കോഴിക്കോട്: കേരളത്തിൽ ഓൺലൈൻ തട്ടിപ്പ് കേസുകൾ വർധിച്ച് വരികയാണ് (Online Fraud Case). സാങ്കേതികവിദ്യ വികാസം പ്രാപിക്കുന്നതിനോടൊപ്പം തട്ടിപ്പിൻ്റെ ശൈലികളിലും മാറ്റം വരുന്നുണ്ട്. തുടക്കത്തിൽ നിരന്തരം കേട്ടുകൊണ്ടിരുന്നത് ഒടിപി വഴിയുള്ള തട്ടിപ്പുകളാണ്. അത് നിർമ്മിത ബുദ്ധി വരെ (Artificial intelligence) എത്തി നിൽക്കുന്നു. എന്നാൽ സൈബർ തട്ടിപ്പുകാർ നിലവിൽ വ്യാപകമായി ഉപയോഗിക്കുന്നത് അശ്ലീല ദൃശ്യ പ്രചാരണവും വ്യാജ പൊലീസ് ഭീഷണിയുമാണ്.
ഏറ്റവും ഒടുവില്‍ കോഴിക്കോട്ട് 16കാരൻ ആത്മഹത്യ ചെയ്യാനുള്ള സംഭവത്തിന് പിന്നിൽ നാഷണൽ ക്രൈം റെക്കോർഡ്‌സ് ബ്യൂറോയുടെ പേരിലുള്ള വ്യാജ സന്ദേശമാണ്. പണം ആവശ്യപ്പെട്ടിട്ട് ലഭിച്ചില്ലെങ്കിൽ ഭീഷണിപ്പെടുത്തി ചിത്രങ്ങൾ മോർഫ് ചെയ്‌ത് സമൂഹ മാധ്യമങ്ങളിൽ പ്രചരിപ്പിക്കുന്നിടത്താണ് സ്ത്രീകള്‍ അടക്കമുള്ളവര്‍ പെട്ടു പോകുന്നത്. അന്വേഷിച്ചാൽ ലഭിക്കുന്ന മറുപടിയോ തട്ടിപ്പുകാരൻ്റെ തിരിച്ചറിയൽ രേഖകളും അക്കൗണ്ടും വ്യാജമെന്ന് മാത്രം.
നീളുന്ന തട്ടിപ്പുകള്‍ക്ക് അറുതിയില്ല: 2022ന് ശേഷം ഓൺലൈൻ തട്ടിപ്പ് കേസുകൾ വർധിച്ചിട്ടും ഓൺലൈൻ സാമ്പത്തിക കുറ്റകൃത്യങ്ങളും ബാങ്കിങ് തട്ടിപ്പുകളും അന്വേഷിക്കാൻ പരിശീലനം ലഭിച്ച ഉദ്യോഗസ്ഥരെ ഉൾപ്പെടുത്തി പ്രത്യേക അന്വേഷണ സംഘം രൂപീകരിക്കണമെന്ന ആവശ്യം ഇനിയും യാഥാർഥ്യമായിട്ടില്ല. കേരള പൊലീസിലെ വിവിധ അന്വേഷണ സംഘങ്ങളുടെ കീഴിൽ കേസുകളുടെ അന്വേഷണം പുരോഗമിക്കുമ്പോൾ പ്രതികൾ ഒളിവിലിരുന്ന് പുതിയ പദ്ധതികൾ ആസൂത്രണം ചെയ്യുകയാണ്. ചില കേസുകളിലെങ്കിലും നഷ്‌ടപ്പെട്ട മുതൽ കണ്ടെടുത്തിട്ടുണ്ടെങ്കിലും പ്രതികളെ കണ്ടെത്താനായിട്ടില്ല. സംസ്ഥാനത്തുടനീളം രജിസ്റ്റർ ചെയ്‌ത വിവിധ ഓൺലൈൻ തട്ടിപ്പ് കേസുകൾ അന്വേഷിക്കാൻ ഏകോപനമില്ലാത്തതാണ് ഇതിൻ്റെ പ്രധാന കാരണം.
കുറ്റകൃത്യങ്ങളുടെ സ്വഭാവം ഫലപ്രദമായി പഠിക്കാനും പ്രതികളെ കണ്ടെത്തുന്നതിന് ഊന്നൽ നൽകാനും കഴിയുന്ന സംസ്ഥാന-ജില്ലാതല സ്‌ക്വാഡുകൾ രൂപീകരിച്ചാൽ മാത്രമെ ഓൺലൈൻ സാമ്പത്തിക തട്ടിപ്പുകളെ കുറിച്ചുള്ള അന്വേഷണം കൂടുതൽ ഫലപ്രദമാക്കാൻ കഴിയൂ. പതിവ് ക്രമസമാധാന ചുമതലകൾക്കൊപ്പം ഓൺലൈൻ തട്ടിപ്പ് കേസുകൾക്കായും സമയം കണ്ടെത്താൻ ലോക്കൽ പൊലീസ് പാടുപെടുകയാണ്.
നഗരങ്ങളിലെ സൈബർ പൊലീസ് സ്‌റ്റേഷനാണ് ചില പ്രധാന കേസുകൾ കൈകാര്യം ചെയ്യുന്നതെങ്കിലും പ്രാദേശിക സംഭവങ്ങളിൽ ഭൂരിഭാഗവും ഇപ്പോഴും ലോക്കൽ പൊലീസ് സ്‌ക്വാഡിന്‍റെ പക്കലാണ്. തട്ടിപ്പുകാരുടെ ശൃംഖലയ്ക്ക് പിന്നിലെ ക്രിമിനലുകളെ പുറത്ത് കൊണ്ടുവരാൻ വൈകുന്നത് തട്ടിപ്പിന്‍റെ ഇരകൾക്ക് പൊലീസിലുള്ള വിശ്വാസം കെടുത്തുന്നുവെന്ന് മാത്രമല്ല പരാതിയുമായി ചെല്ലാന്‍ മടിയും കാണിക്കുന്നു. ചുരുക്കം പറഞ്ഞാല്‍ തട്ടിപ്പുകാരുടെ ബ്ലാക്ക്‌മെയിലിങ് കാരണം സംസ്ഥാനം അസ്വാഭാവിക മരണങ്ങൾക്കും സാക്ഷ്യം വഹിച്ചുകൊണ്ടിരിക്കുകയാണിപ്പോള്‍.
തട്ടിപ്പിന് ഇരയായാല്‍ ചെയ്യേണ്ടത്: സൈബർ തട്ടിപ്പിൽ അകപ്പെടാതിരിക്കാനും പ്രതികളെ കണ്ടെത്താനും പൊലീസ് പല മുന്നറിയിപ്പുകളും നൽകുന്നുണ്ട്. മൊബൈൽ ഫോൺ, ലാപ്ടോപ്, സ്‌മാര്‍ട് ടിവി എന്നിവയിൽ വ്യാജ സന്ദേശങ്ങൾ വന്നാൽ ഉപകരണം നിശ്ചലമാകും. ഈ സമയം ഉപകരണം ഉടൻ ഓഫ് ചെയ്‌ത് 1930 എന്ന നമ്പറിലേക്ക് അറിയിക്കുക. തട്ടിപ്പുകാരുമായി ബന്ധപ്പെട്ട ഫോട്ടോകളോ വീഡിയോകളോ ഉണ്ടെങ്കിൽ 9497980900 എന്ന നമ്പറിലേക്ക് അയക്കുക. രക്ഷിതാക്കൾ അറിയാതെ കുട്ടികൾ മേൽ പറഞ്ഞ ഉപകരണങ്ങൾ ഉപയോഗിക്കുന്നത് കർശനമായി വിലക്കുകയും അപകട സാധ്യതകളെ കുറിച്ച് മുന്നറിയിപ്പ് നൽകുകയും വേണം.
