കോട്ടയം: മണിപ്പാലിൽ മലയാളി മെഡിക്കൽ വിദ്യാർഥി വാഹനാപകടത്തിൽ മരിച്ചു. കോട്ടയം (Kottayam) സ്വദേശിയായ എ ആർ സൂര്യനാരായണനാണ് (26) മരിച്ചത്. മണിപ്പാൽ കസ്‌തൂർബ മെഡിക്കൽ കോളജിലെ എം എസ് വിദ്യാർഥിയായിരുന്നു സൂര്യനാരായണൻ.
ഇന്ന് പുലർച്ചെ 12.30ഓടെ കസ്‌തൂർബ മെഡിക്കൽ കോളജിന് സമീപത്ത് വച്ചാണ് അപകടം സംഭവിച്ചത്. സൂര്യ നാരായണൻ സഞ്ചരിച്ചിരുന്ന കാർ നിയന്ത്രണം വിട്ട് റോഡിലെ ഡിവൈഡറിലിടിച്ച് മറിഞ്ഞാണ് അപകടം. ബാങ്ക് ഓഫ് മഹാരാഷട്രയുടെ മാനേജിങ് ഡയറക്‌ടറും സി ഇ ഒയുമായ കോട്ടയം ആർപ്പൂക്കര ഏറത്ത് (അദ്വൈതം) വീട്ടിൽ എ എസ് രാജീവിന്‍റെ മകനാണ് മരിച്ച സൂര്യനാരായണൻ. സംസ്‌കാരം നാളെ ഉച്ചയ്ക്ക് രണ്ടിന് ആർപ്പൂക്കരയിലെ വീട്ടുവളപ്പിൽ നടക്കും.
കാസർകോട് സഹോദരങ്ങൾ മുങ്ങി മരിച്ചു: കാസർകോട് (Kasargod) മൊഗ്രാലിൽ സഹോദരങ്ങൾ കുളത്തിൽ മുങ്ങി മരിച്ചു. ഹൊസങ്കടി സ്വദേശികളായ നാസിൽ(17), നവാസ് (21) എന്നിവരാണ് മരിച്ചത്. പെരുന്നാൾ ആഘോഷത്തിന്‍റെ ഭാഗമായി ഇന്നലെ ബന്ധുവീട്ടിൽ എത്തിയതായിരുന്നു സഹോദരങ്ങൾ.
ശേഷം നാസിൽ കുളിക്കാനെന്ന് പറഞ്ഞ് പള്ളിക്കുളത്തിലേക്ക് പോയതിന് പിന്നാലെ നവാസും കുളത്തിലേക്ക് പോകുകയായിരുന്നു. ഇതിനിടയിൽ നാസിൽ കുളത്തിൽ മുങ്ങിത്താഴുന്നത് കണ്ട് രക്ഷിക്കാനായി നവാസ് കുളത്തിലേക്ക് ചാടി. കുളത്തിൽ വെള്ളം കുറവായിരുന്നതിനാൽ ചെളിയിൽ പൂണ്ടാണ് രണ്ടുപേരും മരണക്കയത്തിലേക്ക് നീങ്ങിയത്.
സംഭവ സമയത്ത് ഇവർക്കൊപ്പം ബന്ധുക്കളായ രണ്ട് ചെറിയ കുട്ടികളും ഉണ്ടായിരുന്നു. കുട്ടികളുടെ ബഹളം കണ്ട് തൊട്ടടുത്ത് റെയിൽ പാളത്തിലൂടെ നടന്നുപോവുകയായിരുന്ന മറ്റ് കുട്ടികളാണ് നാട്ടുകാരെ വിവരം അറിയിച്ചത്. ഉടൻ തന്നെ ഓടിക്കൂടിയവർ കുളത്തിൽ നിന്ന് ഇരുവരെയും പുറത്തെടുത്ത് കാസർകോട്ടെ ആശുപത്രിയിൽ എത്തിച്ചെങ്കിലും മരണം സംഭവിച്ചിരുന്നു.
മൃതദേഹങ്ങൾ പോസ്റ്റ്‌മോർട്ടത്തിനായി മംഗൽപാടി താലൂക്ക് ആശുപത്രിയിലേക്ക് കൊണ്ടുപോയി. പോസ്റ്റ്‌മോർട്ടം നടപടികൾക്ക് ശേഷം മൃതദേഹങ്ങൾ വീട്ടിലെത്തിച്ച് കടമ്പാർ ജുമാ മസ്‌ജിദ്‌ ഖബർസ്ഥാനിൽ ഖബറടക്കും. ഡിഗ്രി വിദ്യാർഥിയാണ് നവാസ്. നാസിൽ എസ്‌എസ്‌എൽസി വിദ്യാർഥിയാണ്. റഫീഖ്-നഫീസ ദമ്പതികളുടെ മക്കളാണ് മരിച്ചത്.
ഖത്തറില്‍ വാഹനാപകടത്തിൽ അഞ്ച് മരണം, മൂന്ന് മലയാളികളും: ഖത്തറില്‍ ബുധനാഴ്‌ച ഉണ്ടായ വാഹനാപകടത്തില്‍ കൊല്ലം സ്വദേശികളായ മൂന്ന് പേര്‍ ഉള്‍പ്പെടെ അഞ്ച് ഇന്ത്യക്കാര്‍ മരിച്ചു. ശക്തികുളങ്ങര കല്ലുംമൂട്ടില്‍ തോപ്പില്‍ റോഷിന്‍ ജോണ്‍ (38), ഭാര്യ ആന്‍സി ഗോമസ് (30), ആന്‍സിയുടെ സഹോദരന്‍ അഴീക്കല്‍ സ്വദേശി ജിജോ ഗോമസ് (34), ഇവരുടെ സുഹൃത്തുക്കളായ തമിഴ്‌നാട് സ്വദേശികളായ നാഗലക്ഷ്‌മി ചന്ദ്രശേഖരന്‍ (33), ഭര്‍ത്താവ് പ്രവീണ്‍ കുമാര്‍ (38) എന്നിവരാണ് അപകടത്തിൽ മരിച്ചത്. റോഷിന്‍റെയും ആന്‍സിയുടെയും മൂന്ന് വയസുള്ള മകന്‍ ഗുരുതര പരിക്കേറ്റ് ഖത്തര്‍ സിദ്ര മെഡിസിന്‍ ആശുപത്രിയില്‍ ചികിത്സയിലാണ്.
ദോഹയില്‍ നിന്നും 70 കിലോമീറ്റര്‍ അകലെ അല്‍ഖോറിലായിരുന്നു അപകടം സംഭവിച്ചത്. അല്‍ഖോറിലെ ഫ്‌ളൈ ഓവറിൽ വച്ച് ഇവര്‍ സഞ്ചരിച്ചിരുന്ന വാഹനം അപകടത്തില്‍ പെടുകയായിരുന്നു. തുടര്‍ന്ന് വാഹനം പാലത്തില്‍ നിന്ന് താഴേക്ക് വീണു. ആശുപത്രിയിലേക്ക് കൊണ്ടുപോകുന്ന വഴിയാണ് അഞ്ച് പേരും മരിച്ചത്.
More read : Accident| ഖത്തറിൽ വാഹനാപകടം; 3 മലയാളികൾ ഉൾപ്പെടെ 5 ഇന്ത്യക്കാര്‍ മരിച്ചു, മൂന്ന് വയസുകാരന് ഗുരുതര പരിക്ക്
നായ റോഡിന് കുറുകെ ചാടിയതോടെ ബൈക്ക് നിയന്ത്രണം വിട്ട് മറിഞ്ഞ് യുവാവ് മരിച്ചു. മൂലംപ്പള്ളി സ്വദേശിയായ സാൾട്ടനാണ് (26) മരിച്ചത്. ജൂൺ 23ന് രാവിലെ എട്ട് മണിയോടെയായിരുന്നു സംഭവം.
എറണാകുളം ചേരാനല്ലൂർ കോതാട് വച്ചാണ് അപകടം സംഭവിച്ചത്. നായ കുറുകെ ചാടിയതിന് പിന്നാലെ ബൈക്ക് നിയന്ത്രണം വിട്ട് ഹാര്‍ബര്‍ ഭാഗത്ത് നിന്നും മടങ്ങുകയായിരുന്ന ലോറിക്ക് അടിയിലേക്ക് വീഴുകയായിരുന്നു.
