മലപ്പുറം : വിൽപ്പനയ്ക്കായി ബെെക്കില്‍ കടത്തുകയായിരുന്ന 20 ലിറ്റർ ചാരായവുമായി രണ്ടുപേർ അറസ്റ്റില്‍. കോട്ടപ്പുറം സ്വദേശി കല്ലുവെട്ടുകുഴി സുധീഷ്(29),അരിയൂർ സ്വദേശി കുറ്റിക്കാട്ടിൽ അബ്ദുൾ മുനീർ (32) എന്നിവരാണ് പെരിന്തല്‍മണ്ണ പൊലീസിന്‍റെ പിടിയിലായത്.
ലോക്ക്‌ഡൗണ്‍ സമയത്ത് ജില്ലയുടെ അതിർത്തി പ്രദേശങ്ങൾ കേന്ദ്രീകരിച്ച് അനധികൃത വാറ്റുചാരായ നിർമ്മാണവും വിൽപ്പനയും നടക്കുന്നതായി പൊലീസിന് വിവരം ലഭിച്ചിരുന്നു. ഇതിന്‍റെ അടിസ്ഥാനത്തില്‍ പെരിന്തല്‍മണ്ണ ഡിവൈഎസ്‌പി കെഎം ദേവസ്യ, സിഐ സജിന്‍ ശശി എന്നിവരുടെ നേതൃത്വത്തിലാണ് പരിശോധന നടത്തിയത്.
also read: 'മരംമുറിക്കേസ് പ്രതികള്‍ മുഖ്യമന്ത്രിയെ കണ്ടു' ; ഫോട്ടോ പുറത്തുവിട്ട് പി.ടി തോമസ്
ചാരായം ലിറ്ററിന് 1300 രൂപ മുതലാണ് കുപ്പികളിലാക്കി വില്‍പ്പന നടത്തുന്നതെന്ന് പ്രതികള്‍ പറഞ്ഞു. ഇവരില്‍ നിന്നും ലഭിച്ച വിവരങ്ങളുടെ അടിസ്ഥാനത്തിൽ ചാരായ നിർമാണ കേന്ദ്രങ്ങളിൽ പൊലീസ് നടത്തിയ പരിശോധനയില്‍ വാറ്റുപകരണങ്ങൾ പിടിച്ചെടുത്തു. ഇത്തരത്തില്‍ പ്രവര്‍ത്തിക്കുന്ന കൂടുതല്‍ സംഘങ്ങളെ കുറിച്ച് വിവരം ലഭിച്ചതായും പരിശോധന ശക്തമാക്കുമെന്നും ഡിവൈഎസ്‌പി അറിയിച്ചു.
