മലപ്പുറം: കളങ്കമില്ലാത്ത സ്നേഹം പരസ്‌പരം പങ്കുവെക്കുന്ന ഒരു അപൂര്‍വ ചങ്ങാത്തമുണ്ട് മലപ്പുറം മമ്പാട്. കണ്ടു നില്‍ക്കുന്നവരെ പോലും അതിശയിപ്പിക്കുന്ന ഈ സ്‌നേഹ ബന്ധം മനുഷ്യനും മലയണ്ണാനും തമ്മിലാണ്. മമ്പാട് പുള്ളിപ്പാടം മണലോടി കൊല്ലപറമ്പൻ മൻസൂറിന്‍റെയും കുടുംബത്തിന്‍റെയും ഉറ്റ ചങ്ങാതിമാരാണ് മലയണ്ണാന്‍ ഇണകളായ മണിയും മുത്തുമോളും.
പേരു ചൊല്ലി വിളിച്ചാല്‍ ഉടന്‍ മുറ്റത്തെ മരത്തിന്‍റെ ശിഖരങ്ങളില്‍ ഇരുവരും ഹാജരുണ്ടാകും. വേനല്‍ക്കാലത്ത് പക്ഷികള്‍ക്കായി വീട്ടുമുറ്റത്ത് ചിരട്ടയില്‍ വച്ച വെള്ളം കുടിക്കാനാണ് ആദ്യമായി മണിയും മുത്തുമോളും മന്‍സൂറിന്‍റെ വീട്ടിലെത്തിയത്. വെള്ളം കുടിക്കാനെത്തുന്നത് പതിവായപ്പോള്‍ മന്‍സൂര്‍ ഇവര്‍ക്ക് പഴങ്ങള്‍ കൊടുത്തു.
താമസിയാതെ മന്‍സൂറിനോടും കുടുംബത്തോടും മലയണ്ണാനുകള്‍ അടുത്തു. അതോടെ മലയണ്ണാന്‍ കുടുംബം മന്‍സൂറിന്‍റെ കൃഷിയിടത്തില്‍ കൂടു കൂട്ടി താമസവും ആരംഭിച്ചു. പറമ്പിലെ തെങ്ങും, പ്ലാവും, തേക്കും എല്ലാം ഇവരുടെ വാസസ്ഥലമായി.
മന്‍സൂര്‍ മാത്രമല്ല മന്‍സൂറിന്‍റെ ഭാര്യയും മക്കളും ഇവരുടെ പ്രിയപ്പെട്ടവരാണ്. മുത്തുമോള്‍ക്ക് കൂടുതല്‍ അടുപ്പം മന്‍സൂറിന്‍റെ ഭാര്യ ബുഷ്‌റയോടാണ്. ബുഷ്‌റയെ പുറത്തു കണ്ടില്ലെങ്കില്‍, അന്വേഷിച്ച് മുത്തുമോള്‍ വീടിനുള്ളിലെത്തും. പഴങ്ങള്‍ മാത്രമല്ല ബുഷ്‌റ ഉണ്ടാക്കുന്ന ചോറും കറിയും വരെ ഇരുവരുടെയും ഇഷ്‌ട ഭക്ഷണമാണ്.
