പത്തനംതിട്ട : കെഎസ്‌ആര്‍ടിസിയുടെ പത്തനംതിട്ട- ബെംഗളൂരു ബസില്‍വച്ച്‌ യാത്രക്കാരിയെ പീഡിപ്പിക്കാന്‍ ശ്രമിച്ചെന്ന പരാതിയിൽ കെഎസ്ആര്ടിസി ഡ്രൈവര്‍ക്ക് സസ്പെന്‍ഷന്‍. പത്തനംതിട്ട ഡിപ്പോയിലെ ഡ്രൈവർ കം കണ്ടക്‌ടർ പി.എ ഷാജഹാനെയാണ് സർവീസില്‍ നിന്നും അന്വേഷണ വിധേയമായി സസ്പെൻഡ് ചെയ്‌തത്. പെൺകുട്ടി കെഎസ്ആര്‍ടിസിക്ക് നൽകിയ പരാതിയിലാണ് നടപടി.
കഴിഞ്ഞ 17 ന് പത്തനംതിട്ട-ബെംഗളൂരു റൂട്ടിൽ സർവീസ് നടത്തിയ കെഎസ്ആര്ടിസി സൂപ്പര്‍ ഡീലക്‌സ് ബസിലായിരുന്നു സംഭവം. സംഭവ ശേഷം പരാതിക്കാരിയെ ഇയാൾ ഫോൺ മുഖേന ബന്ധപ്പെടാൻ ശ്രമിച്ചിരുന്നു. എന്നാൽ പ്രതികരിക്കാത്തതിനാൽ വാട്ട്സ് ആപ്പിൽ വോയ്‌സ് മെസേജ് അയക്കുകയും ചെയ്തു. സ്ഥാപനത്തിന്‍റെ അറിവോ സമ്മതമോ കൂടാതെ വാർത്താ മാധ്യമങ്ങളിൽ സംഭവത്തെക്കുറിച്ച് അഭിപ്രായപ്രകടനം നടത്തുകയും ചെയ്തിരുന്നു.
വാട്ട്സ് ആപ്പിലൂടെ ഭീഷണിപ്പെടുത്തി പരാതിക്കാരിയെ സ്വാധീനിക്കാൻ ശ്രമിച്ചുവെന്ന് അന്വേഷണത്തിൽ ബോധ്യപ്പെട്ടിരുന്നു. സസ്പെൻഡ് ചെയ്യപ്പെട്ടുവെന്ന് വോയ്‌സ് മെസേജിലൂടെ പറഞ്ഞത് കളവാണെന്നും, കോടതിയിൽ പോകുമെന്നും, പ്രസ് മീറ്റ് നടത്തുമെന്നും പറഞ്ഞത് ഭീഷണിയുടെ ഭാഗമാണെന്നും പ്രാഥമിക അന്വേഷണത്തിൽ കണ്ടെത്തിയിട്ടുണ്ട്.
വാർത്താമാധ്യമങ്ങളിൽ ഇയാള്‍ നടത്തിയ അഭിപ്രായ പ്രകടനങ്ങൾ പരാതിക്കാരിക്കും, സ്ഥാപനത്തിനും അപകീർത്തിവരുത്തുന്നതും, വസ്‌തുതാവിരുദ്ധവുമാണ്. യാത്രക്കാരെ സംരക്ഷിക്കാൻ ബാധ്യസ്ഥനായ ബസ് ജീവനക്കാരന്‍റെ ഭാഗത്ത് നിന്നുള്ള പ്രവർത്തി കുറ്റകരമാണെന്ന് പ്രാഥമിക അന്വേഷണത്തിൽ കണ്ടെത്തി. തുടർന്നാണ് സസ്പെൻഡ് ചെയ്‌തതെന്ന് കെഎസ്ആർടിസി അറിയിച്ചു.
സഹായിക്കാനെത്തി പീഡനം : കഴിഞ്ഞ വെള്ളിയാഴ്‌ച വൈകിട്ട് പത്തനംതിട്ടയില്‍ നിന്ന് ബെംഗളൂരുവിലേക്ക് പോകുകയായിരുന്ന ബസിലായിരുന്നു സംഭവം. പുലര്‍ച്ചെ കൃഷ്ണഗിരിക്ക് സമീപം ബസ് എത്തിയപ്പോഴാണ് പീഡന ശ്രമം ഉണ്ടായത്. ബസിന്‍റെ ജനല്‍ പാളി നീക്കാന്‍ കഴിയാതെ വന്നതോടെയാണ് പിജി വിദ്യാര്‍ഥിയായ പെണ്‍കുട്ടി ഡ്രൈവര്‍ ഷാജഹാന്‍റെ സഹായം തേടി.
എന്നാൽ ഗ്ലാസ് നീക്കാനെന്ന വ്യാജേന അടുത്തെത്തിയ ഷാജഹാന്‍ സ്വകാര്യ ഭാഗങ്ങളില്‍ സ്‌പര്‍ശിച്ചുവെന്നും പെട്ടെന്നുള്ള സംഭവത്തിന്‍റെ ആഘാതത്തില്‍ പ്രതികരിക്കാന്‍ കഴിഞ്ഞില്ലെന്നും പെൺകുട്ടിയുടെ പരാതിയില്‍ പറയുന്നു. ബെംഗളൂരുവിലെ വീട്ടിലെത്തിയ ശേഷം നടന്ന സംഭവങ്ങള്‍ കാട്ടി പെണ്‍കുട്ടി കെഎസ്ആര്ടിസി വിജിലന്‍സിന് ഇ-മെയില്‍ വഴി പരാതി നല്‍കുകയായിരുന്നു.
ALSO READ: കെ.എസ്.ആർ.ടി.സി ഡ്രൈവർക്കെതിരെ പീഡന പരാതി
വിജിലന്‍സ് ഓഫിസര്‍ പരാതി പത്തനംതിട്ട ഡിടിഒക്ക് കൈമാറിയിരുന്നു. ഷാജഹാനില്‍ നിന്നും ഡിടിഒ വിശദീകരണം തേടിയപ്പോൾ ഇങ്ങനെയൊരു സംഭവം നടന്നിട്ടില്ലെന്നായിരുന്നു മറുപടി. സംഭവത്തിന് പിന്നാലെ ആരോപണം തള്ളി ഇയാൾ രംഗത്ത് എത്തിയിരുന്നു. തുടർന്ന് നടത്തിയ അന്വേഷണത്തിലാണ് കുറ്റക്കാരനാണെന്ന് കണ്ടെത്തിയത്.
