കോട്ടയം: നൂറ് കണക്കിന് പേർ നോക്കിനില്‍ക്കെ പാലാ പഴയ ബസ്റ്റാന്‍ഡില്‍ പിങ്ക് പൊലീസ് ഉദ്യോഗസ്ഥര്‍ക്ക് നേരെ കയ്യേറ്റശ്രമം. മദ്യഹലരിയിലായിരുന്ന യുവാവാണ് വനിതാ ഉദ്യോഗസ്ഥരുടെ ഫോട്ടെയെടുക്കുകയും ഫോണ്‍ കൈക്കലാക്കിയ ഉദ്യോഗസ്ഥരുടെ കൈയില്‍ നിന്നും തട്ടിപ്പറിക്കാന്‍ ശ്രമിക്കുകയും ചെയ്തത്. യുവാവിനെ പൊലീസ് അറസ്റ്റ് ചെയ്ത് ജാമ്യത്തിൽ വിട്ടു.
ശനിയാഴ്ച വൈകിട്ടാണ് സംഭവം. കാറിന് പുറത്തിറങ്ങി നില്‍ക്കുകയായിരുന്ന വനിതാ ഉദ്യോഗസ്ഥരുടെ ഫോട്ടെയെടുത്തുകൊണ്ടായിരുന്നു തുടക്കം. ഫോണ്‍ കൂടുതല്‍ അടുത്തേയ്ക്ക് പിടിച്ച് ഫോട്ടെയെടുത്തതോടെ ഉദ്യോഗസ്ഥ ഫോണ്‍ കൈക്കലാക്കി. ഇതോടെ പൊലീസുകാരിയുടെ കൈയില്‍ നിന്നും ഫോണ്‍ തട്ടിപ്പറിക്കാനായി യുവാവിന്റെ ശ്രമം. മറ്റ് ഉദ്യോഗസ്ഥര്‍ ഇയാളുടെ ചിത്രമെടുത്തതോടെ ശരിക്കു നിന്നു തരാം എടുത്തോളൂ എന്നായി യുവാവിന്റെ നിലപാട്. ഇതോടെ പരിസരമാകെ നിരവധിയാളുകള്‍ തടിച്ചുകൂടി. വിവരമറിഞ്ഞ് പാലാ പൊലീസെത്തി യുവാവിനെ സ്‌റ്റേഷനിലേയ്ക്ക് കൊണ്ടുപോയി. മദ്യപിച്ച് പൊതുസ്ഥലത്ത് ബഹളമുണ്ടാക്കിയതിന് മാത്രമാണ് പൊലീസ് കേസെടുത്തത്.
