കോട്ടയം : കഴിഞ്ഞ ദിവസം ജലഗതാഗത വകുപ്പിന്‍റെ മുഹമ്മ സ്റ്റേഷനില്‍ എത്തിയ യാത്രക്കാർ ചെറുതായൊന്ന് അമ്പരന്നു. ഇന്നലെ വരെ കണ്ടതല്ല, ഇക്കാണുന്നത്, ആകെയൊരു മാറ്റം... ഒറ്റനോട്ടത്തില്‍ കപ്പലോടിക്കുന്ന കപ്പിത്താൻ മുന്നില്‍ നില്‍ക്കുന്നു. മറ്റ് ജീവനക്കാരുടെ വേഷത്തിലും മാറ്റം... കാര്യങ്ങൾ ചോദിച്ചപ്പോഴാണ് സംഗതി ക്ലിയറായത്... ജലഗതാഗത വകുപ്പ് അന്താരാഷ്ട്ര നിലവാരത്തിലേക്ക് മാറുകയാണ്. അതിന്‍റെ ഭാഗമായുള്ള യൂണിഫോം പരിഷ്‌കരണമാണിത്.
സംസ്ഥാന ജലഗതാഗത വകുപ്പ് നിർദേശിച്ച ജീവനക്കാരുടെ യൂണിഫോം പരിഷ്‌കരണം നടപ്പിലാക്കിയിരിക്കുകയാണ് മുഹമ്മ സ്റ്റേഷൻ. പുത്തൻ വേഷത്തിൽ മുഹമ്മ ജലഗതാഗത വകുപ്പ് സ്റ്റേഷനിലെ ജീവനക്കാർ ഇന്നലെ ആദ്യ ഡ്യൂട്ടി ചെയ്‌തു. ഇന്നലെ രാവിലെ 10 മണി ഷെഡ്യൂളിലാണ് പുത്തൻ യൂണിഫോമായി എസ് 55 നമ്പർ ബോട്ടിൽ ജീവനക്കാർ എത്തിയത്.
തസ്‌തിക വ്യത്യാസമില്ലാതെ കാക്കി നിറത്തിലെ വേഷം ധരിച്ചെത്തിയ ജീവനക്കാർ യാത്രക്കാർക്ക് വേറിട്ട കാഴ്‌ച നൽകി. ബോട്ടിന്‍റെ ക്രൂ എന്നറിയപ്പെടുന്ന ബോട്ട് മാസ്റ്റര്‍, ഡ്രൈവര്‍, സ്രാങ്ക്, ലാസ്‌കര്‍ തസ്‌തികകളില്‍ യൂണിഫോമിന്‍റെ നിറം ഏകീകരിച്ചും മറ്റ് തസ്‌തികകളില്‍ അന്താരാഷ്ട്ര നിലവാരത്തിലുള്ള യൂണിഫോം പരിഷ്‌കരണവുമാണ് വകുപ്പ് നടപ്പിലാക്കിയിരിക്കുന്നത്. വേഷം കാക്കി നിറത്തിലാണെങ്കിലും തസ്‌തികയുടെയും കാറ്റഗറി കോഡിന്‍റെയും അടിസ്ഥാനത്തില്‍ ഷര്‍ട്ടിന്‍റെ ഫ്‌ലാപ്പില്‍ ലൈനുകളും, സ്റ്റാറുകളും പതിച്ചിട്ടുണ്ട്.
കൂടാതെ, ജീവനക്കാരന്‍റെ പേരും തസ്‌തികയും രേഖപ്പെടുത്തിയ നെയിം പ്ലേറ്റും പുതിയ വേഷത്തിന്‍റെ സവിശേഷതയാണ്. ഒറ്റ നോട്ടത്തില്‍ കപ്പിത്താന്മാരുടെ വേഷവുമായി സാദൃശ്യം തോന്നുന്ന തരത്തിലാണ് പരിഷ്‌കരിച്ച യൂണിഫോം.
സ്റ്റേഷന്‍മാസ്റ്റര്‍, ചെക്കിങ് സ്റ്റാഫ് എന്നിവര്‍ക്ക് കാക്കി പാന്‍റ്, വെള്ള ഷര്‍ട്ട്, ബ്രൗണ്‍ കളര്‍ ബെല്‍റ്റ്, ബ്രൗണ്‍ കളര്‍ ഷൂസ്, സില്‍വര്‍ കളറില്‍ കറുത്ത അക്ഷരത്തില്‍ പേരും ഔദ്യോഗിക പദവിയും രേഖപ്പെടുത്തിയ നെയിം പ്ലേറ്റ്, ഷര്‍ട്ടിന്‍റെ ഷോള്‍ഡറില്‍ നേവി ബ്ലൂ ഫ്‌ളാപ്പ്, ഫ്‌ളാപ്പില്‍ ഗ്രേഡിന് അനുശ്രുതമായ ഗോള്‍ഡന്‍ കളറിലെ നക്ഷത്രങ്ങളും അടങ്ങുന്നതാണ് വേഷം.
ക്രൂ വിഭാഗമായ ബോട്ട് മാസ്റ്റര്‍, ഡ്രൈവര്‍, സ്രാങ്ക്, ലാസ്‌കര്‍ എന്നിവര്‍ക്ക് കാക്കി പാന്‍റും ഷര്‍ട്ടും ബ്രൗണ്‍ കളര്‍ ബെല്‍റ്റ്, ബ്രൗണ്‍ കളര്‍ ഷൂസ്, കറുത്ത നിറത്തിലെ നെയിം പ്ലേറ്റിൽ സില്‍വര്‍ കളര്‍ അക്ഷരങ്ങളില്‍ പേരും ഔദ്യോഗിക പദവിയും രേഖപ്പെടുത്തിയിരിക്കുന്നു. ഷര്‍ട്ടിന്‍റെ ഷോള്‍ഡറില്‍ കറുപ്പ്/നേവി ബ്ലൂ ഫ്‌ളാപ്പില്‍ ഗ്രേഡ് അനുസരിച്ചുള്ള ഗോള്‍ഡന്‍ കളര്‍ ലൈനും സ്റ്റാര്‍ ചിഹ്നവും അടങ്ങുന്നതാണ് പരിഷ്‌കരിച്ച യൂണിഫോം.
ബോട്ടുകളില്‍ തന്നെ വലിയ മാറ്റമാണ് ജലഗതാഗത വകുപ്പ് വരുത്തുന്നത്. രൂപത്തിലും ഭാവത്തിലും അന്താരാഷ്ട്ര നിലവാരത്തിലേയ്ക്കാണ് ബോട്ടുകള്‍ മാറുന്നത്. സേവന മേഖല എന്നതിനപ്പുറം ടൂറിസം രംഗത്തും മികച്ച മുന്നേറ്റം നടത്തുകയാണ് ജലഗതാഗത വകുപ്പ്. ഇതിന്‍റെ ഭാഗമായാണ് ജീവനക്കാരുടെ വേഷത്തിലും മാറ്റങ്ങള്‍ വരുത്തുന്നത്.
ഭൂരിഭാഗം ജീവനക്കാരും പുതിയ വേഷം തയ്യാറാക്കി കഴിഞ്ഞിട്ടുണ്ട്. എല്ലാ സ്‌റ്റേഷനുകളിലും പരിഷ്‌കരിച്ച യൂണിഫോം ഉടൻ പ്രാബല്യത്തിൽ വരുമെന്നാണ് പ്രതീക്ഷിക്കുന്നതെന്ന് ജലഗതാഗത വകുപ്പ് അധികൃതർ അറിയിച്ചിട്ടുണ്ട്.
