടികളെന്ന് തെറ്റിധരിപ്പിച്ച് സമരത്തിനിറങ്ങുന്നുണ്ട് എന്നുള്ള പ്രയോഗവും നടത്തുകയുണ്ടായി. കരിങ്കൊടി കൊണ്ട് നടക്കുന്നത് എന്തിനാണ് എന്ന് പോലും ഇവർക്ക് അറിയില്ല എന്നും പാചകവാതകത്തിന്‌ ഇത്രമാത്രം വില വര്‍ധിപ്പിച്ചപ്പോൾ ആർക്കും പ്രതിഷേധം ഇല്ലല്ലോയെന്നും ജയരാജന്‍ ചോദിച്ചു.
തീപിടിത്തം മനപ്പൂർവം സൃഷ്‌ടിച്ചത് : അതേസമയം ബ്രഹ്മപുരം മാലിന്യ പ്ലാൻ്റിലെ തീപിടിത്തം മനപ്പൂർവം സൃഷ്‌ടിച്ചതാണെന്ന് വി ഡി സതീശൻ നിയമസഭയിൽ ആരോപിച്ചിരുന്നു. കൊച്ചിയിൽ ഗുരുതരമായ സാഹചര്യമാണ് നിലനിൽക്കുന്നതെന്നും കാര്യക്ഷമമായ ഇടപെടൽ സർക്കാരിന്‍റെ ഭാഗത്തുനിന്ന് ഉണ്ടായില്ലെന്നും പറഞ്ഞ വി ഡി സതീശൻ തീപിടിത്തത്തിൽ ഹൈക്കോടതിയുടെ മേൽനോട്ടത്തിൽ അന്വേഷണം വേണമെന്ന് സബ്‌മിഷനിലൂടെ ആവശ്യപ്പെടുകയും ചെയ്‌തിരുന്നു.
