തിരുവനന്തപുരം: എല്ലാ ദിവസവും കടകള്‍ തുറക്കാന്‍ അനുവദിക്കണമെന്ന വ്യാപാരികളുടെ ആവശ്യം ചർച്ച ചെയ്യാൻ മുഖ്യമന്ത്രി വിളിച്ച വ്യാപാരി വ്യവസായി പ്രതിനിധികളുടെ യോഗം വെള്ളിയാഴ്‌ച (ജൂലൈ 16). ബക്രീദ് വരെ എല്ലാ ദിവസവും കടകള്‍ തുറക്കാന്‍ അനുവദിക്കണമെന്നാണ് വ്യാപാരികളുടെ ആവശ്യം.
സർക്കാർ അനുമതി നൽകിയില്ലെങ്കിൽ സ്വമേധയാ എല്ലാ ദിവസവും കടകള്‍ തുറക്കുമെന്ന വ്യാപാരി വ്യവസായി ഏകോപന സമിതിയുടെ മുന്നറിയിപ്പും തുടര്‍ന്ന് മുഖ്യമന്ത്രി വാര്‍ത്താ സമ്മേളനത്തില്‍ നടത്തിയ ഭീഷണി കലര്‍ന്ന പ്രസ്‌താവനയ്ക്കും പിന്നാലെയാണ് സര്‍ക്കാര്‍-വ്യാപാരി അനുനയ നീക്കം.
മുഖ്യമന്ത്രിയുമായുള്ള ചര്‍ച്ചയ്ക്ക് മുന്നോടിയായും അതിന് ശേഷവും വ്യാപാരി വ്യവസായി സംസ്ഥാന സെക്രട്ടേറിയറ്റ് യോഗം ചേര്‍ന്ന് മറ്റ് കാര്യങ്ങള്‍ തീരുമാനിക്കും. വ്യാഴാഴ്‌ച നടന്ന മന്ത്രിസഭാ യോഗത്തില്‍ ഇളവുകള്‍ സംബന്ധിച്ച തീരുമാങ്ങളുണ്ടാകുമെന്ന് പ്രതീക്ഷിച്ചിരുന്നെങ്കിലും യോഗം ഇക്കാര്യം പരിഗണനയ്‌ക്കെടുത്തിരുന്നില്ല.
Also Read: അഗതിരഹിത കേരളം; അതിദരിദ്രരെ കണ്ടെത്തുന്നതിനുള്ള മാര്‍ഗരേഖക്ക് അംഗീകാരം
സ്വമേധയാ കടതുറക്കുമെന്ന വ്യാപാരി വ്യാവസായി ഏകോപന സമിതിയുടെ മുന്നറിയിപ്പിന് കോണ്‍ഗ്രസ് പിന്തുണ പ്രഖ്യാപിച്ചതോടെയാണ് സര്‍ക്കാരിന്‍റെ മനംമാറ്റം. നിയന്ത്രണങ്ങളോട് പൂര്‍ണമായി സഹകരിച്ചിരുന്ന പ്രതിപക്ഷം ഇപ്പോള്‍ പിന്തുണ പിന്‍വലിച്ചാലുണ്ടാകാൻ ഇടയുള്ള ജനരോഷവും സര്‍ക്കാരിന്‍റെ മനം മാറ്റത്തിന് കാരണമാണ്.
സാധാരണ ഗതിയില്‍ എല്ലാ ചൊവ്വാഴ്‌ചകളിലും ചേരുന്ന കൊവിഡ് അവലോകന യോഗവും നിലവിലത്തെ പശ്ചാത്തലം പരിഗണിച്ച് ശനിയാഴ്‌ച ചേരാൻ സര്‍ക്കാര്‍ തീരുമാനിച്ചിട്ടുണ്ട്. ഈ യോഗത്തില്‍ കൂടുതല്‍ ഇളവുകള്‍ പ്രഖ്യാപിക്കാന്‍ സര്‍ക്കാര്‍ തയ്യാറായേക്കുമെന്നാണ് സൂചന.
