കോട്ടയം: ഇക്കഴിഞ്ഞ മണ്ഡല മകരവിളക്ക് മഹോത്സവത്തോടനുബന്ധിച്ച് ശബരിമലയില്‍ നടത്തിയ പ്രവര്‍ത്തനങ്ങള്‍ക്ക് കോട്ടയം ജില്ല പൊലീസിന് ദേവസ്വം ബോര്‍ഡിന്‍റെ അംഗീകാരം. സുഗമവും സുരക്ഷിതവുമായ രീതിയില്‍ അയ്യപ്പഭക്തര്‍ക്ക് ദര്‍ശന സൗകര്യമൊരുക്കിയതിനാണ് അംഗീകാരം ലഭിച്ചത്. ഇന്നലെ പമ്പയില്‍ വച്ചുനടന്ന ചടങ്ങില്‍ ദേവസ്വം മന്ത്രി കെ രാധാകൃഷ്‌ണനാണ് ജില്ല പൊലീസ് മേധാവി കെ കാർത്തിക് ഐപിഎസിന് പുരസ്‌കാരം കൈമാറിയത്.
മണ്ഡല മകരവിളക്ക് ഉത്സവത്തിന് നട തുറക്കുന്നതിന് മുന്‍പ് തന്നെ ഇത്തവണ മുന്‍ വര്‍ഷങ്ങളില്‍ നിന്നും വ്യത്യസ്‌തമായി ശബരിമലയില്‍ ഭക്തജന തിരക്ക് അനുഭവപ്പെട്ടിരുന്നു. എങ്കിലും ഭക്തജനങ്ങള്‍ക്ക് സുഗമമായ രീതിയില്‍ ദര്‍ശനം നടത്തി മടങ്ങാനുള്ള സാഹചര്യം പൊലീസ് ഒരുക്കുകയായിരുന്നു. അയ്യപ്പ ഭക്തര്‍ കാല്‍നടയായി പോകുന്ന വഴികളായ അഴുത, കാളകെട്ടി, കോയിക്കക്കാവ് മുതലായ ഇടങ്ങളില്‍ പൊലീസ് പ്രത്യേക നിരീക്ഷണവും ഏര്‍പ്പെടുത്തിയിരുന്നു.
കൂടാതെ ഇടത്താവളങ്ങളില്‍ സുരക്ഷ വര്‍ധിപ്പിക്കുകയും ഭക്തര്‍ക്ക് വേണ്ട സൗകര്യങ്ങള്‍ ഏര്‍പ്പെടുത്തുകയും ചെയ്‌തിരുന്നു. കാല്‍നടയായി എത്തുന്ന അയ്യപ്പഭക്തര്‍ക്കായി പാതകളില്‍ റിഫ്ലക്‌റ്റിങ് സ്റ്റിക്കര്‍ സംവിധാനം ഒരുക്കി. ഭക്തരുമായെത്തുന്ന വാഹനങ്ങളിലെ ഡ്രൈവര്‍മാര്‍ക്ക് പ്രത്യേക ബോധവത്‌കരണ ക്ലാസും നല്‍കി.
എരുമേലിയിലും ശക്തമായ സുരക്ഷ സംവിധാനങ്ങളാണ് ഇത്തവണ ഏര്‍പ്പെടുത്തിയിരുന്നത്. മോഷണം ഉള്‍പ്പടെയുള്ള സാമുഹിക വിരുദ്ധ പ്രവര്‍ത്തനങ്ങള്‍ തടയുന്നതിന്‍റെ ഭാഗമായി കൂടുതല്‍ ക്യാമറകളും പൊലീസ് സജ്ജീകരിച്ചിരുന്നു. നൂതന സാങ്കേതിക വിദ്യയുടെ സഹായത്തോടെ പ്രവര്‍ത്തിക്കുന്ന സ്‌പെഷ്യല്‍ കണ്‍ട്രോള്‍ റൂമുകള്‍ കേന്ദ്രീകരിച്ചായിരുന്നു പ്രവര്‍ത്തനങ്ങളുടെ ഏകോപനം. സുരക്ഷ ശക്തമാക്കിയ സാഹചര്യത്തില്‍ ഈ മണ്ഡലകാലത്ത് എരുമേലിയില്‍ മുൻ വർഷങ്ങളെ അപേക്ഷിച്ച് കൂടുതലായി മോഷണങ്ങളോ മറ്റ് കുറ്റകൃത്യങ്ങളോ റിപ്പോര്‍ട്ട് ചെയ്‌തിരുന്നില്ല.
കുംഭമാസ പൂജകള്‍ അവസാനിച്ചു, ശബരിമല നടയടച്ചു: കുംഭമാസ പൂജകള്‍ പൂര്‍ത്തിയായതിന് പിന്നാലെ ശബരിമല ശ്രീ ധര്‍മ്മശാസ്‌ത ക്ഷേത്ര നട അടച്ചു. ഇന്നലെ രാത്രി പത്തിന് ഭസ്‌മാഭിഷേകത്തിന് ശേഷം ഹരിവരാസനം പാടിയാണ് നട അടച്ചത്. മാര്‍ച്ച് 14ന് വൈകുന്നേരം മീനമാസ പൂജകള്‍ക്കായി ആകും ശബരിമല നട ഇനി തുറക്കുക.
പൂജകള്‍ക്ക് ശേഷം മാര്‍ച്ച് 19ന് രാത്രിയില്‍ നട അടയ്‌ക്കും. ഇതിന് പിന്നാലെ ഉത്രം തിരു ഉത്സവത്തിനായി മാര്‍ച്ച് 26ന് നട വീണ്ടും തുറക്കും. മാര്‍ച്ച് 27നാണ് കൊടിയേറ്റ്. ഏപ്രില്‍ അഞ്ചിന് പൈങ്കുനി ഉത്രം ആറാട്ടിന് ശേഷം രാത്രിയോടെ നട അടയ്‌ക്കും.
