മലപ്പുറം: തണുപ്പുള്ള മേഖലകളിൽ ധാരാളം കാണാറുള്ള മുന്തിരി കൃഷി ചുട്ടുപൊള്ളുന്ന ഈ വേനൽ ചൂടിലും വിളയുമെന്ന് തെളിയിച്ചിരിക്കുകയാണ് മലപ്പുറം മേൽമുറി പാറമ്മൽ സ്വദേശിയായ പുല്ലംക്കുന്ന് രതീഷ് ബാബു. മുന്തിരിവള്ളി കണ്ടപ്പോൾ ഒരു കൗതുകത്തിന് വാങ്ങിയതാണെങ്കിലും തുടക്കത്തിൽ തന്നെ രതീഷ് ബാബുവിനേയും കുടുംബത്തേയും അത്ഭുതപ്പെടുത്തി നിരവധി മുന്തിരി കുലകളാണുണ്ടായത്.
നാല് വർഷം മുമ്പ് വാങ്ങിയ മുന്തിരി വള്ളിയിൽ നിന്നും മുറിച്ചെടുത്ത കമ്പ് വീടിൻ്റെ മട്ടുപ്പാവിലേക്ക് പടർത്തിയപ്പോൾ ഇത്തവണയും മുന്തിരി കായ്ക്കാൻ തുടങ്ങി. സാധാരണ മിക്ക വീടുകളിലും മുന്തിരി വള്ളികൾ കാണാറുണ്ടെങ്കിലും മുന്തിരി കുലകൾ അപൂർവമായേ ഉണ്ടാകാറുള്ളൂ. ഇതിനു കാരണം പല വീട്ടുകാരും മുന്തിരി കൃഷിയിൽ ബോധവാൻമാരല്ലാത്തതിനാലാണെന്ന് രതീഷ് ബാബു പറയുന്നു.
ഓട്ടോ ഡ്രൈവറായ രതീഷ് ബാബുവിൻ്റെ ഭാര്യ ഉഷയാണ് മുന്തിരിവള്ളിയെ പരിപാലിക്കുന്നത്. ഒപ്പം പൂർണ പിന്തുണയുമായി അയൽവാസികളും ഒപ്പമുണ്ട്. പുല്ല്, രാമച്ചം, ചകിരി മുതലായവ ഉപയോഗിച്ചാണ് വേനൽകാലത്തും ചെടിയുടെ വേരിൽ ഈർപ്പം നിലനിർത്തുന്നത്.
മിക്കയിടങ്ങളിൽ കായ്ക്കുന്ന മുന്തിരിക്കും പുളിപ്പാണെങ്കിൽ, ഈ വീട്ടിലെ മുന്തിരിക്ക് തേൻ മധുരമാണുള്ളത്. ഇതിനുള്ള കാരണം ഇവരുടെ പരിചരണമാണ്. മലപ്പുറത്തെ ഇപ്പോഴത്തെ ചൂടേറിയ ഈ കാലാവസ്ഥയിലും മുന്തിരി വളരുമോ എന്ന ചോദ്യത്തിന് വളരുമെന്ന് തെളിയിച്ചിരിക്കുകയാണ് ഈ കുടുംബം.
ALSO READ:കണിയുണ്ടെങ്കില്‍ കണിവെള്ളരിയുമുണ്ട്... കോഴിക്കോട്ടെ കണിവെള്ളരിപ്പെരുമയുടെ കഥ
