തിരുവനന്തപുരം: സ്‌കൂളിലെ അവസാന ദിനം ആഘോഷങ്ങൾ അതിരുവിടുന്ന സംഭവങ്ങൾ പതിവായതോടെ കർശന നിർദ്ദേശവുമായി പൊതു വിദ്യാഭ്യാസ വകുപ്പ്. ആഹ്ളാദ പ്രകടനങ്ങൾക്കായി സ്‌കൂളിലെ ഫർണിച്ചറുകൾ സാധന സാമഗ്രികൾ എന്നിവ കേടു വരുത്തുകയോ നശിപ്പിക്കുകയോ ചെയ്യാതിരിക്കുന്നതിന് ക്ലാസ് അധ്യാപകരും പ്രധാന അധ്യാപകരും പ്രത്യേകം ശ്രദ്ധിക്കണമെന്ന് പൊതു വിദ്യാഭ്യാസ വകുപ്പ് അറിയിച്ചു. ഇത്തരം പ്രവർത്തികൾ ഉണ്ടാക്കുന്ന വിദ്യാർത്ഥികളിൽ നിന്നും അതിനുള്ള നഷ്‌ടപരിഹാരം ഈടാക്കുന്നതിനും കർശന നടപടി സ്വീകരിക്കാൻ പ്രധാന അധ്യാപകർക്കും പ്രിൻസിപ്പൽമാർക്കും നൽകിയ ഉത്തരവിൽ പൊതു വിദ്യാഭ്യാസ ഡയറക്‌ടർ നിർദ്ദേശിച്ചിട്ടുണ്ട്.
ചൂട് പിടിച്ച പരീക്ഷ കാലത്തിന് ശേഷം കേരളത്തില്‍ ഇന്ന് പൊതു പരീക്ഷകൾ അവസാനിക്കുകയാണ്. നീണ്ട രണ്ട് മാസത്തെ വേനലവധിക്കായി മാർച്ച് 31ന് സ്‌കൂളുകൾ അടക്കും. എസ്എസ്എൽസി പരീക്ഷകളും ഇന്ന് അവസാനിക്കും.
സ്‌കൂളുകൾ അടയ്ക്കുന്ന അവസാന ദിവസം ആഘോഷങ്ങൾ പതിവാണ്. പലപ്പോഴും ആഘോഷങ്ങൾ അതിരു വിടുന്ന കാഴ്‌ചകളാണ് നമുക്ക് കാണാനാവുക. ഇത്തവണ ആഘോഷങ്ങൾ നിലക്ക് നിർത്താൻ പൊതു വിദ്യാഭ്യാസ വകുപ്പിന്‍റെ നിർദ്ദേശങ്ങൾ കൂടി വന്നതോടെ നിയന്ത്രണങ്ങൾ കർശനമാകും. അധ്യാപകരുടെ നേതൃത്വത്തിൽ പരിശോധനകളും ഉണ്ടാവാൻ സാധ്യതയുമുണ്ട്.
419362 വിദ്യാർത്ഥികളാണ് ഇത്തവണ എസ്എസ്എൽസി പരീക്ഷ എഴുതിയത്. എസ്‌എസ്എസ്എൽസി പരീക്ഷയുടെ മൂല്യനിർണയം ഏപ്രിൽ 3ന് ആരംഭിക്കും. 26 ഓടുകൂടി മൂല്യനിർണയം പൂർത്തിയാക്കി മെയ് ആദ്യവാരത്തിൽ തന്നെ ഫലം പ്രഖ്യാപിക്കും എന്നാണ് പൊതുവിദ്യാഭ്യാസ വകുപ്പ് അറിയിച്ചിട്ടുള്ളത്.
