കോട്ടയം : Police arrested the accused who tried to escape: പൊലീസുകാരെ ആക്രമിച്ച ശേഷം സ്റ്റേഷനില് നിന്നും രക്ഷപ്പെടാന്‍ ശ്രമിച്ച പ്രതിയെ കറുകച്ചാല്‍ പൊലീസ് ഓടിച്ചിട്ട് പിടികൂടി. ആക്രമണത്തില്‍ രണ്ട് പൊലീസുകാര്‍ക്ക് പരിക്കേറ്റു. കറുകച്ചാല്‍ കൊച്ചുകണ്ടം ചക്കിട്ടപ്പറമ്പില്‍ സന്തോഷ് (മാത്യു-39) ആണ് അറസ്‌റ്റിലായത്.
മക്കളെ ഉപദ്രവിച്ചെന്ന പരാതിയിലാണ് ചൊവ്വാഴ്‌ച കറുകച്ചാല്‍ പൊലീസ് ഇയാളെ സ്‌റ്റേഷനിലെത്തിച്ചത്. പാറാവ് ജോലിയിലുണ്ടായിരുന്ന പൊലീസുകാരെ ആക്രമിച്ച ശേഷം ഇയാള്‍ ഇറങ്ങിയോടുകയായിരുന്നു. പിന്തുടര്‍ന്നെത്തിയ പൊലീസ് കറുകച്ചാല്‍ കവലയില്‍വെച്ച് ഇയാളെ ഓടിച്ചിട്ട് പിടികൂടി.
ALSO READ: മീനുകളെ തിന്നാന്‍ കൂടയില്‍ കയറി,'പണി തീര്‍ത്തപ്പോള്‍' കുടുങ്ങി
വീണ്ടും സ്‌റ്റേഷനിലെത്തിച്ച പ്രതി എ.എസ്.ഐ. മാത്യു വര്‍ഗീസിന്‍റെ കാല്‍ കടിച്ചുമുറിച്ച ശേഷം എ.എസ്.ഐ. വിഷ്‌ണുവിനെ ചവിട്ടി താഴെയിട്ടു. പൊലീസ് ബലം പ്രയോഗിച്ച് ഇയാളെ ലോക്കപ്പിലടച്ചു. മുന്‍പും പൊലീസുകാരെ ആക്രമിച്ചതടക്കം ഇയാളുടെ പേരില്‍ 18-ഓളം കേസുകള്‍ വിവിധ സ്‌റ്റേഷനുകളിലായുണ്ട്.
രണ്ടുവര്‍ഷം മുന്‍പ് സ്ത്രീകളെ ശല്യപ്പെടുത്തിയ കേസില്‍ പിടികൂടാനെത്തിയ കറുകച്ചാല്‍ സ്‌റ്റേഷനിലെ മറ്റൊരു പൊലീസുകാരനെ കുത്തിയ ശേഷം സന്തോഷ് കാല്‍ കടിച്ചു മുറിച്ചിരുന്നു. ഇയാള്‍ക്കെതിരെ കാപ്പ ചുമത്താനുള്ള നടപടികള്‍ സ്വീകരിക്കുമെന്ന് എസ്.എച്ച്.ഒ. റിച്ചാര്‍ഡ് വര്‍ഗീസ് പറഞ്ഞു. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്‌തു.
