കാസർകോട് : മലയാളി മാധ്യമപ്രവർത്തക എൻ.ശ്രുതി(34) ആത്മഹത്യ ചെയ്ത സംഭവത്തിൽ ഭർത്താവിനും കുടുംബത്തിനുമെതിരെ ഗുരുതര ആരോപണവുമായി ബന്ധുക്കൾ. ഭർത്താവ് അനീഷ് കോയാടൻ ശ്രുതിയെ നിരന്തരം പീഡിപ്പിക്കാറുണ്ടായിരുന്നെന്നും ഒരു തവണ തലയിണ അമര്‍ത്തി കൊലപ്പെടുത്താൻ ശ്രമിച്ചിരുന്നതായും സഹോദരൻ നിഷാന്ത് പറഞ്ഞു.
ശ്രുതിയെ ശാരീരികമായും മാനസികമായും അനീഷ് പീഡിപ്പിച്ചത് യുവാവിന്‍റെ കുടുംബത്തിന്റെ അറിവോടെയാണെന്നും ഇവർ ആരോപിക്കുന്നു. വിവാഹശേഷം നിരന്തരം ശാരീരിക മാനസിക പീഡനത്തിന് ഇരയാക്കി. എപ്പോഴും പണം ആവശ്യപ്പെട്ടിരുന്നു. ശ്രുതിയുടെ ശമ്പളം തനിക്ക് വേണമെന്ന് പറഞ്ഞായിരുന്നു പീഡനമെന്നാണ് ആരോപണം.
ശ്രുതി മാതാപിതാക്കൾക്ക് പണം കൊടുക്കാൻ പാടില്ലെന്ന് അനീഷ് പറഞ്ഞിരുന്നു. മാതാപിതാക്കളോട് സംസാരിക്കുന്നതിനും വിലക്കുണ്ടായിരുന്നു. ശ്രുതിയെ നിരന്തരം നിരീക്ഷിക്കാൻ ഫ്ലാറ്റിൽ ക്യാമറയും വോയ്‌സ് റെക്കോർഡറും സ്ഥാപിച്ചിരുന്നു. യാതൊരുവിധ സ്വകാര്യതയും അനുവദിച്ചില്ല. മയക്കുമരുന്ന് ചേർത്ത വൈൻ കുടിപ്പിക്കാൻ ശ്രമിച്ചതായി ഒരിക്കൽ ശ്രുതി പറഞ്ഞതായും ബന്ധുക്കൾ പറയുന്നു.
ആത്മഹത്യ കുറിപ്പിലും ഗുരുതര പരാമര്‍ശങ്ങള്‍ : പീഡനം സംബന്ധിച്ച് വ്യക്തമാക്കുന്ന പലകാര്യങ്ങളും ആത്മഹത്യ കുറിപ്പിലുണ്ട്. അനീഷിന് ശ്രുതി എഴുതിയ കത്തിൽ ഇങ്ങനെ പറയുന്നു. "ഇനി നിങ്ങൾ കല്യാണം കഴിക്കുന്നുണ്ടെങ്കിൽ അനാഥയായ കുട്ടിയെ വിവാഹം കഴിക്കണം, മൂകയും ബാധിരയുമായ കുട്ടിയാണെങ്കിൽ ഇതൊന്നും കേൾക്കേണ്ടല്ലോ. ആർക്കും പൈസയും കൊടുക്കേണ്ടല്ലോ. എല്ലാം നിങ്ങൾക്ക് എടുക്കാം".
മാതാപിതാക്കൾക്ക് എഴുതിയ കത്തിൽ നിന്ന് : "ഞാൻ ജീവിച്ചിരുന്നാൽ നിങ്ങൾക്ക് ജീവിതാവസാനം വരെ സങ്കടപ്പെടാനേ സമയമുണ്ടാകൂ. മരിച്ചാൽ കുറച്ചുദിവസം അതോർത്ത് സങ്കടം ഉണ്ടാകും, പിന്നെ നിങ്ങൾ മറന്നോളും. ഓരോ കോംപ്രമൈസ് കഴിയുമ്പോളും പീഡനം തുടർന്നിരുന്നതായും ആത്മഹത്യ കുറിപ്പിൽ പറയുന്നു.
Also Read: മലയാളി മാധ്യമ പ്രവർത്തകയെ ബെംഗളൂരുവിൽ ആത്മഹത്യ ചെയ്ത നിലയിൽ കണ്ടെത്തി
കാസർകോട് വിദ്യാനഗർ സ്വദേശിനിയായ ശ്രുതി ബെംഗളൂരുവിലെ ഫ്ലാറ്റിൽ മാർച്ച്‌ 20നാണ് ആത്മഹത്യ ചെയ്തത്. റോയിട്ടേഴ്സിൽ മാധ്യമപ്രവര്‍ത്തകയായ ശ്രുതിയെ ബെംഗളൂരുവിലെ അപ്പാർട്ട്മെന്റില്‍ ആത്മഹത്യ ചെയ്ത നിലയിൽ കണ്ടെത്തുകയായിരുന്നു. കെട്ടിത്തൂങ്ങിയ നിലയിലായിരുന്നു.
മൃതദേഹം കണ്ടത് സഹോദരന്‍ ഫ്ലാറ്റിലെത്തി പരിശോധിച്ചപ്പോള്‍ : മൃതദേഹത്തിന് രണ്ടുദിവസം പഴക്കമുണ്ടായിരുന്നു. വീടിന്‍റെ ജനൽ കമ്പിയിൽ ഷാളിലാണ് തൂങ്ങിമരിച്ചത്. അമ്മ പല തവണ ഫോണിൽ ബന്ധപ്പെട്ടെങ്കിലും പ്രതികരണമുണ്ടായിരുന്നില്ല. തുടർന്ന് ബംഗളൂരുവില്‍ എൻജിനീയറായ സഹോദരൻ നിഷാന്ത് അപ്പാർട്ട്മെന്റിലെ കാവൽകാരനുമായി ഫോണിൽ ബന്ധപ്പെട്ടപ്പോൾ മുറി അകത്തുനിന്ന് പൂട്ടിയിരിക്കുന്നതായി അറിയിച്ചു.
ഇതേതുടർന്ന് എത്തിയപ്പോഴാണ് മുറിക്കുള്ളിൽ തൂങ്ങി മരിച്ച നിലയിൽ കണ്ടത്. ബെംഗളൂരുവില്‍ എഞ്ചിനീയറായ ഭർത്താവ് അനീഷ് സംഭവ സമയം സ്ഥലത്തുണ്ടായിരുന്നില്ല. തളിപ്പറമ്പിനടുത്ത ചുഴലിയിലെ വീട്ടില്‍ വന്നതായിരുന്നു. വിദ്യാനഗർ ചാല റോഡ് താമസിക്കുന്ന റിട്ട.അധ്യാപകനും പരിസ്ഥിതി പ്രവർത്തകനുമായ നാരായണൻ പെരിയയുടെയും റിട്ട.അധ്യാപിക സത്യഭാമയുടെയും മകളാണ് ശ്രുതി.
പൊലീസില്‍ പരാതി നല്‍കി കുടുംബം : മൃതദേഹം കാസർകോട് എത്തിച്ച് സംസ്കരിച്ചു. മരണത്തിലെ ദുരൂഹത നീക്കണം എന്നാവശ്യപ്പെട്ട് ബന്ധുക്കള്‍ വൈറ്റ്ഫീല്‍ഡ് പൊലീസ് സ്റ്റേഷനില്‍ പരാതി നല്‍കിയിട്ടുണ്ട്. അസ്വാഭാവിക മരണത്തിന് ബെംഗളൂരു പൊലീസ് കേസ് എടുത്ത് അന്വേഷണം തുടങ്ങി.
