മലപ്പുറം: കൊവിഡ് മറയാക്കി കഞ്ചാവ് മാഫിയ സജീവമെന്ന് മലപ്പുറം അസി. എക്സൈസ് കമ്മിഷണർ അനിൽ കുമാർ. ജില്ല കേന്ദ്രീകരിച്ച് കഞ്ചാവ് കടത്തുന്നവരെ പിടികൂടാൻ എക്സൈസ് വകുപ്പിനും പൊലീസിനും ഒരു പരിധി വരെ കഴിയുന്നുണ്ടെന്നും അദ്ദേഹം പറഞ്ഞു. കൊവിഡ് മാനദണ്ഡങ്ങൾ പാലിച്ച് പരിശോധന തുടരുമ്പോൾ ഇതിനെയെല്ലാം മറികടന്ന് കഞ്ചാവ് ലോബി അടക്കമുള്ള ക്രിമിനലുകൾ വിലസുകയാണ്. കലക്കവെള്ളത്തിൽ മീൻ പിടിക്കുക എന്ന നയമാണ് അവരുടേതെന്നും എന്നാൽ പൊലീസും, എക്സൈസും രംഗത്തിറങ്ങിയതോടെ ഇത്തരം ക്രിമിനലുകളെ പിടികൂടാൻ കഴിയുന്നുണ്ടെന്നും അദ്ദേഹം കൂട്ടിച്ചേർത്തു.
ആന്ധ്രയിലെ കടപ്പയിൽ നിന്നും സിമന്‍റ് ലോറിയിൽ കൊണ്ടുവന്ന കഞ്ചാവ് ചെറിയ വാഹനത്തിലാക്കി വണ്ടൂർ വഴി കൊച്ചിയിലേക്ക് പോകും വഴി പിടികൂടിയിരുന്നു. കഞ്ചാവ് പിടിച്ചെടുത്ത ഉദ്യോഗസ്ഥർക്ക് പ്രത്യേക അവാർഡ് നൽകുമെന്ന് ഉത്തരമേഖല ജോയിന്‍റ് എക്സൈസ് കമ്മിഷണർ കെ. സുരേഷ് അറിയിച്ചു. എക്സൈസ് ഇന്‍റലിജൻസ് വിഭാഗം നൽകിയ രഹസ്യവിവരത്തെ തുടർന്നാണ് ഇവരെ പിടികൂടിയത്. കൊവിഡിന്‍റെ മറവിൽ ലഹരി വസ്‌തുക്കൾ ഉപയോഗിക്കുന്നവരുടെ എണ്ണം വർധിച്ചു വരുന്നതായും കെ.സുരേഷ് പറഞ്ഞു. വിപണിയിൽ 80 ലക്ഷത്തിലധികം വില വരുന്ന 168 കിലോയിലധികം കഞ്ചാവാണ് പിടിച്ചെടുത്തത്.
