വിജയഗാഥ കുറിച്ച് കാട്ടാക്കടയിൽ കൊയ്ത്തുത്സവം

തരിശായ ഭൂമികൾ ഉൾപ്പെടെ പാട്ടത്തിനെടുത്ത് കൃഷിയിറക്കി കാർഷിക സമ്പത്ത് വർദ്ധിപ്പിക്കുക എന്ന ലക്ഷ്യത്തോടെയാണ് കർമ്മസേന പ്രവർത്തനമാരംഭിച്ചത്

തിരുവനന്തപുരം: തരിശ് ഭൂമികൾ ഉൾപ്പെടെ പാട്ടത്തിനെടുത്ത് കൃഷി ഇറക്കിയ കാർഷിക കർമ്മസേന വിജയഗാഥ കുറിച്ച് കാട്ടാക്കടയിൽ കൊയ്ത്തുൽസവം സംഘടിപ്പിച്ചു. മൂന്നു വർഷം മുൻപാണ് കാട്ടാക്കടയിൽ തരിശായ ഭൂമികൾ ഉൾപ്പെടെ പാട്ടത്തിനെടുത്ത് കൃഷിയിറക്കി കാർഷിക സമ്പത്ത് വർദ്ധിപ്പിക്കുക എന്ന ലക്ഷ്യത്തോടെ കാർഷിക കർമ്മസേനയുടെ പ്രവർത്തനമാരംഭിക്കുന്നത്. 70 സെന്‍റ് വയൽ പാട്ടത്തിനെടുത്ത് തുടക്കമിട്ട കർമ്മസേന ഇപ്പോൾ ഗ്രാമപഞ്ചായത്തിലെ ഏഴര ഏക്കറിലധികം പാടങ്ങളിൽ സജീവമായ കൃഷിയിലാണ്. ഇവിടെ നിന്നും സംഭരിക്കുന്ന നെല്ല് കാട്ടാൽ കുത്തരി എന്ന ബ്രാന്‍റിൽ കാട്ടാക്കട പഞ്ചായത്തിന്‍റ നേതൃത്വത്തിൽ വിപണിയിലെത്തിക്കുന്നതിനും ലക്ഷ്യമിടുന്നുണ്ട്. അത്യുല്‌പാദന ശേഷിയുള്ള പ്രത്യാശ ഇനത്തിലുള്ള നെൽ ചെടികളാണ് ഇവിടെ കൃഷിയിറക്കിയത്.

ഇളവൻ കോട്, ആമച്ചൽ ഏലകളിൽ വിജയകരമായി കൃഷി തുടരുന്ന കർമ്മ സേനയുടെ നേതൃത്വത്തിൽ തരിശായിക്കിടക്കുന്ന നാഞ്ചല്ലൂർ ഏല ഉൾപ്പെടെ എറ്റെടുത്ത് 50 ഏക്കറോളം പ്രദേശത്ത് കൃഷി വ്യാപിപ്പിച്ച് കാട്ടാക്കടയെ തലസ്ഥാനത്തെ നെല്ലറ ആക്കാനുള്ള ശ്രമത്തിലാണെന്ന് കൊയ്ത്തുത്സവം ഉദ്ഘാടനം ചെയ്‌തുകൊണ്ട് കാട്ടാക്കട എംഎൽഎ ഐ.ബി. സതീഷ് പറഞ്ഞു. കാട്ടാക്കട ഗ്രാമ പഞ്ചായത്ത് വൈസ് പ്രസിഡന്‍റ് ശരത്ചന്ദ്രൻ നായർ, വെള്ളനാട് ബ്ലോക്ക് പഞ്ചായത്ത് വികസനകാര്യ സ്‌റ്റാന്‍റിംഗ് കമ്മിറ്റി ചെയർമാൻ ജി.സ്‌റ്റീഫൻ, ഗ്രാമ പഞ്ചായത്തംഗങ്ങളായ സുനിത, ശ്രീരേഖ, സതീന്ദ്രൻ, കാർഷിക കർമ്മ സേന ഭാരവാഹികളായ കാട്ടാക്കട രാമു, ജനാർദ്ധനൻ നായർ എന്നിവർ പങ്കെടുത്തു.