മലപ്പുറം : ആര്യാടൻ മുഹമ്മദിന് ആദരാഞ്ജലികള്‍ അർപ്പിച്ച് കോണ്‍ഗ്രസ് നേതാവ് രാഹുൽ ഗാന്ധി. ആര്യാടന്‍റെ വസതിയിലെത്തിയാണ് രാഹുൽ അന്തിമോപചാരം അര്‍പ്പിച്ചത്. ഇന്ന് (സെപ്‌റ്റംബര്‍ 25) രാവിലെ 11.45ന് കോണ്‍ഗ്രസ് ജനറൽ സെക്രട്ടറി കെസി വേണുഗോപാൽ, പ്രതിപക്ഷ നേതാവ് വിഡി സതീശൻ, കോണ്‍ഗ്രസ് നേതാക്കളായ രമേശ് ചെന്നിത്തല, കൊടിക്കുന്നിൽ സുരേഷ് എന്നിവർക്കൊപ്പമാണ് അദ്ദേഹം എത്തിയത്.
Also Read: മുൻമന്ത്രി ആര്യാടൻ മുഹമ്മദ് അന്തരിച്ചു
അവസാനമായി പ്രിയ നേതാവിനെ ഒരുനോക്ക് കാണാൻ ആയിരക്കണക്കിന് ആളുകളാണ് വീടിന് മുന്‍പില്‍ തടിച്ചുകൂടിയത്. രമ്യ ഹരിദാസ് എംപി, ജെബി മേത്തർ എംപി, എപി അനിൽകുമാർ എംഎൽഎ, കെടി ജലീൽ, പിവി അബ്‌ദുള്‍ വഹാബ് എംപി, ഉബൈദുള്ള എംഎൽഎ, പികെ ബഷീർ എംഎൽഎ, അബ്‌ദുള്‍ ഹമീദ് എംഎൽഎ, ടിഎൻ പ്രതാപൻ എംപി തുടങ്ങിയ നേതാക്കൾ ആദരാഞ്ജലികള്‍ അർപ്പിച്ചു.
Also Read: പറയാനുള്ളത് പറഞ്ഞും പാർട്ടിയെ വളർത്തിയും വളർന്ന ആര്യാടൻ വിടപറയുമ്പോൾ
കോൺഗ്രസ് നേതാവും മുൻ മന്ത്രിയുമായ ആര്യാടൻ മുഹമ്മദിന്‍റെ (87) വിയോഗം ഇന്ന് രാവിലെയായിരുന്നു. കോഴിക്കോട്ടെ സ്വകാര്യ ആശുപത്രിയിൽ വച്ചായിരുന്നു അന്ത്യം. ആരോഗ്യ പ്രശ്‌നങ്ങളെ തുടർന്ന് ഒരാഴ്‌ചയായി ചികിത്സയിലായിരുന്നു. എഴുപത് വർഷം നീണ്ട രാഷ്‌ട്രീയ ജീവിതത്തിനാണ് വിരാമമായത്.
